ཕྱི་ལོ་ ༢༠༠༨ ཟླ་ ༡༢ ཚེས་ ༥ རེས་གཟའ་པ་སངས།
༄༅། །ཕྱི་ལོ་ ༢༠༠༨ ཟླ་ ༡༢ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཡུ་རོབ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ནས་ཇི་ལྟར་གདན་ཞུ་ཕུལ་བ་ལྟར་བེལ་ཇ་ཡམ་རྒྱལ་ས་བྷ་ར་སེལ་ (Brussels)དུ་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་དང་ལྷན་དུ་ཨ་བྷི་ལེག་(Abelag Airport Inter alia)གནམ་ཐང་དུ་༸ཞབས་སོར་འཁོད་སྐབས་ཡུ་རོབ་གྲོས་ཚོགས་ཀྱི་ཚོགས་གཞོན་དང་པོ་དང་། རྒྱ་གར་གཞུང་ཚབ་དྲུང་ཆེ་དང་པོ། ཡུ་རོོབ་གྲོས་ཚོགས་ཀྱི་སྣེ་ཤན་པ་གཙོ་བོ། བཙན་བྱོལ་བོད་གཞུང་གི་ཡུ་རོབ་ཀྱི་དམིགས་བསལ་སྐུ་ཚབ་སྐལ་བཟང་རྒྱལ་མཚན་མཆོག་དང་། བོད་གཞུང་སྐུ་ཚབ་དོན་གཅོད་བྱམས་དཔལ་ཆོས་བཟང་ལགས་བཅས་ནས་ཕེབས་བསུ་གཟབ་རྒྱས་ཞུས་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བེལ་ཇ་ཡམ་སྲིད་བློན་སྐུ་ཞབས་ཝའི་ཕསེ་ལི་ཊར་མི་མཆོག་རྣམ་གཉིས་མཇལ་འཕྲད་གནང་བཞིན་པ།
ཕྱི་ཟླ་ ༡༢ ཚེས་ ༣ ཉིན་རྒྱལ་ཁབ་དེའི་སྲིད་བློན་ཝའི་ཕསེ་ལི་ཊར་མི་ (Yves Leterme)མཆོག་༸གོང་ས་༸སྐྱབས་མགོན་ཆེན་པོ་མཆོག་དང་སྲིད་བློན་གྱི་ཕོ་བྲང་དུ་མཇལ་འཕྲད་ཞུས་ཡོད་པ་རེད། དབུ་ཁྲིད་རྣམ་གཉིས་མཇལ་འཕྲད་སྐབས་༸གོང་ས་མཆོག་ནས་གཙོ་བོ་བོད་རྒྱ་འབྲེལ་མོལ་ཐེངས་བརྒྱད་པར་གྲུབ་འབྲས་ཇི་བྱུང་དང་། བོད་ཀྱི་རྩ་དོན་སླད་གསུང་མོལ་ཆུ་ཚོད་གཅིག་མིན་ཙམ་རིང་གནང་ཡོད་པ་རེད། དེ་རྗེས་གསར་འགྱུར་བརྒྱུད་ལམ་ཁག་གསུམ་ཙམ་ནས་བཀའ་དྲི་ཞུས་པར་བཀའ་ལན་མཛད་ཡོད། དེ་ཡང་རོ་ཊར་གསར་འགོད་པས་དྲི་བ་ཞུས་པར་བཀའ་ལན་ཕེབས་དོན། ཕྱི་ལོ་ ༢༠༠༢ ནས་འདི་ལོ་བར་དུ་སྐུ་ཚབ་ཐེངས་བརྒྱད་སོང་སྟེ་རྒྱ་ནག་གཞུང་གི་འཐུས་ཚབ་ལྷན་དུ་འབྲེལ་བ་བྱུང་སྟངས་དེ་དག་དང་། ༸གོང་ས་མཆོག་གི་སྐུ་ཚབ་ཚོའི་ངོས་ནས་ང་ཚོའི་དགོས་འདུན་དེ་དག་རྒྱ་ནག་གཞུང་གི་འཐུས་ཚབ་རྣམས་ལ་ཡིག་ཐོག་སྤྲད་ཡོད་པ། རྒྱ་ནག་གཞུང་གི་འཐུས་ཚབ་ནས་ཁྱེད་ཚོས་ཡིག་ཐོག་སྤྲད་པ་འདི་དག་ཕྱེད་རང་བཙན་གྱི་དམིགས་ཡུལ་དང་། རང་བཙན་སྦས་པའི་དམིགས་ཡུལ། གང་ལྟར་ཁ་བྲལ་རིང་ལུགས་ཀྱི་ལས་ཀ་བྱེད་ཀྱི་འདུག་མ་གཏོགས་དོན་དམ་པའི་རྒྱ་ནག་གི་ཆ་ཤས་ནང་སྡོད་རྒྱུའི་འདུན་པ་མིན་འདུག