ཕྱི་ལོ་ ༢༠༠༨ ཟླ་ ༡༢ ཚེས་ ༡༥ རེས་གཟའ་ཟླ་བ།
༄༅། །འདི་གར་ཁུངས་ལྡན་གྱི་གནས་ཚུལ་བྱུང་བར་གཞིགས་ན། ཕྱི་ལོ་ ༢༠༠༨ ཕྱི་ཟླ་ ༡༡ ཚེས་ ༢༢ ཉིན་བོད་ཀྱི་རྒྱལ་ས་ལྷ་སའི་བར་སྐོར་ནང་བཙུན་མ་བཞི་དང་། ཕོ་གསར་འགས་བོད་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གདན་ཞུ་དང་། བོད་ནང་འགྲོ་བ་མིའི་ཐོབ་ཐང་དགོས་ལུགས་བཅས་ཞི་རྒོལ་ཐོག་ནས་སྐད་འབོད་བྱས་ཡོད་པའི་གནས་ཚུལ་བྱུང་འདུག ཡིན་ནའང་སྟབས་མ་ལེགས་པ་ཞིག་ལ་སྐད་འབོད་བྱས་མ་ཐག་རྒྱ་ནག་ཉེན་རྟོག་སྐོར་སྲུང་བས་ཉེས་རྡུང་ཚད་ལས་བརྒལ་བར་བཏང་སྟེ་འཛིན་བཟུང་ཡང་བྱས་འདུག འོན་ཀྱང་བཙུན་མ་དེ་དག་དགོན་པ་གང་ནས་ཡིན་མིན་དང་། ཕོ་གསར་དེ་དག་ཀྱང་ས་གནས་གང་ནས་ཡིན་མིན་ཤེས་རྟོགས་བྱུང་མིན་འདུག
དེ་བཞིན་ལྷ་ས་གྲོང་ཁྱེར་ཁུལ་དུ་བོད་མི་སླར་ཡང་འཛིན་བཟུང་བྱ་འགོ་ཚུགས་འདུག ཕྱི་ཟླ་ ༡༠ པ་དང་ ༡༡ པའི་ཚེས་ཤར་ནས་ལྷ་ས་གྲོང་ཁྱེར་ཁུལ་གནས་འབྲེལ་ཡོད་གསང་བའི་སྡེ་ཚན་དང་སྤྱི་བདེ་ལས་བྱེད་པ་མཉམ་འབྲེལ་ཐོག་བོད་མིའི་མི་སྣ་ཁག་ཅིག་གློ་བུར་དུ་རང་ཁྱིམ་ནས་འཛིན་བཟུང་བྱས་མུས་ཀྱི་གནས་ཚུལ་ཐོན་བཞིན་འདུག་ཀྱང་། གློ་བུར་དུ་འཛིན་བཟུང་བྱེད་དགོས་པའི་རྒྱུ་མཚན་ཁ་གསལ་མེད་པ་མ་ཟད་མུ་མཐུད་བཀག་ཉར་འོག་གནས་མུས་ཛ་དྲག་གི་གནས་ཚུལ་ཡང་བྱུང་བཞིན་འདུག
