༢༠༡༢ ཟླ་ ༧ ཚེས་ ༢༤ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༢༡ ཉིན་བཀའ་བློན་ཁྲི་པ་བློ་བཟང་སེང་གེ་མཆོག་དབུ་བཞུགས་ཐོག་ཨ་རིའི་གྲོང་ཁྱེར་ནེའུ་ཡོཀ་ནང་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༡༣ ཚོགས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། བྱང་ཨ་རིའི་སྐུ་ཚབ་དོན་གཅོད་ཁང་གིས་གོ་སྒྲིག་གནང་བ་ལྟར། ཚོགས་ཆེན་དེའི་ཐོག་བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས་དང་། བྱང་ཨ་རིའི་བོད་མི་མང་སྤྱི་འཐུས་ནོར་བུ་ཚེ་རིང་ལགས། བཀྲིས་རྣམ་རྒྱལ་ལགས། དེ་བཞིན་ས་གནས་ ༢༥ ནས་བོད་རིགས་སྤྱི་མཐུན་ཚོགས་པའི་སྐུ་ཚབ་འཐུས་མི་ ༣༥ མཉམ་ཞུགས་གནང་འདུག ཚོགས་ཆེན་དབུ་འབྱེད་སྐབས་བོད་ཀྱི་བསྟན་སྲིད་སླད་རང་ལུས་སྲོག་བློས་གཏོང་མཁན་གྱི་རྒྱལ་གཅེས་དཔའ་བོ་ཕོ་མོ་རྣམས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་འདུག
དེ་ནས་བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་བོད་རྒྱལ་ཁབ་དང་། བོད་མི་རིགས་ཀྱི་ངོ་བོའམ་རྣམ་པ་སྲུང་སྐྱོབ་དང་མི་ཉམས་རྒྱུན་འཛིན་གནང་ཕྱིར་བོད་ཀྱི་སྐད་ཡིག་ཧ་ཅང་གལ་ཆེ་ཡིན་སྐོར་གསུངས་འདུག ཡང་ཚོགས་ཆེན་དེའི་ཐོག་སྐུ་མགྲོན་གཙོ་བོ་བཀའ་ཁྲི་མཆོག་གིས་མང་གཙོའི་ལམ་ལུགས་དེ་གལ་ཆེ་ཡིན་སྐོར་སོགས་ཀྱི་གསུང་བཤད་གནང་། དེ་བཞིན་ཚོགས་བཅར་བ་རྣམས་ཀྱིས་གྲོས་གཞི་དོན་ཚན་དྲུག་ཐོག་གྲོས་བསྡུར་གནང་ཡོད་ཅིང་། དེ་དག་ནི་རིང་མིན་ཕྱི་ཟླ་དགུ་པའི་ནང་དམིགས་བསལ་ཚོགས་ཆེན་ཐེངས་གཉིས་པ་དེ་འཚོགས་གཏན་འཁེལ་སྟབས། ཚོགས་ཆེན་ཐོག་བོད་ཀྱི་བདེན་པའི་འཐབ་རྩོད་དང་བོད་ནང་གི་ཛ་དྲག་གནས་སྟངས་སྐོར། བོད་རིགས་སྤྱི་མཐུན་ཚོགས་པ་ཁག་ཚགས་ཚུད་ཡར་རྒྱས་གཏོང་ཐབས་དང་བྱང་ཨ་རིའི་སྤྱི་འཐུས་རྣམ་གཉིས་དང་། བོད་རིགས་སྤྱི་མཐུན་ཚོགས་པའི་དབར་འབྲེལ་བ་ཤུགས་ཆེ་རུ་གཏོང་ཐབས། བཙན་བྱོལ་བོད་མིའི་རང་དབང་གཅེས་འཛིན་དང་བླངས་དཔྱ་དངུལ་ལག་དེབ་དང་འབྲེལ་ཡོད་སྐོར་བོད་མིའི་ཡ་རབས་སྤྱོད་བཟང་མི་ཉམས་དགོང་འཕེལ་གཏོང་ཐབས། བྱང་ཨ་རིའི་ནང་གི་རང་རིགས་གཞོན་སྐྱེས་རྣམས་ཀྱི་བོད་སྐད་དང་བོད་ཡིག་ཡར་རྒྱས་གཏོང་ཐབས་(Tibet Lobby Day)འམ་བོད་དོན་རྒྱབ་སྐྱོར་འཚོལ་བའི་ཉིན་མོ་དང་། འབྲེལ་ཡོད་བྱང་ཨ་རིའི་ཁྱབ་ཁོངས་སུ་ཡོད་པའི་བོད་དོན་རྒྱབ་སྐྱོར་ཚོགས་པ་ཁག་དང་བོད་རིགས་སྤྱི་མཐུན་ཚོགས་པ། དེ་བཞིན་མངའ་སྡེ་ཁག་དང་གྲོང་ཁྱེར་སོ་སོའི་གཞུང་དང་། གྲོས་ཚོགས་ནང་བོད་དོན་རྒྱབ་སྐྱོར་སྔར་ལྷག་ཐོབ་ཐབས་རྒྱ་མི་རིགས་དང་འབྲེལ་བ་དམ་ཟབ་གཏོང་ཕྱོགས་བཅས་ཀྱི་སྐོར་གྲོས་བསྡུར་གནང་འདུག་པ་བཅས། །
