༢༠༡༢ ཟླ་ ༨ ཚེས་ ༢༢ རེས་གཟའ་ལྷག་པ།
༄༅། །འདི་གར་བོད་མི་མང་སྤྱི་འཐུས་ལྷན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༨ ཚེས་ ༡༧ ཉིན་ས་གནས་གྲོས་ཚོགས་ཀྱི་ཚོགས་གཙོས་དབུས་འཐུས་མི་རྣམ་པ་དང་། ས་གནས་འགོ་འཛིན། རང་བདེན་ཚོགས་ཆུང་གི་ཚོགས་མི་རྣམ་པ། སྤྱི་མི་བརྒྱ་དཔོན་དང་ལས་བྱེད་བཅས་སྔ་དྲོ་ཆུ་ཚོད་ ༧ པའི་ཐོག་རང་ལུགས་ཆས་གོས་གཟབ་མཆོར་ལེགས་པར་གྱོན་ཏེ་དཔལ་རབ་གླིང་ནས་ཐོན་ཏེ་ཆུ་ཚོད་ ༨་༣༠ ཐོག་དྭགས་པོ་བཤད་སྒྲུབ་གླིང་གྲྭ་ཚང་དུ་འབྱོར། དེར་བདེན་པའི་མེ་ལྕེ་མཁན་རིན་པོ་ཆེ་མཆོག་ལ་བརྒྱུད་སྤྲོད་ཀྱིས་དགོན་པར་གདན་འདྲེན་ཞུས། དགོན་པའི་ལས་སྣེ་དགེ་འདུན་རྣམ་པ་དང་། དགེ་ལས་སློབ་ཕྲུག་ཡོངས་རྫོགས་དགོན་པའི་མདུན་ཐང་དུ་འདུ་འཛོམས་རྗེས་ས་གནས་འཐུས་ཚོགས་ཀྱི་ཚོགས་གཙོས་མར་མེ་ཞལ་འབྱེད་དང་སྦྲགས་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ་རྒྱལ་གཅེས་པ་ཕོ་མོ་རྣམས་ཀྱི་ཆེད་ངག་བཅད་དང་གུས་འདུད་སྐར་མ་གཅིག་ཞུས། དེ་རྗེས་ས་གནས་འཐུས་ཚོགས་ཀྱི་ཚོགས་གཞོན་གྱིས་ཧིན་སྐད་ཐོག་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་སྐོར་གཏམ་བཤད་གནང་། དེ་བཞིན་ས་གནས་འཐུས་ཚོགས་ཀྱི་ཚོགས་གཙོ་དང་ས་གནས་འགོ་འཛིན་གྱིས་རིམ་བཞིན་གཏམ་བཤད་གནང་མཚམས་བདེན་ཚིག་སྨོན་ལམ་གསུང་འདོན་དང་ས་རྟགས་བསྡུ་རུབ་རྗེས་མཁན་རིན་པོ་ཆེ་མཆོག་གིས་བདེན་པའི་མེ་ལྕེ་ས་འཐུས་ཚོགས་གཙོར་བརྒྱུད་སྤྲོད་གནང་། དེ་ནས་པ་ཀུལ་ལག་ཤེས་སློབ་གྲྭར་ཐོན། སློབ་གྲྭའི་རྒྱལ་སྒོ་ནས་རུ་བསྟར་གྱིས་བདེན་པའི་མེ་ལྕེ་སློབ་གྲྭའི་འགན་འཛིན་ལ་བརྒྱུད་སྤྲོད་གནང་སྟེ་ཚོགས་ཁང་དུ་གདན་འདྲེན་ཞུས་པར་སྐུ་མགྲོན་གཙོ་བོ་ཀེཊ་རེན་མཐོ་སློབ་ཀྱི་སློབ་སྤྱི་སྐུ་ཞབས་གན་ཤྱམ་ཀ་པུར་(Mr.Ghanshyam Kapoor, Principal of Katrain High