དབུས་བོད་མིའི་སྒྲིག་འཛུགས་བཀའ་ཤག་གི་གལ་ཆེའི་དྲིལ་བསྒྲགས་ཡིག་ཆ།
སྔོན་གླེང་།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༢ ཟླ་ ༦ ཚེས་ ༢༨ ཉིན་ཨི་ཊ་ལིར་བོད་རིགས་མང་ཚོགས་བདུན་བརྒྱ་བརྒལ་བ་དང་། དེ་བཞིན་ཕྱི་ལོ་ ༢༠༡༢ ཟླ་ ༨ ཚེས་ ༣ ཉིན་ལ་དྭགས་བསོད་ནམས་གླི
ང་གཞིས་མི་དང་སློབ་ཕྲུག་བཅས་མང་ཚོགས་བདུན་སྟོང་བརྒལ་བར་མགོན་པོ་གང་ཉིད་ཀྱིས་ཆབ་སྲིད་དང་འཛིན་སྐྱོང་གི་སྐུ་དབང་རྩིས་སྤྲོད་མཛད་དེ་ལོ་གཅིག་འཁོར་ལ་ཉེ་བའི་སྐབས་འདིར་ཐུགས་བརྩེའི་བཀའ་སློབ་ཟབ་ཅིང་རྒྱས་པ་སྩལ་ཡོད་པའི་ནང་མགོན་པོ་མཆོག་ཐུགས་ཕམ་བྱུང་བའི་བཀའ་སློབ་ཕེབས་ཡོད་པ་རྣམས་ཞིབ་ཕྲ་གཤམ་དུ་ཡིག་ཐོག་ཡོད་པ་ནས་མཁྱེན་རྟོགས་ཡོང་རྒྱུ་ཡིན།
བོད་ཀྱི་ཉེ་རབས་ལོ་རྒྱུས་ནང་བྱུང་མྱོང་མེད་པའི་བོད་མི་རིགས་རྡོག་རྩ་གཅིག་སྒྲིལ་ཐུབ་པ་དང་། བོད་ཀྱི་ཆོས་དང་རིག་གཞུང་ཉེན་ཚབས་ཀྱི་གནས་ལས་སྐྱོབས་ཐུབ་པ་དེ་ནི་རང་རེའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་ལ་བརྟེན་ནས་བྱུང་བ་ཡིན།
རྒྱ་ནག་གུང་ཁྲན་གཞུང་གིས་མི་ཤུགས་དང་ནོར་ཤུགས། དམག་དོན་བཅས་གང་ཅིའི་ནུས་ཤུགས་རྣོ་ངར་ལྡན་པར་བརྟེན་ནས་བོད་མི་རིགས་ཀྱི་ཐོག་གནམ་གྱིས་ས་བརྡུངས་པ་ལྟ་བུའི་ཛ་དྲག་གི་གནོན་ཤུགས་འོག་གནས་པའི་སྐབས་འདིར་༸གོང་ས་༸སྐྱབས་མགོན་ཆེན་པོ་མཆོག་བོད་མི་ཡོངས་ཀྱིས་སྐྱབས་གནས་དང་རེ་ལྟོས་ཞུ་ཡུལ་ཉག་གཅིག་ཡིན་པ་འཛམ་གླིང་ཀུན་གསལ་དང་། བོད་སྤྱིའི་རྩ་དོན་ཆེད་སྐུ་ལུས་མེར་སྲེག་གིས་རང་སྲོག་བློས་གཏོང་གནང་མཁན་ད་བར་བོད་མི་ལྔ་བཅུ་ང་གཅིག་བྱུང་བ་ཚང་མ་གཅིག་མཐུན་གྱིས་༸གོང་ས་མཆོག་གི་ཞལ་མཇལ་གསུང་ཐོས་ཀྱི་རེ་འདུན་བྱེད་བཞིན་ཡོད་པ་དེ་འཛམ་གླིང་འདིའི་ཐོག་༸གོང་ས་མཆོག་ལས་ལྷག་པའི་སྐྱབས་ཡུལ་དང་རེ་ལྟོས་ཞུ་ཡུལ་མེད་པ་མཚོན་ཡོད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༡༦ ལ་ཕེབས་པ་ནས་བཟུང་མི་ལོ་དྲུག་ཅུའི་རིང་བོད་རྒྱལ་ཁབ་དང་མི་རིགས་འདིར་བྱམས་གཟིགས་ཆེན་པོས་སྐྱོང་གནང་མཛད་པའི་སྐུ་དྲིན་ལ་བསམ་ཤེས་མེད་པར་མི་ཉུང་ཤས་ཤིག་གིས་སྤྱི་ཚོགས་ཁྲོད་བཙན་བྱོལ་ནང་གཞུང་མེད་པར་གྱུར་བ་དང་རེ་བ་རྒྱག་ས་མེད་ལུགས་ཀྱིས་ཁུངས་མེད་སྐད་ཅོར་བརྒྱབ་ནས་འགན་ཁུར་མེད་པའི་གཏམ་འཆལ་སྤེལ་དང་སྤེལ་མུས་སུ་ཡོད་པ་འདིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐུགས་ཕམ་ཡོང་གཞི་བཟོས་པ་ནི་འཇིག་རྟེན་མི་ཆོས་ཀྱི་ཆ་ནས་དྲིན་ལན་ལོག་འཇལ་དང་། དམ་པའི་ལྷ་ཆོས་ནས་བཤད་ན་ལས་ངན་ཚབས་པོ་ཆེ་བསགས་པ་ཞིག་ཡིན་པ་བརྗོད་མི་དགོས་པ་དང་། ལྷག་པར་ཐུགས་ཕམ་འབྱུང་གཞིའི་གནད་དོན་དེ་རིགས་ནི་༸རྒྱལ་བའི་སྐུ་ཕྱྭ་དང་ཐད་ཀར་འབྲེལ་བ་ཡོད་པར་བརྟེན་བཀའ་སློབ་ཇི་ཕེབས་ཀྱི་གནད་དོན་རྣམས་ལ་བོད་མི་ཚང་མས་ཐུགས་སྣང་དགོས་རྒྱུ་ཧ་ཅང་གལ་འགངས་ཆེན་པོ་ཡིན།
སྤྱིར་བཙན་བྱོལ་བོད་གཞུང་ཞེས་པའི་ཐ་སྙད་འདི་ཕྱིར་བསྡུ་གནང་སྟེ་ལོ་གཅིག་ལྷག་ཙམ་སོང་ཞིང་མི་མང་རྣམས་ལྷིང་འཇགས་སུ་གནས་ཡོད་པའི་སྐབས་འདིར་མི་ཉུང་ཤས་ཤིག་གིས་ད་དུང་སྐད་ལོག་རྒྱག་པ་ནི་ཆེས་ཐབས་སྡུག་གི་གནས་ཚུལ་ཞིག་ཡིན། བཙན་བྱོལ་བོད་གཞུང་ཞེས་པའི་ཐ་སྙད་འདི་བཙན་བྱོལ་ནང་དགོས་དབང་གིས་འགྱུར་བ་གཏོང་དགོས་བྱུང་བ་ཞིག་ཡིན་པ་ལས་ཕྱི་ལོ་ ༡༦༤༢ ལོར་༸གོང་ས་ལྔ་པ་ཆེན་པོ་ནས་བཟུང་༸རྒྱལ་མཆོག་རིམ་བྱོན་གྱིས་སྐྱོང་གནང་མཛད་པའི་སྲིད་གཞུང་གི་རྒྱུན་དེ་ད་དུང་མུ་མཐུད་གནས་མུས་ཡིན་པར་མ་ཟད། ༸རྒྱལ་མཆོག་སྐུ་ཕྲེང་བདུན་པ་ཆེན་པོས་ཕྱི་ལོ་ ༡༧༥༡ ལོར་བོད་གཞུང་བཀའ་ཤག་གི་བཀའ་ཐམ་སྲིད་ཞི་བདེ་སྐྱིད་མ་ཐུགས་སྨོན་དང་བཅས་བཀའ་ཤག་ལ་སྩལ་པ་ནས་བཟུང་དབང་ལུང་ཁྱབ་བསྒྱུར་གནང་བཞིན་ཡོད་པ་ལྟར་ཕྱི་ལོ་ ༢༠༡༡ ཟླ་ ༨ ཚེས་ ༨ ཉིན་བཀའ་ཁྲིའི་དམ་འབུལ་མཛད་སྒོའི་ཐོག་བཀའ་ཁྲི་གོང་མ་ནས་རྩིས་བཞེས་གནང་བ་བཞིན་ད་ལྟ་ཕྱག་ལེན་བསྟར་མུས་སུ་ཡོད་པ་འདི་ནས་གཞུང་དེ་རྒྱུན་མཐུད་གནས་བཞིན་ཡོད་པ་གསལ་་སྟོན་བྱས་ཡོད། ལྷག་པར་དམ་འབུལ་མཛད་སྒོའི་ཐོག་བཀའ་སློབ་ཕེབས་པའི་ནང་། ངོས་རང་ལོ་བཅུ་དྲུག་སྐབས་སྲིད་སྐྱོང་སྟག་བྲག་རིན་པོ་ཆེའི་སྐུ་མདུན་ནས་ཆབ་སྲིད་ཀྱི་དབང་ཆ་རྩིས་ལེན་ཞུས་པ་ཡིན། ད་ཆ་ལོ་དྲུག་ཅུ་ཕྱིན་རྗེས་མང་གཙོའི་ཐོག་ནས་འོས་འདེམས་བྱས་ཏེ་ཐོན་པའི་བློ་བཟང་སེང་གེ་ལགས་སྲིད་སྐྱོང་གསར་པ་ཆགས་ཡོད། མང་གཙོ་མཚན་ཉིད་ཚང་བའི་ཐོག་ནས་འོས་འདེམས་བྱས་ཏེ་ཐོན་པའི་འགོ་ཁྲིད་སྲིད་སྐྱོང་ལ་དབང་ཆ་རྩིས་འབུལ་ཞུ་བ་འདི་དངོས་གནས་རིང་ནས་སྙིང་དུ་བརྣག་པའི་འདོད་པའི་དོན་ཟེར་བའི་དོན་དག་གཅིག་འདི་ཆགས་ཡོད། ཅེས་བཀའ་སློབ་ཕེབས་པ་དེ་ནས་ཀྱང་གསལ་པོ་ཡོད། བཀའ་བློན་ཁྲི་པ་མཆོག་གིས་དབུ་ཁྲིད་པའི་བོད་མིའི་སྒྲིག་འཛུགས་འདིར་༸གོང་ས་མཆོག་གིས་ཐུགས་ཀྱི་བྱིན་རླབས་དང་། བོད་ཕྱི་ནང་གཉིས་ཀྱི་རྒྱ་ཆེའི་མང་ཚོགས་ངོས་ནས་ཡིད་ཆེས་བློ་གཏད་ཞུས་དང་ཞུ་མུས་ཡིན་པ་ཕྱི་གསལ་ནང་གསལ་ཡིན། དཔེར་ན། བོད་ནང་བཀའ་བློན་ཁྲི་པར་བསྟོད་པ་དང་སྨོན་ལམ། དགའ་བསུ། བསང་གསོལ། བསྟོད་གླུ་སོགས་ཕུལ་ཡོད་པ་ནས་གཞིས་ལུས་རྒྱ་ཆེའི་མང་ཚོགས་ཀྱིས་ཁྲིམས་མཐུན་བདག་དབང་དང་མང་གཙོ་ཚད་ལྡན་གྱི་བཙན་བྱོལ་བོད་མིའི་སྒྲིག་འཛུགས་ཤིག་ལ་ངོས་འཛིན་གསལ་པོ་གནང་ཡོད། དེ་བཞིན་བོད་མིའི་སྒྲིག་འཛུགས་ཀྱི་མཛད་གཙོ་རྣམས་ཕྱིའི་རྒྱལ་ཁབ་ཀྱི་གནད་ཡོད་མི་སྣ་མང་དག་ཅིག་དང་མཇལ་འཕྲད་སྐབས་ཁོང་རྣམ་པས་བོད་མིའི་ཆབ་སྲིད་དབུ་ཁྲིད་ཀྱི་རྣམ་པར་ངོས་ལེན་གསལ་པོ་གནང་བཞིན་པ་དང་། གཞན་ཡང་རྒྱ་གར་དང་ཕྱི་སྡོད་རྒྱ་སྐད་གསར་འགྱུར་གྱིས་གཙོས་འཛམ་གླིང་ཐོག་སྙན་གྲགས་ཅན་གྱི་གསར་འགྱུར་བརྒྱུད་ལམ་མང་ཆེ་བས་དུས་རྒྱུན་དུ་བོད་མིའི་སྒྲིག་འཛུགས་འདི་ནི་བོད་ཕྱི་ནང་གཉིས་ཀྱི་ངོ་ཚབ་མཚོན་པའི་གཞུང་ཞིག་གི་རྣམ་པར་ངོས་འཛིན་གསལ་པོ་བྱས་དང་བྱེད་མུས་ཡིན་པ་བཅས་བཙན་བྱོལ་ནང་ཐ་སྙད་ཙམ་དུ་དགོས་དབང་གིས་བཙན་བྱོལ་བོད་གཞུང་ཞེས་བརྗོད་ཀྱི་མེད་ཀྱང་དོན་དམ་དུ་ངོས་འཛིན་གསལ་པོ་ཡོད་པ་ཞིག་ཆགས་ཡོད། གཞན་ཡང་ཨ་རི་དང་ཡུ་རོབ། ཉི་ཧོང་གིས་གཙོས་གྲོས་ཚོགས་ཁག་ནས་གྲོས་ཆོད་དང་གླེང་སློང་གནང་བ་སོགས་ནས་ཀྱང་མང་གཙོ་ཚད་ལྡན་གྱི་བོད་མིའི་སྐུ་ཚབ་མཚོན་ཐུབ་པའི་སྒྲིག་འཛུགས་ཤིག་ལ་ངོས་ལེན་གནང་ཡོད།
