༢༠༡༢ ཟླ་ ༨ ཚེས་ ༡༣ རེས་གཟའ་ཟླ་བ།
གླུ་པ་མཆོག་གསལ་ལགས།
༄༅། །འདི་གར་ཕྱི་ལོ་ ༢༠༡༢ ཟླ་ ༨ ཚེས་ ༡༣ ཉིན་བཏང་གནས་ནང་འཁོད་དོན། ཁམས་ནགས་ཤོད་འབྲི་རུ་རྫོང་འབྲི་རུ་ཤང་བཀྲ་ཤིས་དར་ལུང་གྲོང་ཚོ་ནས་ཡིན་པའི་གླུ་པ་མཆོག་གསལ་ལགས། ཕྱི་ཟླ་ ༧ པའི་ཚེས་ ༢༩ ཉིན་གྱི་ཕྱེད་ཡོལ་ཆུ་ཚོད་བཅུ་པ་ཙམ་ལ་གློ་བུར་དུ་མཚོ་སྔོན་ཟི་གླིང་གྲོང་ཁྱེར་གྱི་དྲྭ་ཁང་ཞིག་ནང་ཡི་གེ་གཏོང་བཞིན་པའི་སྐབས་འཛིན་བཟུང་བྱས་པའི་གནས་ཚུལ་ཐོན་འདུག ཁོང་འཛིན་བཟུང་བྱེད་དགོས་པའི་གནད་དོན་གཙོ་བོ་ནི། ལོ་ཤས་སྔོན་ནས་ཁོང་གིས་གླུ་གཞས་འོད་སྡེར་བཞི་ཙམ་འགྲེམས་སྤེལ་བྱས་ཡོད་པའི་འོད་སྡེར་དང་པོ། (གདོང་དམར་བོད་པའི་རྨི་ལམ) གཉིས་པ། (སྤུན་ཟླའི་འོས་འགན)། གསུམ་པ་(སྤུན་ཟླའི་བརྩེ་སེམས)བཞི་པ་(གངས་ཕྲུག་)ཅེས་པའི་འོད་སྡེར་བཞི་བཏོན་ཡོད་ཅིང་། ད་ལྟའང་བོད་ཀྱི་གཞས་པ་གྲགས་ཅན་འགའ་དང་མཉམ་རུབ་ཀྱིས་ཁ་བའི་རྣམ་ཤེས་ཞེས་པའི་འོད་སྡེར་ཞིག་ཀྱང་མཉམ་འདོན་བྱ་རྒྱུའི་གྲྭ་སྒྲིག་བྱེད་བཞིན་པའི་སྐབས་ཡིན་འདུག
འོད་སྡེར་དང་པོའི་ནང་༸རྒྱལ་བ་རིན་པོ་ཆེ་མཆོག་ལ་བསྟོད་ཚིག་དང་མི་རིགས་ལར་ཞེན་མཚོན་ཆེད་ཀྱི་གཞས་ཚིག་མང་པོ་ཐོན་སྟབས། འོད་སྡེར་འདོན་ཐེངས་གཉིས་པ་དང་གསུམ་པ་སོགས་ནི་ལྷ་ས་དང་ནགས་ཤོད་འབྲི་རུ་རྫོང་སོགས་སུ་ཚོང་སྒྱུར་མི་ཆོག་པའི་དམ་བསྒྲགས་ཤུགས་ཆེར་བྱས་ཏེ། ལྷ་ས་ཚོང་ཁང་ཞིག་ནས་འདོན་ཐེངས་གསུམ་པ་འོད་སྡེར་གྲངས་མང་ཞིག་ཀྱང་རྒྱ་གཞུང་གི་ཉེན་རྟོག་པས་ཚོང་སྒྱུར་མི་ཆོག་པའི་སྡིགས་ར་སྐུལ་ཞོར་བཙན་འཕྲོག་བྱས་ཡོད་འདུག
འོད་སྡེར་བཞི་པ་ནགས་ཤོད་འབྲི་རུ་རྫོང་དུ་ཟ་ཁང་ཞིག་ལ་སྟོན་བཞིན་པའི་སྐབས་སུ་ཉེན་རྟོག་རུ་ཁག་གློ་བུར་དུ་བསླེབས་ཏེ་འོད་སྡེར་ཕྲོགས་པ་མ་ཟད། ཟ་ཁང་བདག་པོ་ལའང་རྒྱ་སྒོར་ལྔ་བརྒྱ་ཆད་པ་བཅད་ཡོད་འདུག གཞས་གཏོང་མཁན་མཆོག་གསལ་ལགས་ནི་གླུ་པ་ཞིག་གི་མིང་འོག་ཏུ་འཛུལ་ནས་སྙན་པོ་དབྱངས་རྟའི་བརྒྱུད་ལམ་ནས་མི་དམངས་ལ་བརྒྱུད་བསྐུལ་བྱས་ཏེ་སྤྱི་ཚོགས་བརྟན་ལྷིང་མེད་པ་བཟོ་མཁན་གྱི་མངོན་པར་མི་གསལ་བའི་ཉེས་ཅན་ཞིག་ཏུ་བརྩིས་ཏེ། ཕྱིན་ཆད་གཞས་གཏོང་མི་ཆོག་པའི་བསྒྲགས་གཏམ་སྤེལ་བ་དང་། ཁོ་པ་གང་དུ་ཡོད་མེད་འདྲི་རྩད་ཐེངས་མང་བྱས་པས། གཞས་པ་ཁོང་ཕ་ཡུལ་ཁམས་ནགས་ཤོད་དུ་ཕྱིར་ལོག་བྱུང་འཕྲལ་འཛིན་བཟུང་བྱ་རྒྱུར་གཏན་ཁེལ་སྟབས། དེ་ནས་ཁོང་དུས་ཡུན་གང་ཙམ་རིང་ཕ་ཡུལ་དུ་ལོག་མ་ཐུབ་པར་ལོ་ངོ་གཉིས་ཙམ་རིང་ལ་ཉེན་ཡོལ་ཚོད་དུ་ཟི་ལིང་དང་རྒྱ་ནག་ཁྲིན་ཏུའུ་ཕྱོགས་སུ་གནས་སྡོད་བྱས་ཡོད་འདུག སྤྱིར་བཏང་རྒྱ་གཞུང་རྩ་ཁྲིམས་ནང་ཆབ་དཔལ་གང་ལ་ནོར་འཁྲུལ་ཤོར་བའི་མི་ཞིག་བཙོན་འཇུག་བྱས་ནས་ཆུ་ཚོད་ཉེར་བཞིའི་ནང་ཚུད་ནང་མི་ལ་བརྡ་ལན་བསྐྱལ་དགོས་པ་རྩ་ཁྲིམས་ནང་གསལ་ཁ་ཡོད་རུང་། མཆོག་གསལ་ལགས་འཛིན་བཟུང་བྱས་ནས་ཞག་མ་ཉི་ཤུ་ཙམ་ཕྱིན་ཀྱང་ནང་མི་ཉེ་འབྲེལ་སུས་ཀྱང་གར་ཡོད་ཤེས་རྟོགས་བྱུང་མེད་པ་བཅས།།
