པར་ལེན་རྡ་ས་དཔེ་མཛོད་ཁང་གི་བསོད་ནམས་ཚེ་རིང་ལགས།
༢༠༡༢ ཟླ་ ༧ ཚེས་ ༡༦ རེས་གཟའ་ཟླ་བ།
༄༅། །ས་གནས་ནས་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་སྐལ་བཟང་མཁས་གྲུབ་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ལོའི་ཟླ་ ༧ ཚེས་ ༡༤ ཉིན་གྱི་སྔ་དྲོ་ཆུ་ཚོད་ ༡༠ ཐོག་སློབ་གྲྭའི་ (Tibetan Public School) མདུན་ཐང་དུ་བོད་རིགས་ཁ་ཆེེའི་གཞོན་ནུའི་མཐུན་ཚོགས་དང་བོད་རིགས་ཁ་ཆེའི་སློབ་གྲྭའི་འཛིན་སྐྱོང་ཐུན་མོང་ནས་གོ་སྒྲིག་ཐོག་༸གོང་ས་༸སྐྱབས་མགོན་ཆེན་པོ་མཆོག་དང་མངའ་སྡེའི་སྤྱི་ཁྱབ་བློན་ཆེན་ཨོ་མར་ཨབ་དུལ་ལ་ (Omar Abdullah) མཆོག
བོད་མིའི་སྒྲིག་འཛུགས་ཀྱི་སྲི་ཞུ་བ་ཟུར་པ་སྐུ་ཞབས་ཡུ་སུབ་ལགས། པར་ལེན་རྡ་ས་བོད་ཀྱི་དཔེ་མཛོད་ཁང་གི་བསོད་ནམས་ཚེ་རིང་ལགས།
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་བཅས་ལ་བོད་རིགས་ཁ་ཆེའི་གནད་ཡོད་མི་སྣས་དཀར་གཙང་མཇལ་དར་དང་སློབ་ཕྲུག་རྣམས་ཀྱིས་ལག་ཏུ་བཀྲ་ཤིས་རྟགས་བརྒྱད་ཀྱི་རི་མོ་དང་མེ་ཏོག་ཐོགས་ཏེ་ཕེབས་བསུ་གཟབ་རྒྱས་དང་སྦྲགས་གདན་ཞུས་ཀྱི་ཞབས་སྟེགས་སྟེང་༸ཞབས་སོར་བདེ་བར་འཁོད་ཡོད།
པར་ལེན་རྡ་ས་བོད་ཀྱི་དཔེ་མཛོད་ཁང་གི་བསོད་ནམས་ཚེ་རིང་ལགས།
པར་ལེན་སྐུ་སྒེར་ཡིག་ཚང་ཆོས་འབྱོར།།
དེ་ཡང་མཛད་སྒོར་གནད་ཡོད་སྐུ་མགྲོན་རྣམས་དང་བོད་རིགས་ཁ་ཆེ་བ་རྣམ་པ། སློབ་ཕྲུག་བཅས་ཁྱོན་མི་གྲྭངས་ ༢༠༠༠ བརྒལ་བ་ལྷན་འཛོམས་ཐོག་བོད་རིགས་ཁ་ཆེའི་སློབ་གྲྭའི་སློབ་སྤྱི་ཨ་མར་ལུ་ལ་མ་ལིག་ལགས་ནས་ཐོག་མར་གསུང་བཤད་གནང་བའི་ནང་། དེ་རིང་༸གོང་ས་མཆོག་ས་གནས་འདིར་༸ཞབས་སོར་འཁོད་པ་འདི་ནི་རྨི་ལམ་ལྟ་བུའི་དགའ་ཚོར་ཆེན་པོ་བྱུང་བས་ཐུགས་རྗེ་བཀའ་དྲིན་ཆེ་ཞུ་རྒྱུ་དང་སྦྲགས་ང་ཚོ་བོད་རིགས་ཁ་ཆེ་བ་རྣམས་དང་བོད་རིགས་ཁ་ཆེ་བའི་སློབ་གྲྭའི་སློབ་ཕྲུག་ཡོངས་ཀྱིས་ཚབ་ཞུས་ཏེ་ཕེབས་བསུའི་འཚམས་འདྲི་ཞུས་རྗེས་དེར་འདུས་མི་མང་རྣམས་ལ་༸གོང་ས་མཆོག་གི་མཛད་རྣམ་སྙིང་བསྡུས་ངོ་སྤྲོད་ཞུས།
