༢༠༡༠ ཕྱི་ཟླ་ ༡ ཚེས་ ༨ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༨ ཉིན་བོད་གཞུང་ཤེས་རིག་ལས་ཁུངས་ཀྱིས་གོ་སྒྲིག་ཐོག་གཞི་རིམ་འོག་མའི་དགེ་རྒན་ཁག་གཅིག་ལ་ཤེས་ཡོན་སྲིད་བྱུས་དང་འབྲེལ་བའི་ཟབ་སྦྱོང་ཐེངས་བདུན་པ་དེ་ས་ར་མཐོ་སློབ་ཏུ་ཚོགས་ཡོད། དེ་ཡང་སྔ་དྲོ་ཆུ་ཚོད་ ༩།༠༠ ཐོག་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་གིས་དབུས་ས་རའི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་དང་། ཤེས་རིག་གི་ཤེས་ཡོན་འགན་འཛིན་ཚེ་རིང་བསམ་གྲུབ་ལགས། དེ་བཞིན་གཞི་རིམ་སློབ་གྲྭ་ཁག་ནས་ཕེབས་པའི་དགེ་རྒན་རྣམས་པ་སོགས་མཐོ་སློབ་ཀྱི་ཚོགས་ཁང་དུ་ལྷན་འཛོམས་ཀྱིས་ཐོག་མར་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་ནས་ཟབ་སྦྱོང་གི་དགོས་དམིགས་ངོ་སྤྲོད་གནང་། དེ་ནས་ཟབ་སྦྱོང་བ་རྣམས་ཕན་ཚུན་ངོ་སྤྲོད་གནང་རྗེས་ས་ར་མཐོ་སློབ་ཀྱི་སློབ་སྤྱིས་ཟབ་སྦྱོང་དང་འབྲེལ་བའི་གསུང་བཤད་གནང་། དེ་རྗེས་ཤེས་རིག་བཀའ་བློན་མཆོག་གིས་ཟབ་སྦྱོང་དང་འབྲེལ་བའི་གསུང་བཤད་གནང་བའི་ནང་། དང་ཐོག་ཁོང་ནས་དེ་རིང་ཟབ་སྦྱོང་ལ་ཕེབས་པའི་རྒན་ལགས་རྣམས་ལ་འཚམས་འདྲིའི་བཀྲ་ཤིས་བདེ་ལེགས་གསུང་རྗེས་ཁོང་རྣམས་ཕན་ཚུན་ངོ་སྤྲོད་བྱེད་སྐབས་ལོ་མང་ཞབས་ཕྱི་ཞུས་ཏེ་བཞུགས་མཁན་དེ་འདྲ་ཡང་འདུག་པར་དམིགས་བསལ་འཚམས་འདྲི་གནང་ཡོད།
ད་ལྟ་ང་ཚོའི་སྤྱི་ཚོགས་ནང་སོ་སོ་རང་མགོ་ཐོན་ལས་གཞུང་ལ་ཞབས་ཞུ་ཚད་ལྡན་ཞུ་མཁན་དཀོན་པའི་སྐབས་འདིར་༸གོང་ས
་མཆོག་ལའང་ཕྱག་རོགས་དགོས་པའི་གནས་སྐབས་འདིར་རྣམས་པ་ཚོས་དགེ་རྒན་གྱི་ལས་ཀ་རྒྱུན་སྐྱོང་གནང་བ་དེ་ནི་རླབས་ཆེན་བྱ་བ་ཞིག་ཡིན་པར་བརྟེན་ཐུགས་རྗེ་ཆེ་ཞུ་འདོད་བྱུང་། ཤེས་ཡོན་སྲིད་བྱུས་བཟོ་དགོས་དོན་གཙོ་བོ་ནི་བོད་པ་ན་གཞོན་དེ་དག་བོད་མི་ཚད་ལྡན་ཞིག་ཆགས་རྒྱུའི་ཆེད་དུ་ཡིན། ཡང་འགའ་ཤས་ཀྱིས་ཤེས་ཡོན་སྲིད་བྱུས་དེ་༸གོང་ས་མཆོག་གི་བཞེད་དགོངས་མིན་པའི་དཀྲོག་གཏམ་ཤོད་ཀྱི་འདུག དེར་བརྟེན་༸གོང་ས་མཆོག་གི་སྔ་ཕྱིའི་བཀའ་སློབ་རིམ་པར་ཕེབས་པ་དེ་དག་ལུང་འདྲེན་གནང་སྟེ་རྣམ་པ་ཚོས་དགོངས་པས་དཔྱད་ཞིབ་གནང་ན་མཁྱེན་གསལ་རེད། གང་ལྟར་རང་ཉིད་དགེ་རྒན་ཞིག་ཡིན་ཕྱིན་ཆད་ལ་ཕྲུ་གུ་ཚོ། བྱམས་བརྩེས་སྐྱོང་དགོས་པ་དང་། དེ་བཞིན་མ་འོངས་པར་བོད་འདི་ཞི་བའི་བསྟི་གནས་ཤིག་ལ་བསྒྱུར་ཐུབ་པ་དགོས་ན་ནང་བཅུད་ཀྱི་སེམས་ཅན་དེ་དག་ལ་འཚེ་བ་མེད་པ་དང་ཞི་བ་དགོས་པ་གལ་ཆེ་ཡིན་སྐོར་སོགས་གསུང་བཤད་གནང་གྲུབ་བསྟུན་དྲུང་ལས་སྐལ་བཟང་རིན་ཆེན་ལགས་ནས་ཐུགས་རྗེ་ཆེ་ཞུས་ཡོད། ཐེངས་འདིའི་ཉིན་བརྒྱད་རིང་གི་ཟབ་སྦྱོང་ལ་རྡ་སྟེང་བོད་ཁྱིམ་ཁྱབ་ཁོངས་དང་མ་སུ་རི་བོད་ཁྱིམ་ཁྱབ་ཁོངས་གཉིས་ཀྱི་གཙོས་གཞི་རིམ་འོག་མའི་དགེ་རྒན་གྲངས་ ༤༢ ཙམ་མཉམ་ཞུགས་གནང་ཡོད་པ་བཅས་ཀྱི་གནས་བསྡུས་སུ།
