༢༠༡༢ ཟླ་ ༧ ཚེས་ ༢༦ རེས་གཟའ་ཕུར་བུ།
༄༅། །བོད་མི་མང་སྤྱི་འཐུས་ལྷན་ཚོགས་ནས་གོ་སྒྲིག་གནང་བའི་བདེན་པའི་མེ་ལྕེ་སྐོར་སྐྱོད་ཀྱི་ལས་འགུལ་བཞུགས་སྒར་དུ་འབྱོར་བར་བརྟེན་ཕྱི་ལོ་ ༢༠༡༢ ཟླ་ ༧ ཚེས་ ༢༦ 
ཉིན་བདེན་པའི་མེ་ལྕེ་སྐོར་སྐྱོད་ཀྱི་ལས་འགུལ་ཆེད་གཞུང་འབྲེལ་མཛད་སྒོ་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཚོགས་ཡོད། མཛད་སྒོར་བཀའ་ཁྲི་མཆོག་གིས་བདེན་པའི་མེ་ལྕེ་སྐོར་སྐྱོད་དང་འབྲེལ་བའི་གསུང་བཤད་གནང་དོན། དེ་རིང་འདི་གར་ཕེབས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་གཙོས་མི་མང་ཚང་མར་ཞུ་རྒྱུར། བོད་མི་མང་སྤྱི་འཐུས་ལྷན་ཁང་གིས་དབུ་ཁྲིད་པའི་བདེན་པའི་མེ་ལྕེ་སྐོར་སྐྱོད་ལས་འགུལ་སྤེལ་དང་སྤེལ་མུས་ཡིན་པ་དེ་བཞིན་རྒྱ་གར་གྱི་ས་གནས་ཁག་གསུམ་ནས་དབུ་འཛུགས་གནང་བའི་ལས་འགུལ་འདི་བཞུགས་སྒར་རྡ་སར་འབྱོར་ཡོད། འོན་ཀྱང་ས་གནས་གཞན་ཁག་གཅིག་ནང་རིམ་བཞིན་སྐོར་སྐྱོད་གནང་རྒྱུ་ཡིན་པ་རེད། ལས་འགུལ་དེའི་ཆེད་བཀའ་ཤག་ནས་མཐུན་འགྱུར་བསྐྲུན་དགོས་ཁག་གང་ཐུབ་ཀྱིས་སྐྲུན་བཞིན་ཡོད།
དེ་བཞིན་བཀའ་ཤག་གི་བཀོད་ཁྱབ་ནང་མི་མང་རྣམས་ནས་ཀྱང་ལས་འགུལ་དེར་མཉམ་ཞུགས་གནང་དགོས་པའི་རེ་འདུན་ཞུས་ཡོད། 
དེར་བརྟེན་ངས་བཀའ་ཤག་གི་ཚབ་ཞུས་ཏེ། བོད་མི་དང་འཛམ་གླིང་སྤྱི་ཡོངས་ལ་ཡོད་པའི་བོད་དོན་རྒྱབ་སྐྱོར་གྱི་ཚོགས་པ་ཚང་མས་སྤྱི་འཐུས་ལྷན་ཁང་ནས་དབུ་ཁྲིད་པའི་བདེན་པའི་མེ་ལྕེ་སྐོར་སྐྱོད་ལས་འགུལ་སྤེལ་མུས་ཡིན་པ་འདིར་འཛུལ་ཞུགས་དང་རྒྱབ་སྐྱོར་གནང་རོགས་ཞེས་འབོད་སྐུལ་ཞུ་རྒྱུ་ཡིན། བདེན་པའི་མེ་ལྕེ་སྐོར་སྐོད་ཀྱི་ལས་འགུའ་འདིའི་ནང་གནད་དོན་གཙོ་བོ་གསུམ་སྟེ།
༡༽ཕྱི་ལོ་ ༡༩༥༩ དང་། ༡༩༦༡། ༡༩༦༥ སོ་སོར་འཛམ་གླིང་མཉམ་འབྲེལ་རྒྱལ་ཚོགས་ནས་བོད་དོན་ཐོག་བཞག་པའི་གྲོས་ཆོད་ཁག་སླར་ཡང་རྒྱལ་ཚོགས་ནང་གླེང་སློང་དང་ལག་བསྟར་མཇུག་གནོན་དགོས་པ།
༢༽བོད་ནང་གི་ད་ལྟའི་ཛ་དྲག་གནས་སྟངས་རྟོག་ཞིབ་སླད་རང་དབང་ཅན་གྱི་རྒྱལ་སྤྱིའི་སྐུ་ཚབ་ཁག་གཅིག་འཕྲལ་གཏོང་དགོས་པ།
༣༽བོད་ནང་གི་བོད་མིའི་མངོན་འདོད་བསྒྲུབ་རྒྱུར་མཉམ་འབྲེལ་རྒྱལ་ཚོགས་ཀྱིས་དམིགས་བསལ་འགན་འཁུར་བཞེས་དགོས་པ།
དེར་བརྟེན་བདེན་པའི་མེ་ལྕེ་སྐོར་སྐྱོད་ཀྱི་ལས་འགུལ་ལ་བཀའ་ཤག་ངོས་ནས་རྒྱབ་སྐྱོར་ཞུ་གི་ཡོད། གཞི་རྩའི་བོད་ནང་ཛ་དྲ་གི་གནས་སྟངས་དང་རང་ལུས་མེར་སྲེག་བཏང་དང་གཏོང་མུས་ཀྱི་གནས་སྟངས་རྣམ་པ་ཚོས་ཤེས་གསལ་ཡིན་པ་མ་ཟད། ཁོང་རྣམ་པའི་འབོད་སྒྲ་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་དང་བོད་ལ་རང་དབང་དགོས་པ་ཤེས་གསལ་རེད།