ཅེས་རྒྱ་ནག་གི་འཐུས་ཚབ་ནས་བོད་མིའི་སྐུ་ཚབ་རྣམས་ལ་བཤད་པ་བཅས་ཀྱི་སྐོར་གཙོ་བོ་བཀའ་ལན་ཕེབས་ཡོད། གཞན་ཡང་༸གོང་ས་མཆོག་ནས་ཕྱི་ལོ་ ༢༠༠༢ ནས་ ༢༠༠༨ ཕྱི་ཟླ་ ༡༡ ཚེས་ ༦ བར་ང་ཚོས་རྒྱ་ནག་གཞུང་ལ་དགོས་འདུན་བཏོན་ཏེ་ཐེངས་བརྒྱད་ཙམ་སྐུ་ཚབ་བར་ཐུག་འཕྲད་ཀྱིས་འབྲེལ་མོལ་བྱས་ཏེ་གྲུབ་འབྲས་ཤིག་ཡོང་གི་རེད་སྙམ་ནས་ཐུགས་རེ་གནང་སྐོར་སོགས་ཀྱི་བཀའ་ལན་ཕེབ་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཡུ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ཧན་སེ་གྷར་ཊེ་པོ་ཊི་རིང་མཆོག་ནས་ཕེབས་བསུ་ཞུ་བཞིན་པ།
དེ་ནས་བེལ་ཇ་ཡམ་དབུས་གཞུང་གི་སྲིད་བློན་གཞོན་པ་ལྕམ་སྐུ་ཇོ་ལི་མིལ་ཁུ་ཊེ་(Madame Joelle Milquet) མཆོག་ནས་ཧིལ་ཊོན་བྷ་ར་སལ་(Hilton Brussels) དུ་གདན་འདྲེན་ཞུས་པ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེར་༸ཞབས་སོར་འཁོད་དེ་ལྕམ་སྐུ་མིལ་ཁུ་ཊེ་མཆོག་ལ་བོད་ནང་གི་ད་ལྟའི་ཆབ་སྲིད་གནས་སྟངས་སྐོར་ལ་འགྲེལ་བརྗོད་གནང་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཡུ་རོབ་གྲོས་ཚོགས་སུ་བཀའ་སློབ་སྩོལ་བཞིན་པ།
དེ་རྗེས་ཉིན་རྒྱབ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བེལ་ཇ་ཡམ་ནང་གནས་སྡོད་བོད་མི་གྲངས་ ༨༠༠ ཙམ་ལ་ཞལ་མཇལ་བཀའ་དྲིན་ཆེ་བ་སྩལ་ཏེ་བཀའ་སློབ་ཕེབས་དོན། བོད་ནང་དུ་ཡོད་པའི་བོད་མི་ཚོའི་དཀའ་ངལ་དང་བསྡུར་ན་ཕྱིའི་རང་དབང་ཅན་གྱི་མང་གཙོའི་ཡུལ་གྲུའི་ནང་གནས་སྡོད་བོད་མི་ཚོར་འཕྲད་བཞིན་པའི་དཀའ་ངལ་དེ་ཆུང་ཆུང་ཡིན་སྐོར་དང་། བོད་མི་ཚོས་སོ་སོའི་སབྱིན་བདག་གི་ལུང་པའི་ནང་སྡོད་རིང་ཡུལ་དེས་སྐྱབས་བཅོལ་བ་ཚོར་བཟོས་པའི་ཁྲིམས་ལུགས་ལ་སྲུང་བརྩི་ཞུ་དགོས་པ་དང་། བོད་མི་ཞིག་ཡིན་པའི་ཆ་ནས་དམིགས་བསལ་བོད་རིགས་གཞོན་སྐྱེས་ཚོས་བོད་ཀྱི་གནའ་བོའི་རིག་གཞུང་དང་སྐད་ཡིག་མི་ཉམས་རྒྱུད་འཛིན་བྱ་རྒྱུ་གལ་ཆེན་ཡིན་པའི་བཀའ་སློབ་ལམ་སྟོན་ཟབ་མོ་ཕེབས་ཡོད་པ་རེད།