དེ་རྗེས་བོད་རིགས་ཁ་ཆེའི་སློབ་ཕྲུག་གཅིག་གིས་ཁ་ཆེའི་ཆོས་ཕྱོགས་ཀྱི་འདོན་པ་བཏོན། དེ་ནས་སློབ་ཕྲུག་བཞིས་བསྟོད་པའི་གླུ་དབྱངས་འབུལ་ལམ་ཞུས། དེ་རྗེས་སློབ་གྲྭ་དེའི་སློབ་ཕྲུག་བུ་མོ་ཞིག་གིས་སྐུའི་རླབས་ཆེན་གྱི་མཛད་ཁུར་གསུམ་མཛད་སྒོར་བཅར་བའི་མི་མང་ཡོངས་ལ་ངོ་སྤྲོ་ཞུས་རྗེས་སྐུའི་མཛད་ཁུར་དེ་དག་སློབ་ཕྲུག་རྣམས་ཀྱིས་དངོས་སུ་ལག་ལེན་བསྟར་རྒྱུའི་དམ་བཅའ་ཕུལ་རྗེས་ཡིག་ཐོག་བཀོད་པའི་པར་སྒྲོམ་ཐོག་བསྒྲིགས་ཡོད་པ་སློབ་གྲྭའི་གྱང་སྟེང་དཔྱང་རྒྱུ་དེར་༸གོང་ས་མཆོག་གི་མཚན་རྟགས་ཞུས་རྗེས་སློབ་གྲྭའི་རྒན་བདག་གིས་ཀྱང་མིང་རྟགས་བཀོད།
དེ་རྗེས་དེར་འདུས་སློབ་ཕྲུག་རྣམས་ཀྱིས་སློབ་གྲྭ་དེའི་གླུ་དབྱངས་འབུལ་ལམ་ཞུས། དེ་ནས་སློབ་ཕྲུག་ཚོས་བོད་གཞས་དང་ཀ་ཤི་མིར་སོགས་ཀྱི་གཞས་སྣ་གཟིགས་འབུལ་ཞུས་རྗེས་སློབ་གྲྭའི་འཛིན་སྐྱོང་འགན་འཛིན་ན་སིར་ཁུ་ཛ་ Nasir Qazi ལགས་ནས་༸གོང་ས་མཆོག་ལ་ཕེབས་སུའི་གསུང་བཤད་གནང་བའི་ནང་། ངས་བོད་རིགས་ཁ་ཆེ་བ་ཡོངས་ཀྱི་ཚབ་ཞུས་ཏེ་ཕེབས་བསུའི་འཚམས་འདྲི་ཞུས་པ་དང་སྦྲགས་ང་ཚོ་འདི་ག་ཀ་ཤི་མིར་ལོ་ངོ་ལྔ་བཅུ་བརྒལ་བ་ཡུལ་མི་རྣམས་དང་ལྷན་བདེ་སྐྱིད་ལྡན་པའི་ངང་གནས་ཡོད་སྐོར་དང་དེ་བས་༸གོང་ས་མཆོག་དང་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་འདི་གའི་སློབ་གྲྭར་རོགས་སྐྱོར་རྒྱ་ཆེ་གནང་བར་ཐུགས་རྗེ་བཀའ་དྲིན་ཆེ་ཞེས་སོགས་ཀྱི་གསུང་བཤད་གནང་ཡོད། དེ་རྗེས་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་མཆོག་གིས་གསུང་བཤད་གནང་གྲུབ་བསྟུན།
པར་ལེན་རྡ་ས་བོད་ཀྱི་དཔེ་མཛོད་ཁང་གི་བསོད་ནམས་ཚེ་རིང་ལགས།
མངའ་སྡེའི་སྤྱི་ཁྱབ་བློན་ཆེན་ཨོ་མར་ཨབ་དུལ་ལ་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ས་གནས་འདིར་ལོ་ངོ་ཉེར་བཞིའི་རིང་ཕེབས་སྒུག་ཞུས་པ་ཡིན། ཐེངས་འདིར་༸གོང་ས་ཏཱ་ལའི་བླ་མ་མཆོག་ལ་ངས་སྙིང་ཐག་པ་ནས་ནས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་། སླད་ཀྱང་ཁུལ་འདིར་ཡང་ཡང་༸ཞབས་སོར་བཀའ་དྲིན་བསྐྱང་བའི་སྨོན་ལམ་དང་གསོལ་འདེབས་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང།