སྐབས་འདིར་དྲན་སྐུལ་ཞུ་རྒྱུར། སྔ་ལོ་བཀའ་ཁྲི་མཆོག་གིས་དམ་འབུལ་གསུང་བཤད་ནང་། སྲིད་ཕྱོགས་ནས་ལོ་རྒྱུས་རང་བཞིན་ལྡན་པའི་༸གོང་ས་ཏཱ་ལའི་བླ་མ་མཆོག་གི་རླབས་ཆེན་སྒྲིག་འཛུགས་འདིའི་ཁྲིམས་མཐུན་ངོ་བོ་རྒྱུན་མཐུད་རྒྱུའི་གོ་སྐབས་ཐོབ་པ་ནི། ང་མི་སྒེར་གྱི་བྱས་རྗེས་མ་ཡིན་པར། བོད་གཞིས་བྱེས་གཉིས་ཀྱི་མི་རབས་གོང་མ་ཚོའི་དཀའ་སྤྱད་སྙིང་རུས་དང་བློས་བཏང་ལས་བྱུང་བའི་འབྲས་བུ་ཞིག་ཡིན་པར་ངོས་འཛིན་ཞུ་གི་ཡོད། དེར་བརྟེན། ཇི་སྲིད་བོད་ནང་རང་དབང་བསྐྱར་གསོ་མ་བྱུང་གི་བར། མེས་པོ་གོང་མ་ཚོས་བཞག་པའི་བོད་དོན་བདེན་པའི་འཐབ་རྩོད་མུ་མཐུད་སྲ་བརྟན་རྒྱུན་གནས་ཡོང་ཐབས་དང༌། ༸གོང་ས་མཆོག་བོད་ནང་༸ཞབས་སོར་འཁོད་ཐུབ་པ་ཡོང་ཆེད་འབད་བརྩོན་སྒོ་ཀུན་ནས་ཞུ་རྒྱུའི་ཁས་ལེན་ཞུ་རྒྱུ་ཡིན། ཞེས་གསུངས་ཡོད།
དེས་ན་རང་རེའི་རྒྱ་ཆེའི་མང་ཚོགས་ནས་དུས་དང་རྣམ་པ་ཀུན་ཏུ་གཞན་ཟེར་ལ་དབུ་མ་འཁོར་བར་གཞིས་བྱེས་མཉམ་འཛོམས་དང་བོད་རང་དབང་སླར་གསོ་འབྱུང་ཐབས་སུ་རང་ཚུགས་བརྟན་པོ་བཟུང་སྟེ་བོད་མི་རིགས་ཆགས་འཇིག་གི་གནས་སྟངས་ཧ་ཅང་གཉན་འཕྲང་ཅན་གྱི་དུས་སྐབས་འདིར་མགོན་པོ་མཆོག་གི་ཅི་གསུང་བཀའ་སྒྲུབ་ཞུ་རྒྱུ་༸རྒྱལ་བ་དགྱེས་པའི་མཆོད་པའི་ནང་ནས་མཆོག་ཏུ་གྱུར་པ་ཡིན་པས་དེ་ལུགས་དགོངས་འཇགས་ཐོག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་མཛད་པའི་ལམ་བཟང་དེའི་སྟེང་ཤར་སྐྱོད་ཐུབ་པ་གནང་སྟེ་མི་ཉུང་ཤས་ཀྱིས་བདེན་དོན་སྤུ་ཙམ་མེད་པའི་སྒྲོ་བཏགས་འཆལ་གཏམ་ཀྱི་རྗེས་སུ་མ་འབྲངས་བར་ཐུགས་ཕམ་ཡོང་གཞི་དེ་རིགས་རྩ་བ་ནས་མི་ཡོང་བ་དགོས་གལ་ཤིན་ཏུ་ཆེ་བ་བཅས།།
བཀའ་ཤག་ནས ༢༠༡༢ ཟླ་ ༩ ཚེས་ ༥ ལ
བཀའ་སློབ་རྒྱས་པ་གཟིགས་ཆེད་འདིར་གནོན།
