༢༠༡༢ ཟླ་ ༨ ཚེས་ ༡༣ རེས་གཟའ་ཟླ་བ།
༄༅། །རྒྱ་ནག་གཞུང་གི་ཤེས་རིག་ལས་ཁུངས་ཀྱིས་མཐུན་འགྱུར་འོག་འཛམ་གླིང་རྒྱལ་ཁབ་འདྲ་མིན་ནང་ཁུང་ཙི་བསྟི་གནས་ཁང་ Confucius Institute ཟེར་བ་གྲངས་ ༣༠༠ བཙུགས་ཡོད་པའི་ཁོངས་ནས་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་ནང་རྟེན་གཞི་བྱས་པའི་སི་ཌི་ནི་གཙུག་ལག་སློབ་ཁང་གི་ཁུང་ཙི་བསྟི་གནས་ཁང་ Sydney University`s Confucius Institute ཞེས་པས་གོ་སྒྲིག་འོག་རེས་གཟའ་ལྷག་པའི་ཉིན་བོད་རིག་པའི་མཁས་དབང་ཡིན་ཟེར་བའི་རྒྱ་རིགས་ཊང་ཡུན་ Zhang Yun གྱིས་བོད་དོན་དྲིལ་བསྒྲགས་ལོག་བཤད་ཀྱི་གཏམ་བཤད་སྤེལ་འཆར་ཡོད་པ་དེར་ཨོ་སི་ཊོ་ལི་ཡའི་ནང་རྟེན་གཞི་བྱས་པའི་བོད་དོན་རྒྱབ་སྐྱོར་བ་དང་རྒྱལ་སྤྱིའི་ཤེས་ཡོན་མི་སྣས་སྐྱོན་བརྗོད་ཤུགས་ཆེ་གནང་ཡོད། དེ་ཡང་ཨོ་སི་ཊོ་ལི་ཡ་བོད་རིགས་ལྷན་ཁང་ Australia Tibet Council གི་འབྲེལ་མཐུད་འགན་འཛིན་སྐྱིད་འཛོམས་གྲོང་བསྡུས་ལགས་ཀྱིས་གནད་དོན་དེའི་སྐོར་གསུང་དོན། ནུབ་ཕྱོགས་རྒྱལ་ཁབ་ཀྱི་མཐོ་སློབ་ཁག་གི་ནང་བོད་རིག་པའི་མཁས་དབང་ཡིན་ཟེར་བའི་རྒྱ་རིགས་ཚོས་བོད་དོན་དྲིལ་བསྒྲགས་ལོག་བཤད་བྱེད་པའི་ལུགས་སྲོལ་དེ་གསར་པ་གང་ཡང་མིན། ཁུང་ཙི་བསྟི་གནས་ཁང་ཟེར་བ་དེ་འདྲ་འཛམ་གླིང་གང་སར་བཙུགས་པ་བརྒྱུད་རྒྱ་ནག་གཞུང་གིས་བོད་དོན་དྲིལ་བསྒྲགས་ལོག་པ་བྱ་རྒྱུའི་གླེང་སྟེགས་ཡག་པོ་ཞིག་ལ་ངོས་འཛིན་བྱེད་བཞིན་ཡོད། སྤྱིར་བཏང་རྒྱ་ནག་གཞུང་གིས་བོད་ཀྱི་གནད་དོན་སྐོར་གླེང་རྒྱུར་དམ་བསྒྲགས་བྱེད་བཞིན་ཡོད་ཀྱང་གཏམ་བཤད་དེ་འདྲ་གོ་སྒྲིག་བྱ་རྒྱུའི་དམིགས་ཡུལ་གཙོ་བོ་ནི་རྒྱ་ནག་གཞུང་གིས་ཆབ་སྲིད་ཀྱི་དགོས་མཁོ་དང་དམིགས་ཡུལ་དཔེར་ན། ༸གོང་ས་མཆོག་ལ་འཛམ་གླིང་ནང་ཧ་ཅང་ཚད་མཐོ་བའི་གུས་བརྩི་ཞུ་བཞིན་པའི་བསམ་ཚུལ་དེར་འགྱུར་བ་གཏོང་རྒྱུའི་ངན་གཡོའི་སྲིད་བྱུས་ཤིག་དང།