དེ་རྗེས་སྤྱི་ནོར་ ༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་བཀའ་སློབ་བཀའ་དྲིན་ཆེ་བ་སྩལ་བའི་ནང་། ངོས་རང་དུས་ཡུན་གང་ཙམ་སོང་རྗེས་ས་གནས་འདིར་ཐེངས་གཅིག་སླེབས་པར་ཧ་ཅང་དགའ་པོ་བྱུང་། དེ་བཞིན་ངོས་ཀྱི་ངོ་ཤེས་ཡི་སུབ་དང་མ་སུཌ་གཉིས་ཀྱང་ཐུག་བྱུང་ལ་སློབ་གྲྭ་འདི་ཚགས་ཚུད་པོ་ཡོད་པར་དགའ་པོ་བྱུང་། ཞེས་དང་ཡང་༸གོང་ས་མཆོག་གིས་མངའ་སྡེའི་བློན་ཆེན་མཆོག་གིས་མི་རབས་གསུམ་གྱི་ས་གནས་འདིའི་མངའ་སྡེའི་སྤྱི་ཁྱབ་བློན་ཆེན་གནང་ཡོད་ལ་ཁོང་རྣམས་དང་ཧ་ཅང་མཛའ་འབྲེལ་ཆེན་པོ་ཡོད་པ་དང་ཐེངས་འདིར་མི་རབས་བཞི་པ་ཡང་མཇལ་འཕྲད་མཛད་ཡོད་པའི་སྐོར་དང་། དེ་བཞིན་ཤེས་ཡོན་གལ་ཆེན་པོ་ཡིན་པ་སོགས་བཀའ་སློབ་ཟབ་རྒྱས་སྩལ།
དེ་རྗེས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་གྲུབ་པ་དང་སྦྲགས་༸གོང་ས་མཆོག་དང་མངའ་སྡེའི་སྤྱི་ཁྱབ་བློན་ཆེན་རྣམ་གཉིས་ཀྱིས་སློབ་གྲྭའི་མདུན་ཐང་དུ་དྲན་རྟེན་ཤིང་སྣ་འདེབས་འཛུགས་མཛད། དེ་རྗེས་གོ་སྒྲིག་ཚོགས་ཆུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཉིན་གུང་ལྗགས་སྨིན་འདེགས་འབུལ་ཞུས།
ཕྱེད་ཡོལ་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་ཁ་ཆེའི་སློབ་གྲྭའི་དགེ་རྒན་རྣམས་དང་བོད་རིགས་ཁ་ཆེའི་གཞོན་ནུའི་མཐུན་ཚོགས་ཀྱི་ཚོགས་མི་རྣམ་པ། བོད་རིགས་ཁ་ཆེ་བ་རྒན་གྲས་རྣམས་ལ་མཇལ་ཁ་དང་གསུང་མོལ། སྐུ་པར་སོགས་ལྷན་དུ་བསྒྲོན་ཏེ་ཧ་ཝེལ་བོད་རིགས་ཁ་ཆེའི་ཕྱག་འཚལ་ཁང་ངམ་ལྷ་ཁང་ལ་གནས་གཟིགས་སུ་ཆིབས་སྒྱུར་བསྐྱངས་ཏེ་ཕྱག་འཚལ་ཁང་དེར་ལྷན་དུ་སྨོན་ལམ་གསུང་འདོན་དང་བཀའ་སློབ་སྙིང་བསྡུས། ཁོང་རྣམ་པའི་ལྷན་སྐུ་པར་ཡང་བསྒྲོན་གནང་མཛད་ཡོད་པ་བཅས།།