འོན་ཀྱང་རྒྱ་ནག་གཞུང་ནས་རང་ལུས་མེར་སྲེག་གཏོང་མཁན་ཚོའི་རྒྱབ་ཏུ་༸གོང་ས་མཆོག་དང་བོད་མིའི་སྒྲིག་འཛུགས་ཡོད་སྐོར་གྱི་རྫུན་གཏམ་མང་དག་ཅིག་ཤོད་བཞིན་འདུག བོད་ནང་གི་བོད་མི་ཚོར་གཏམ་བརྗོད་སོགས་རང་དབང་མེད་སྟབས། རང་སྲོག་ཚུན་ཆད་བློས་གཏོང་གནང་གི་ཡོད། རང་ལུས་མེར་སྲེག་གཏོང་དགོས་ཐུག་པའི་འབྱུང་རྐྱེན་རྒྱ་ནག་གཞུང་གི་མཁྲེགས་འཛིན་གྱི་སྲིད་བྱུས་ལག་བསྟར་བྱས་པར་བརྟེན་ནས་བྱུང་བ་ཞིག་རེད། གནད་དོན་དེ་དག་ང་ཚོས་ཤེས་པའི་ཐོག་ནས་ཕྱི་རྒྱལ་མི་སྣ་ཁག་ལ་འགྲེལ་བཤད་རྒྱག་རྒྱུ་ཧ་ཅང་གལ་ཆེན་པོ་ཆགས་ཡོད། རང་ལུས་མེར་སྲེག་གཏོང་རྒྱུ་དེ་བཞིན་བོད་པའི་སྤྱི་ཚོགས་ནང་དམིགས་བསལ་བྱུང་བ་ཞིག་མིན་པར། རྒྱལ་སྤྱིའི་ཐོག་ལ་ཡིན་རུང་རང་ལུས་མེར་སྲེག་གཏོང་རྒྱུ་དེ་ཆབ་སྲིད་ཀྱི་གནད་དོན་དང་ངོ་བོ། རྣམ་པའི་ཐོག་ནས་བྱུང་ཡང་ང་ཚོས་ཤེས་དགོས་པ་ཧ་ཅང་གལ་འགངས་ཆེན་པོ་ཡིན། དཔེར་ན། ལོ་རྒྱུས་ཐོག་ལོ་བརྒྱ་ཕྲག་གོང་ནས་རང་ལུས་མེར་སྲེག་གཏོང་མཁན་བྱུང་འདུག
དེ་སྔ་ཝི་ཏི་ནམ་ལ་དམག་འཁྲུག་སྐབས་དགེ་འདུན་པས་དམག་འཁྲུག་མཚམས་འཇོག་དགོས་པ་དང་རང་དབང་དགོས་ཞེས་རང་ལུས་མེར་སྲེག་བཏང་བ་བྱུང་ཡོད། གནད་དོན་དེར་རྒྱབ་སྐྱོར་ཆེད་ཨ་རི་ནས་མི་ཞིག་གིས་རང་ལུས་མེར་སྲེག་བཏང་ཡོད། དེ་བཞིན་ཡུ་རོབ་དང་རྒྱ་ནག་ནང་ལ་ཡང་བྱུང་ཡོད་པ་མ་ཟད། ཁ་ཆེའི་ལུང་པར་མང་གཙོ་དང་རང་དབང་རྩོད་སྐབས་རང་ལུས་མེར་སྲེག་གཏོང་མཁན་བྱུང་འདུག རང་ལུས་མེར་སྲེག་གཏོང་རྒྱུ་དེ་ཆབ་སྲིད་ཀྱི་ངོ་རྒོལ་རྣམ་པ་གསལ་སྟོན་བྱེད་ཀྱི་ཡོད་པ་ཧ་ཅང་གསལ་པོ་རེད། དེར་བརྟེན་བོད་ནང་གི་བོད་མིས་རྒྱ་ནག་གཞུང་གི་སྲིད་བྱུས་འོག་གནས་ཐབས་མི་འདུག་ཅེས་དེ་ལྟར་གནང་བཞིན་ཡོད། གནད་དོན་དེས་རྒྱ་ནག་གཞུང་གི་སྲིད་བྱུས་དྲང་པོ་མེད་པ་གསལ་སྟོན་བྱེད་བཞིན་ཡོད།
བོད་ནང་གི་བོད་མི་ཚོས་རང་སྲོག་བློས་གཏོང་གནང་བ་དེ་དག་བཙན་བྱོལ་དུ་ཡོད་པའི་བོད་མི་ཚོས་མ་བརྗེད་པ་བྱེད་དགོས་པ་མ་ཟད། ཁོང་རྣམ་པའི་མངོན་འདོད་འཛམ་གླིང་སྟེང་ཁྱབ་བསྒྲགས་བྱེད་དགོས་པའི་རེ་འདུན་གྱི་ཆེད་བཀའ་སྤྱི་གཉིས་ཀྱིས་ལས་འགུལ་མང་དག་སྤེལ་ཡོད། དེ་བཞིན་བོད་དོན་རྒྱབ་སྐྱོར་ཚོགས་པ་ཁག་སོགས་ནས་ལས་འགུལ་མང་པོ་ཞིག་སྤེལ་ཡོད། མདོར་ན། བོད་ཕྱི་ནང་གཉིས་སུ་གནས་པའི་བོད་མི་རྣམས་ཀྱི་རེ་བ་བསྒྲུབ་ཆེད་ང་ཚོས་ཕྱར་གྲུ་མཉམ་འདེགས་ཐོག་དཀའ་ལས་རྒྱག་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་གསུང་བཤད་གནང་ཡོད་པ་བཅས། །
