༢༠༡༢ ཟླ་ ༨ ཚེས་ ༧ རེས་གཟའ་མིག་དམར།
ཕྱི་ལོ་ ༢༠༠༩ ལོའི་འདྲ་པར།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༢ ཟླ་ ༨ ཚེས་ ༧ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༨ ཚེས་ ༦ ཉིན་བོད་ནང་གི་ཕྱི་དྲོའི་ཆུ་ཚོད་ ༥།༥ ཙམ་ལ་བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་ཚུལ་ཁྲིམས་ལགས། རང་ལོ་ ༢༡ ཙམ་ཡིན་པ་ཁོང་གིས་ཀིརྟི་དགོན་པའི་ཉེ་འདབས་ཀྱི་དཔའ་བོའི་སྲང་ལམ་ནས་རང་ལུས་མེར་སྲེག་གིས་སྐད་འབོད་བྱེད་བཞིན་ཁྲོམ་གཞུང་དུ་བརྒྱུགས་འདུག་ཀྱང་ལམ་དེར་ཡོད་པའི་ནགས་ལས་ཁང་གི་ར་སྐོར་ནང་ལ་རྒྱུན་དུ་ཡིབ་སྡོད་བྱས་ཡོད་པའི་དྲག་ཆས་ཉེན་རྟོག་པ་དང་དམིགས་བསལ་ཉེན་རྟོག་པ་སོགས་ཀྱིས་མེ་གསོད་ཡོ་ཆས་བེད་སྤྱོད་ཀྱིས་མེ་བསད་ཅིང་ཐང་ལ་འགྱེལ་བཅུག་རྗེས་རླངས་འཁོར་ནང་གཡུག་ནས་རྔ་པ་རྫོང་སྨན་ཁང་དུ་ཁྱེར་འདུག རྔ་པའི་སྨན་ཁང་དུ་དུས་ཚོད་ཕྱེད་ཙམ་རིང་བསྡད་རྗེས་ས་གནས་གཞན་ཞིག་ལ་ཁྱེར་འདུག་ཀྱང་ས་གནས་གང་ཡིན་ཤེས་རྟོགས་བྱུང་མེད། སྐབས་ཐོག་དེར་དངོས་སུ་མཐོང་མཁན་གྱིས་བརྗོད་ན། སྐབས་དེར་ཁོང་གྲོངས་མེད་པ་དང་། མེ་ལྕེའི་དབུས་ནས་སྐད་འབོད་མང་པོ་བྱས་ཀྱང་ཚིག་འབྲུ་གསལ་པོ་གོ་མ་བྱུང་ཞེས་བརྗོད་ཀྱི་འདུག ཁོང་ནི་རྔ་པ་རྫོང་གཅའ་ཞང་རྭ་རུ་བའི་རྗའ་དར་ཚང་གི་མ་སྒྲོན་དཀར་སྐྱིད་ཀྱི་བུ་ཡིན་འདུག ཁོང་ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་གནང་ཞིང་། ཕྱི་ལོ་ ༢༠༠༨ ལོར་རྒྱ་གཞུང་ཉེན་རྟོག་པས་དགོན་པའི་ནང་ནས་འཛིན་བཟུང་གིས་གཅར་རྡུང་མནར་གཅོད་དྲག་པོ་ཕོག་མྱོང་ཡོད་ཅིང་། ཐོས་བསམ་གླིང་གྲྭ་ཚང་གི་རྟགས་རིགས་འཛིན་གྲྭ་ཡིན་པ་དང་། ལོ་སྔོན་མའི་ནང་རང་ལུས་མེར་སྲེག་གིས་འདས་གྲོངས་སུ་གྱུར་པའི་རྒྱལ་གཅེས་དཔའ་བོ་བློ་བཟང་ཕུན་ཚོགས་དང་འཛིན་གྲྭ་གཅིག་པ་ཡིན་འདུག ཁོང་རྒྱུན་དུ་ལག་རྩེ་སྤོ་ལོ་རྩེད་རྒྱུར་དགའ་མོས་ཆེན་པོ་ཡོད་མཁན་ཞིག་ཡིན་པར་མ་ཟད། རྔ་པའི་ནང་གི་ལག་རྩེད་སྤོ་ལོའི་རུ་ཁག་ཅིག་གི་ཚོགས་མི་ཡང་ཡིན་འདུག
འདི་ནི་བོད་ནང་ནས་རང་ལུས་མེར་སྲེག་གཏོང་མཁན་ཐེངས་ཞེ་ལྔ་པ་(བོད་མི་མང་སྤྱི་འཐུས་ལྷན་ཚོགས་ཀྱི་རེའུ་མིག་ལ་གཞི་བཅོལ་བ་ཡིན།)དང་། རྔ་པ་རང་སྐྱོང་ཁུལ་ཁོངས་ཀྱི་ཐེངས་ཉེར་དགུ་པ། རྔ་པ་རྫོང་ཁོངས་ཀྱི་ཐེངས་ཉེར་གཉིེས་པ་ཡིན་འདུག་པ་བཅས།།
