༢༠༡༢ ཟླ་ ༨ ཚེས་ ༢༨ རེས་གཟའ་མིག་དམར།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༨ ཚེས་ ༢༧ ཉིན་གྱི་བོད་ནང་གི་སྔ་དྲོ་ཆུ་ཚོད་ ༨།༣༠ ཙམ་ལ་བོད་མདོ་སྨད་རྔ་པ་རྫོང་མཁར་དུ་ཡོད་པའི་ཀིརྟི་དགོན་པའི་ཤར་ཕྱོགས་ཀྱི་སྒོ་ཆེན་འགྲམ་ནས་རྔ་པ་ཀིརྟི་དགོན་པའི་རང་ལོ་ ༡༨ ཙམ་ཡིན་པ་དགེ་འདུན་པ་བློ་བཟང་སྐལ་བཟང་ལགས་དང་། རྔ་པ་རྫོང་གཅའ་ཞང་རྭ་རུ་བའི་ཚེ་པོ་ཚང་གི་བུ་རང་ལོ་ ༡༧ ཙམ་ཡིན་པ་(མི་སྐྱ་)དམ་ཆོས་ལགས་གཉིས་ཀྱིས་རང་ལུས་མེར་སྲེག་བཏང་སྟེ་རྒྱ་གཞུང་གིས་བོད་ཐོག་འཛིན་པའི་མི་རིགས་རྩ་མེད་དུ་གཏོང་རྒྱུའི་སྲིད་བྱུས་ལ་ཞི་རྒོལ་སྐད་འབོད་གནང་འདུག སྐབས་དེར་ཐག་རིང་ཙམ་ནས་མཐོང་འདུག་པར་ཞིག་ན་ཁོང་གཉིས་གོམ་པ་ཉི་ཤུ་ཙམ་ལ་མེ་འབར་བཞིན་དུ་རྒྱུག་ཡོད་པ་དང་མཐར་ཐང་ལ་འགྱེལ་ཡོད་འདུག མེ་ལྕེའི་དབུས་ནས་ཀི་སྒྲ་ཙམ་ལས་གཞན་འབོད་ཚིག་ག་རེ་བསྒྲགས་ཡོད་མེད་གསལ་པོ་ཤེས་རྟོགས་ཐུབ་མེད། དེ་རྗེས་ཉེན་རྟོག་པ་སོགས་བསླེབས་ཏེ་ཁོང་གཉིས་ཀྱི་ལུས་ལ་ཡོད་པའི་མེ་བསད་ནས་རྔ་པའི་སྨན་ཁང་དུ་ཅུང་ཙམ་རིང་བཞག་རྗེས་འབར་ཁམས་ལ་ཁྲིད་འདུག ཉིན་དེའི་དགོང་མོ་ཤེས་རྟོགས་བྱུང་བར་ཁོང་གཉིས་ཀ་འདས་གྲོངས་སུ་གྱུར་ཡོད་པ་དང་། ཁོང་གཉིས་ཀྱི་སྐུ་ཕུང་འབར་ཁམས་ལ་ཁྱེར་ཡོད་ཅིང་ནང་མིར་སྤྲད་ཡོད་མེད་ཤེས་རྟོགས་ཐུབ་མེད། གནས་ཚུལ་བྱུང་རྗེས་དགེ་འདུན་པ་བློ་བཟང་སྐལ་བཟང་ལགས་ཀྱི་གྲྭ་ཤག་གཅིག་པ་དགེ་འདུན་པ་བློ་བཟང་དཔལ་ལྡན་ཉེན་རྟོག་པས་ཁྲིད་འདུག བློ་བཟང་སྐལ་བཟང་གི་ཕ་མིང་ལ་ཚེ་ཁོ་རྡོ་རྗེ་དང་། མ་མིང་སངས་རྒྱས་སྒྲོན། སྤུན་ཆེ་བ་ཚེ་ཁོ་བཀྲ་ཤིས་བཅས་ནང་མི་གསུམ་ཡོད་འདུག
གཅའ་ཞང་རྭ་རུ་བའི་ཚེ་པོ་ཚང་གི་དམ་ཆོས་ཀྱི་ཕ་མིང་ལ་མདོ་ཤིས་བློ་བྷེ་དང་། མ་མིང་ལ་ཚེ་པོ་ཡིན་ཞིང་ཕ་མ་གཉིས་ཁ་ཁ་བྱས་ཏེ་ཁོང་ཨ་མ་དང་མཉམ་དུ་ཡོད་ཅིང་། ཤུལ་དུ་ཨ་མ་གཅིག་པུ་ལས་ནང་མི་གཞན་མེད། ཁོང་ནི་དགེ་འདུན་པ་བློ་བཟང་སྐལ་བཟང་གི་ཚ་བོ་དང་། འདི་ལོའི་ཕྱི་ཟླ་ ༢ ཚེས་ ༡༡ ཉིན་རྔ་པའི་མ་མའི་བཙུན་དགོན་ནས་རང་ལུས་མེར་སྲེག་གིས་འདས་གྲོངས་སུ་གྱུར་པའི་རྒྱལ་གཅེས་མ་བཙུན་མ་བསྟན་འཛིན་ཆོས་སྒྲོན་ལགས་ཀྱི་ཕ་མ་གཅིག་པའི་སྤུན་ཆུང་བ་ཡིན་ཞིང་། བསྟན་འཛིན་ཆོས་སྒྲོན་ཨ་ཕའི་ཁྱིམ་དུ་ཡོད་སྟབས་མིང་སྲིང་གཉིས་ཁྱིམ་ཁ་ཁ་བྱས་ནས་ཡོད། ཁོང་དེ་སྔོན་རྔ་པ་ཀིརྟི་དགོན་པར་གྲྭ་པ་བྱས་ཤིང་རྗེས་སུ་སྐྱ་སར་བབ་ནས་ཨ་མ་དང་མཉམ་དུ་འབྲོག་ལས་བྱས་ནས་བསྡད་འདུག འབྲོག་སྡེ་རྭ་རུ་བ་ནི་རྔ་པ་རྫོང་མཁར་གྱི་ཤར་ཕྱོགས་སུ་སྤྱི་ལེ་ ༧༠ ཙམ་གྱི་སར་ཡོད་ལ། ཕྱི་ལོ་ ༡༩༥༩ ལོའི་ཡར་སྔོན་དུ་རྨེའུ་རུ་གཤོག་ཀ་བདུན་གྱི་ནང་ཚན་གྱི་གཤོག་ཀ་གཅིག་ཡིན་མོད། རྗེ་སུ་རྒྱ་གཞུང་གིས་བཅད་བཟུང་བྱས་རྗེས་གཅའ་ཞང་ཟེར་བའི་ཁོངས་སུ་བསྡུས་ཡོད་པའི་འབྲོག་སྡེ་ཞིག་ཡིན་འདུག་པ་བཅས།།
