ཕྱི་ལོ་ ༢༠༠༨ ཟླ་ ༡༢ ཚེས་ ༩ རེས་གཟའ་ཕུར་བུ།
༄༅། །དཔལ་ལྡན་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ཕྱི་ལོ་ ༢༠༠༨ ཟླ་ ༡༢ ཚེས་ ༡༡ ཕྱི་དྲོ་ནས་ཚེས་ ༢༠ ཕྱི་དྲོ་བར་ཀོ་ཊ་རུ་རཇས་ཐན་བོད་དོན་རྒྱབ་སྐྱོར་ཚོགས་ཆེན་དང་། ལྡི་ལིར་ཚོགས་འདུ་ཁག་ཅིག སྦེལ་ལོར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡིད་ཆེས་དགེ་རྩའི་འགན་འཛིན་ལྷན་ཚོགས་སུ་མཉམ་ཞུགས་གནང་རྒྱུ་བཅས་གཞུང་འབྲེལ་ཕྱོགས་ཕེབས་བསྐྱང་གཏན་འཁེལ་ཡོད་པ་རེད།
དེ་ཡང་ཕྱི་ལོ་ ༢༠༠༨ ཟླ་ ༡༢ ཚེས་ ༡༡ ཉིན་ཕྱེད་ཡོལ་ཆུ་ཚོད་ ༤ ཐོག་རྡ་ས་ནས་ཅཀྐཱི་བྷེདྐཱ་རུ་ཕེབས་ཐོན་གནང་རྒྱུ་དང་། དེ་ནས་ལྡི་ལིར་ཕེབས་ཐོན་གནང་རྒྱུ། ཕྱི་ཚེས་ ༡༢ ཉིན་ལྡི་ལིར་ཕེབས་འབྱོར་གྱིས་ར་ཇི་བོ་ར་སྟེང་ཞལ་ནས་མཇལ་འཕྲད་ཞུ་རྒྱུ། དེ་ཉིན་ཕྱེད་ཡོལ་ཆུ་ཚོད་ ༢ ཐོག་IIC Annexརུ་རྒྱལ་སྤྱིའི་ཁྲིམས་ལུགས་མཁས་པའི་སྒྲིག་འཛུགས་བཙུགས་ནས་ངོ་ལོ་ ༢༡ འཁོར་བའི་ཚོགས་འདུར་གསུང་བཤད་གནང་རྒྱུ། དེ་ནས་དེ་ཉིན་ཕྱི་དྲོའི་ཆུ་ཚོད་ ༡༠ ཙམ་ལ་ལྡི་ལི་ནས་ཀོ་ཊ་རུ་ཕེབས་ཐོན་གྱིས་ཕྱི་ཚེས་ ༡༣ སྔ་དྲོའི་ཆུ་ཚོད་ ༤།༤༠ ཙམ་ལ་ཕེབས་འབྱོར་གནང་རྒྱུ། དེ་ཉིན་སྔ་དྲོའི་ཆུ་ཚོད་ ༡༠ ཐོག་ར་ཇས་ཐན་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་ཆེན་དུ་མཉམ་ཞུགས་གནང་རྒྱུ། དེ་ནས་ཀོ་ཊ་ནས་ཕེབས་ཐོན་གྱིས་ཕྱི་ཚེས་ ༡༤ སྔ་དྲོ་ལྡི་ལིར་ཕེབས་འབྱོར་གནང་རྒྱུ། དེ་ཉིན་ཕྱི་དྲོ་ཆུ་ཚོད་ ༢།༥༥ ཐོག་མཁའ་ལམ་བརྒྱུད་ལྡི་ལི་ནས་སྦེང་ལོར་དུ་ཕེབས་ཐོན་གནང་རྒྱུ། ཕྱི་ཚེས་ ༡༦ ཉིན་སྔ་དྲོ་ཆུ་ཚོད་ ༡༡ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡིད་ཆེས་དགེ་རྩའི་འགན་འཛིན་ལྷན་ཚོགས་སུ་བཅར་རྒྱུ། ཕྱི་ཚེས་ ༡༨ ཕྱི་དྲོ་སྦེང་ལོར་ནས་མཁའ་ལམ་བརྒྱུད་ལྡི་ལིར་ཕེབས་ཐོན་གནང་རྒྱུ། ཕྱི་ཚེས་ ༡༩ སྔ་དྲོ་འཚེ་མེད་ཞི་བའི་ཐབས་ལམ་ཞེས་པའི་ཐེབས་རྩའི་ཚོགས་མི་བིཇཡ་ཀྲཱནྟཱི་སོགས་ནས་བཀའ་ཁྲི་མཆོག་གི་བཞུགས་གནས་སུ་བཅར་རྒྱུ། དེ་ཉིན་ཕྱི་དྲོ་རྒྱ་གར་གཞོན་སྐྱེས་དབུ་ཁྲིད་གཅིག་གི་ཚོགས་སྡེར་འཕགས་བོད་འབྲེལ་བའི་སྐོར་ལ་གསུང་བཤད་གནང་རྒྱུ། ཕྱི་ཚེས་ ༢༠ ཉིན་ལྡི་ལི་ནས་མཁའ་ལམ་བརྒྱུད་གྷ་གལ་ལ་ཕེབས་ཐོན་གྱིས་ཕྱི་དྲོ་ཆུ་ཚོད་ ༤ ཙམ་ལ་བཞུགས་སྒར་རྡ་སར་ཕེབས་འབྱོར་གནང་རྒྱུ་བཅས་ཀྱི་གནས་ཚུལ་དུ།།
