༢༠༡༢ ཟླ་ ༧ ཚེས་ ༢༥ རེས་གཟའ་ལྷག་པ།
༄༅། །༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༢ ཟླ་ ༧ ཚེས་ ༢༦ ཉིན་ལ་དྭགས་རྒྱལ་ས་སླེའི་ནང་གི་ཇོ་བོ་གཙུག་ལག་ཁང་དུ་དགེ་འདུན་པ་ལྔ་བཅུ་བརྒལ་བར་བསྙེན་རྫོགས་ཀྱི་སྡོམ་པ་འབོགས་ཆོག་སྩལ་གཏན་འཁེལ་འདུག
གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༢ ཟླ་ ༧ ཚེས་ ༡༨ ཉིན་ལ་དྭགས་ཀྱི་རྒྱལ་ས་སླེ་རུ་༸ཞབས་སོར་བདེ་བར་འཁོད་རྗེས་ལྕོག་ལམ་སར་ཡོད་པའི་ཞི་བའི་ཚལ་གྱི་ཕོ་བྲང་ནང་སྐུ་མཚམས་སུ་བཞུགས་གནང་མཛད་བཞིན་ཡོད། ༸གོང་ས་མཆོག་གིས་འདི་ཟླའི་ཚེས་ ༢༦ ཉིན་ནས་ཁུལ་དེར་ཆོས་འབྲེལ་དབུ་འཛུགས་མཛད་རྒྱུ་ཡིན་འདུག དེ་བཞིན་ཉིན་དེའི་སྔ་དྲོ་ཇོ་བོ་གཙུག་ལག་ཁང་དུ་དགེ་འདུན་པ་ལྔ་བཅུ་བརྒལ་བར་བསྙེན་རྫོགས་ཀྱི་སྡོམ་པ་འབོགས་ཆོག་སྩལ་རྒྱུ་དང་། ཕྱི་ཚེས་ ༢༧ ཉིན་གྱི་སྔ་དྲོ་མགོན་པོ་གང་ཉིད་མཆོག་གིས་ལ་དྭགས་ཀྱི་རྒྱལ་སར་རྟེན་གཞི་བྱས་པའི་འཇམ་དབྱངས་སློབ་གྲྭར་ཆིབས་སྒྱུར་བསྐྱངས་ཏེ་བཀའ་སློབ་སྩལ་རྒྱུ་ཡིན་འདུག དེ་རྗེས་རྒྱལ་ས་སླེ་ནས་སྤྱི་ལེ་རྒྱང་ཐག་ ༤༠༠ སར་ཡོད་པའི་ཟངས་དཀར་ལ་ཆིབས་སྒྱུར་བསྐྱངས་ཏེ་དད་ལྡན་མང་ཚོགས་ལ་ཉིན་གྲངས་གསུམ་རིང་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མ་དང་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ། དེ་བཞིན་སྤྱན་རས་གཟིགས་ཀྱི་དབང་སྩལ་རྒྱུ་ཡིན་འདུག
མདོར་ན། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཟླ་ ༧ ཚེས་ ༢༦ ནས་ཕྱི་ཟླ་ ༨ པའི་ཚེས་ཤར་བར་ལ་དྭགས་ཀྱི་རྒྱལ་ས་སླེ་སོགས་སུ་དད་ལྡན་མང་ཚོགས་ལ་ཆོས་འབྲེལ་རྒྱ་ཆེ་བཀའ་དྲིན་བསྐྱང་རྒྱུ་ཡིན་འདུག་པ་བཅས། །