School)མཆོག་གིས་མར་མེ་ཞལ་འབྱེད་གནང་བ་དང་སྦྲགས་ཆོས་དགེ་དབུ་བཞུགས་ཀྱིས་དགེ་ལས་སློབ་མ་རྣམས་ནས་༸རྒྱལ་བའི་ཞབས་བརྟན་དང་བདེན་ཚིག་སྨོན་ལམ་གསུང་འདོན་གནང་། རྒྱལ་གཅེས་པ་རྣམས་ཀྱི་ཆེད་གུས་འདུད་དང་ངག་བཅད་སྐར་མ་གཅིག་ཞུས་རྗེས་སློབ་གྲྭའི་རྩིས་པས་ཧིན་སྐད་ཐོག་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་ངོ་སྤྲོད་གནང་། དེ་ནས་རིམ་བཞིན་ས་གནས་འཐུས་ཚོགས་ཀྱི་ཚོགས་གཙོ་དང་ས་གནས་འགོ་འཛིན་གྱིས་གཏམ་བཤད་གནང། དེ་རྗེས་འཕགས་བོད་གཉིས་ཀྱི་རྒྱལ་གླུ་བཏང་སྟེ་ས་རྟགས་བསྡུ་རུབ་ཞུས།
དེ་ནས་སྤང་སྒང་དགོན་པར་གྲྭ་བཙུན་རྣམས་འདུ་འཛོམས་ཐོག་ས་གནས་འཐུས་ཚོགས་ཀྱི་ཚོགས་གཙོ་དང་འགོ་འཛིན་ནས་ལས་འགུལ་དང་འབྲེལ་བའི་གཏམ་བཤད་གནང་སྟེ་ས་རྟགས་བསྡུ་རུབ་ཞུས་ཏེ་ཉིན་བཞི་པའི་ལས་འགུལ་མཚམས་འཇོག་གནང། ཕྱི་ལོ་ ༢༠༡༢ ཟླ་ ༨ ཚེས་ ༡༨ སྔ་དྲོ་ལས་བྱེད་རྣམས་ཆུ་ཚོད་ ༧་༣༠ ཐོག་དཔལ་རབ་གླིང་ནས་ཐོན་ཏེ་ཀུ་ལུར་འབྱོར། ཆུ་ཚོད་ ༨་༣༠ ཐོག་མཛད་རིམ་སྔོན་བསྒྲིགས་ལྟར་ཀུ་ལུ་རྫོང་ཁྱབ་ཁོངས་དགེ་འདུན་པ་དང་བཙུན་མ། སློབ་གྲྭའི་དགེ་ལས་དང་སློབ་ཕྲུག དེ་བཞིན་མི་མང་བཅས་ཀྱིས་རང་ལུགས་ཆས་གོས་གཟབ་མཆོར་སྤྲད་དེ་རྡལ་པུར་ཐང་དུ་འཛོམས། ཆུ་ཚོད་ ༩་༠༠ ཐོག་སྐུ་མགྲོན་གཙོ་བོ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཤིབ་ཅནྡ་ཋ་ཀུར་(ShivChand Thakur) མཆོག་གིས་མར་མེ་ཞལ་འབྱེད་གནང། དེ་ནས་འཕགས་བོད་གཉིས་ཀྱི་རྒྱལ་གླུ་བཏང་རྗེས་རྒྱལ་གཅེས་པ་ཕོ་མོ་ཡོངས་ཀྱི་ཆེད་གུས་འདུད་དང་ངག་བཅད་སྐར་མ་གཅིག་ཞུས། ས་འཐུས་ཚོགས་གཞོན་གྱིས་ཧིན་སྐད་དང་། དེ་ནས་ས་འཐུས་ཚོགས་གཙོ་དང་ས་གནས་འགོ་འཛིན་གྱིས་གཏམ་བཤད་གནང་གྲུབ་མཚམས་སྐུ་མགྲོན་གཙོ་བོ་མཆོག་གིས་གཏམ་བཤད་གནང། དེ་རྗེས་བདེན་ཚིག་སྨོན་ལམ་གསུང་འདོན་དང་སྐུ་མགྲོན་གཙོ་བོ་མཆོག་གིས་རྒྱབ་སྐྱོར་ས་རྟགས་བསྐྱོན། ས་གནས་འགོ་འཛིན་ནས་བརྙན་འཕྲིན་ ANI, My TV, Apna Channel ལ་སོགས་པའི་དྲི་བ་ཁག་ལ་ལན་འདེབས་གནང། དེ་ནས་ལས་སྣེ་རྣམས་ཀུ་ལུ་གྲོང་ཁྱེར་དུ་ས་རྟགས་བསྡུ་རུབ་ཞུས་པ་དང་འབྲེལ་བདེན་པའི་མེ་ལྕེ་སྐོར་བསྐྱོད་གནང་། ཕྱི་དྲོ་ཆུ་ཚོད་ ༥ པའི་ཐོག་སྨོན་ལམ་གསུང་འདོན་གནང་ཡོད་པ་བཅས།།