ད་བར་བོད་མི་ ༤༦ གིས་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་དེར་ངོ་རྒོལ་བྱེད་བཞིན་པའི་རྣམ་འགྱུར་དེ་དག་ཐོག་ལོག་བཤད་བྱ་རྒྱུའི་དམིགས་ཡུལ་ཞིག་ཡིན། དེར་བརྟེན་ཐེངས་འདིར་སི་ཌི་ནི་གཙུག་ལག་སློབ་ཁང་གིས་རྒྱ་ནག་གཞུང་ཕྱོགས་གཅིག་ཁོ་ནའི་བསམ་ཚུལ་ལས་བོད་མིའི་བསམ་ཚུལ་འདོན་རྒྱུའི་གཏམ་བཤད་ཀྱི་ཚོགས་བསྡུ་གོ་སྒྲིག་གནང་བ་དེར་ཧ་ཅང་བློ་ཕམ་ཡོད་ཅེས་གསུངས། ཨོ་སི་ཊོ་ལི་ཡའི་ནང་ཁུང་ཙི་བསྟི་གནས་ཁང་ཟེར་བ་དེ་རིགས་གྲངས་ ༡༠ བཙུགས་ཡོད་པའི་གྲས་ནས་གཅིག་མ་གཏོགས་གཞན་རྣམས་གཙུག་ལག་སློབ་གྲྭ་ཁག་གི་ནང་ཡོད་འདུག ཁུང་ཙི་བསྟི་གནས་ཁང་དེ་དག་ཧན་བྷན་ Hanban ཟེར་བའི་རྒྱ་ནག་ཤེས་རིག་ལས་ཁུངས་ China`s Education Ministry.འོག་ཡོད་པའི་ཚོགས་པ་དེས་མཐུན་འགྱུར་སྤྲོད་བཞིན་ཡོད།
གཞན་ཡང་ཁུང་ཙི་བསྟི་གནས་ཁང་གིས་བོད་དོན་དང་༸གོང་ས་མཆོག་གི་སྐོར་དྲིལ་བསྒྲགས་ལོག་པ་བྱ་རྒྱུའི་གཏམ་བཤད་གོ་སྒྲིག་བྱེད་འཆར་ཡོད་པ་དེའི་སྐོར་༝ཨིན་ཡུལ་རྒྱལ་ས་ལོན་ཌོན་གྱི་དཔལ་འབྱོར་རིག་པའི་བསྟི་གནས་ཁང་ London School of Economics གི་རྒྱལ་སྤྱིའི་འབྲེལ་ལམ་སྐོར་གྱི་གཙུག་ལག་སློབ་དཔོན་དང་རྒྱ་ནག་སྐོར་གྱི་མཁས་དབང་སྐུ་ཞབས་ཁི་རི་སི་ཊོ་ཕར་ཧུ་ཇེ་སི་ Christopher Hughesལགས་ཀྱིས་གསུང་དོན། བྱེད་ཕྱོགས་དེས་ཁུང་ཙི་བསྟི་གནས་ཁང་གིས་རྒྱ་སྐད་ཁོ་ན་སློབ་རྒྱུའི་བསམ་ཚུལ་དེར་རྩིས་མེད་བཏང་བ་ཞིག་རེད། ཐེངས་འདིར་སྨྲ་བརྗོད་རང་དབང་ཡིན་ཁུལ་གྱིས་སྐུ་ཞབས་ཊང་ཡུན་ལ་བོད་ཀྱི་གནད་དོན་ལྟ་བུའི་བརྗོད་གཞི་ཚོར་རྐྱེན་དེ་རིགས་སྐོར་ཤོད་རྒྱུའི་གོ་སྐབས་སྤྲད་པ་ནི་བསྟི་གནས་ཁང་གི་དམིགས་ཡུལ་དང་འབྲེལ་མེད་གནད་དོན་གཞན་ཞིག་ཆགས་ཡོད། ཅེས་སྐྱོན་བརྗོད་ཤུགས་ཆེན་པོ་གནང་ཡོད། སྤྱིར་ཁོང་ནས་དེ་སྔ་ཨིན་ཡུལ་རྒྱལ་ས་ལོན་ཌོན་གྱི་དཔལ་འབྱོར་རིག་པའི་གཙུག་ལག་སློབ་ཁང་གིས་ཁུལ་དེར་ཁུང་ཙི་བསྟི་གནས་ཁང་འཛུགས་ཆེད་རྒྱ་ནག་གཞུང་ནས་ཨ་སྒོར་ ༦༠༠ ༠༠༠ བླངས་པའི་བྱ་སྤྱོད་དེར་སྐྱོན་བརྗོད་ཤུགས་ཆེ་གནང་མྱོང་ཡོད་འདུག་པ་བཅས།
