༢༠༡༢ ཟླ་ ༧ ཚེས་ ༢༠ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༡༧ རེས་གཟའ་མིག་དམར་ཉིན་རྡ་སར་རྟེན་གཞི་བྱས་པའི་རྒྱ་གར་ཉེན་རྟོག་ལས་ཁུངས་ (SP Office) ཀྱི་ཚོགས་ཁང་དུ་ཡུལ་སྐོར་སྤྲོ་འཆམ་པའི་འགྲིམ་འགྲུལ་བྱེད་སའི་གཞུང་ལམ་དང་སང་ལམ་ཁག་ཏུ་འགྲིམ་འགྲུལ་སྐོར་འཆག་པས་སྐད་ཆ་ཤོད་སྟངས་དང་རྣམ་འགྱུར་སྟོན་སྟངས། དེ་བཞིན་སྟངས་འཛིན་ཇི་འདྲ་བྱ་དགོས་མིན་སོགས་ཀྱི་སྐོར་ཟབ་སྦྱོང་ཞིག་གོ་སྒྲིག་ཞུས་ཡོད། སྐབས་དེར་རྡ་ས་ས་གནས་བདེ་དོན་ལས་ཁུངས་ཀྱི་ས་གནས་འགོ་འཛིན་སྐུ་ཞབས་བསོད་ནམས་རྡོ་རྗེ་ལགས་ཀྱིས་རྒྱ་གར་འགྲིམ་འགྲུལ་སྐོར་འཆག་པ་ Traffic Police personnel གྲངས་ ༣༠ ཙམ་ལ་གསུང་བཤད་གནང་ཡོད། ཟབ་སྦྱོང་གོ་སྒྲིག་གནང་མཁན་ཀངྒ་ར་རྫོང་གི་ཉེན་རྟོག་འགོ་དཔོན་ Superintendent of Police, District Kangra མཆོག་ཡིན་འདུག

སྐབས་དེར་རྡ་ས་ས་གནས་འགོ་འཛིན་གྱིས་རྡ་སའི་ཁུལ་དུ་བོད་མིའི་དགོན་པ་དང་སློབ་གྲྭ བཟོ་གྲྭ སོགས་ས་གནས་གང་དུ་ཆགས་ཡོད་སྐོར་ཞིབ་ཕྲ་གསལ་བཤད་གནང་ཡོད་པ་མ་ཟད། ས་གནས་བོད་མི་ཚོར་འགྲིམ་འགྲུལ་སྐབས་སྒྲིག་འཛུགས་ལག་བསྟར་ཇི་འདྲ་བྱེད་དགོས་མིན་ཐོག་གོ་རྟོགས་སྤེལ་རྒྱུ་ཧ་ཅང་གལ་ཆེ་ཡིན་པ་དང་རྒྱ་གར་འགྲིམ་འགྲུལ་སྐོར་འཆག་པས་ས་གནས་དང་ཕྱི་ནས་ཡུལ་སྐོར་སྤྲོ་འཆམ་པ་གཉིས་ཀར་རྣམ་འགྱུར་བཟང་པོ་སྟོན་རྒྱུ་གལ་ཆེ་ཡིན་སྐོར་སོགས་གསལ་བཤད་གནང་ཡོད། ཕྱོགས་མཚུངས་སྐབས་དེར་ཚོགས་བཅར་བ་རྣམས་ལ་བོད་མིའི་སྒྲིག་འཛུགས་ཀྱི་ངོ་སྤྲོད་ཡིག་ཆ་སོགས་ཀྱང་འགྲེམས་སྤེལ་གནང་ཡོད་འདུག་པ་བཅས།།