བེལ་ཇ་ཡམ་གྲོས་ཚོགས་ཀྱི་འཐུས་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུ་གཟབ་རྒྱས་ཞུ་བཞིན་པ།
དེ་རྗེས་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ནས་ཀྱང་བོད་ཀྱི་ད་ལྟའི་ཆབ་སྲིད་གནས་སྟངས་དང་། བོད་རྒྱ་འབྲེལ་མོལ་ཐེངས་བརྒྱད་པ། བོད་མིའི་དམིགས་བསལ་ཚོགས་ཆེན་དང་དེའི་གྲུབ་འབྲས། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་ཆེན་དང་དེའི་གྲུབ་འབྲས་སོགས་ཀྱི་སྐོར་ལ་འགྲེལ་བརྗོད་ཁ་གསལ་གནང་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕྱག་གཡས་སུ་བེལ་ཇ་ཡམ་གྲོས་ཚོགས་གོང་མའི་ཚོགས་གཙོ་སྐུ་ཞབས་ཨར་མན་ཌེ་ཌི་ཌིཀ་ཀར་དང་ཕྱག་གཡོན་དུ་གྲོས་ཚོགས་འོག་མའི་ཚོགས་གཙོ་སྐུ་ཞབས་ཧར་མན་ན་རོམ་པུའི་རྣམས་མཇལ་མོལ་གནང་བཞིན་པ།
ཕྱི་ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བེལ་ཇ་ཡམ་གྱི་རྒྱལ་ས་བྷ་ར་སལ་ (Brussels)དུ་རྟེན་གཞི་བྱས་པའི་ཡུ་རོབ་གྲོས་ཚོགས་སུ་གདན་འདྲེན་ཞུས་པ་ལྟར་ཆིབས་སྒྱུར་བསྐྱངས་སྐབས་ཡུ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ཧན་སེ་གྷར་ཊེ་པོ་ཊི་རིང་(Hans-Gert Poettering)མཆོག་ནས་ཕེབས་བསུ་གཟབ་རྒྱས་ཞུས་ནས་གསར་འགོད་པས་སྐུ་པར་སྒྲོན་རྗེས་ཚོགས་གཙོ་སྐུ་ཞབས་པོ་ཊི་རིང་མཆོག་གི་ལས་ཁུངས་སུ་ཆིབས་སྒྱུར་བསྐྱངས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་མཆོག་ནས་སྙན་གྲགས་ཅན་གྱི་སྐུ་མགྲོན་ཕེབས་ཐོའི་དེབ་ནང་མཚན་རྟགས་བསྐྱོན་ནས་དབུ་ཁྲིད་གཉིས་ནས་མཇལ་མོལ་གནང་སྒོ་ཚུགས་ཡོད་པ་རེད། དེ་རྗེས་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གྲོས་ཚོགས་ཀྱི་ཚོགས་ཁང་ཆེན་མོའི་ནང་ཡུ་རོབ་ཀྱི་འཐུས་མི་རྣམས་ཚང་འཛོམས་ཐོག་ཆིབས་སྒྱུར་བསྐྱངས་ཡོད་པ་དང་། ཚོགས་གཙོ་སྐུ་ཞབས་པོ་ཊི་རིང་མཆོག་ནས་ཕེབས་བསུའི་གསུང་བཤད་གནང་གྲུབ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་སྩལ་དོན། སྙན་གྲགས་དང་བརྩི་བཀུར་འོས་པའི་ཡུ་རོབ་རྒྱལ་ཚོགས་ཀྱི་ཚོགས་གཙོ་མཆོག་དང་། འཐུས་མི་རྣམ་པ་ལྷན་རྒྱས་ཚང་མར་ཞུ་རྒྱུར། དེ་རིང་འདིར་ཡང་བསྐྱར་ཁྱེད་རྣམས་དང་མཇལ་མོལ་ཞུ་རྒྱུའི་གོ་སྐབས་བྱུང་བ་འདི་ཧ་ཅང་གི་གཟི་བརྗིད་དང་དགའ་པོ་ཞེ་དྲག་བྱུང་ཐུགས་རྗེ་ཆེ་ཞུ་རྒྱུ་ཡིན། ཞེས་དང་གཞན་ཡང་བོད་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་རྒྱུའི་ཆེད་དུ་བོད་མིའི་ཕྱོགས་ནས་འཐབ་རྩོད་བྱེད་ཀྱི་ཡོད་པ་དེ་ནི་རྒྱ་ནག་ལ་མི་དགའ་བའི་འཁོན་འཛིན་བཅངས་པ་དང་ངོ་རྒོལ་བྱ་རྒྱུའི་ཆེད་དུ་མ་ཡིན་པར། དེ་ནི་འཆམ་མཐུན་གྱི་སྤྱི་ཚོགས་བསྐྲུན་རྒྱུའི་རྒྱ་ནག་གི་སྲིད་འཛིན་ཧུའུ་ཅིང་ཐའོས་སྲིད་བྱུས་ཀྱི་དམིགས་ཡུལ་དེ་བསྒྲུབ་རྒྱུར་རྒྱ་ནག་གཞུང་ལ་རོགས་སྐྱོར་བྱས་པ་ཞིག་ཡིན། ཞེས་བཀའ་སྩལ་ཡོད། དེ་ཡང་དོན་སྙིང་ལྡན་པའི་འཆམ་མཐུན་ངོ་མ་དེ་ནི་ཕན་ཚུན་ཡིད་ཆེས་དང་བརྩི་བཀུར་བྱེད་རྒྱུ་ཁོ་ན་བརྒྱུད་ནས་ཡོང་རྒྱུ་མ་གཏོགས་འཇིགས་སྣང་དང་མེ་མདའ་བསྟན་ནས་ཡོང་རྒྱུ་ཡོད་པ་མ་རེད། ཅེས་དང་དྲག་ཤུགས་ཀྱི་ཐོག་ནས་མཐུན་སྒྲིལ་བཟོ་རྒྱུ་བྱས་པ་དེ་ནི་ཡོང་ཐབས་མེད་པ་ཞིག་རེད། ཅེས་བཀའ་ཕེབས་པ་དང་སྦྲགས་ཡུ་རོབ་མཉམ་འབྲེལ་མཐུན་ཚོགས་ཀྱིས་བོད་དོན་ཐོག་ལ་རྒྱབ་སྐྱོར་མུ་མཐུད་གནང་རྒྱུ་དེ་གལ་ཆེ་ཡིན་པར་བཀའ་གནང་ཡོད། དེ་ཡང་ཁྱེད་རྣམ་པས་རྒྱ་ནག་གཞུང་དང་མཛའ་མཐུན་གྱི་འབྲེལ་བ་འཛུགས་རྒྱུ་གལ་ཆེན་པོ་ཡིན་ཡང་དེ་དང་ཆབས་ཅིག་རྒྱ་ནག་གི་སྐྱོན་དང་ནོར་འཁྲུལ་དེ་ཚོ་གསལ་པོ་བཏོན་དགོས་རྒྱུ་ཡང་གལ་ཆེན་པོ་ཡིན། ཞེས་གཞེན་སྐུལ་གནང་ཡོད། དེ་བཞིན་གྲོས་ཚོགས་སུ་༸གོང་ས་མཆོག་ནས་རླབས་ཆེན་མཛད་ཁུར་གསུམ་གྱི་སྐོར་བཀའ་སློབ་གནང་ཡོད་ཅིང་། དང་པོ་སེམས་བཟང་པོ་བྱ་རྒྱུ་སོགས་འགྲོ་བ་མི་སྤྱིའི་རིན་ཐང་གོང་མཐོར་གཏོང་རྒྱུ་དང་། གཉིས་པ་འཛམ་གླིང་ནང་གི་ཆོས་ལུགས་ཕན་ཚུན་མཛའ་མཐུན་ཡོང་ཐབས། བོད་ཀྱི་གནད་དོན་དེ་ངོས་ལ་དམིགས་བསལ་འགན་ཡོད་པ་ཞིག་ཡིན། གསུམ་པ་བོད་ཀྱི་ལོ་རྒྱུས་ནང་གི་དཀའ་ཚེགས་ཆེ་བའི་དུས་ཡུན་འདིའི་སྐབས་བོད་མི་ཚོས་ངོས་ལ་ཡིད་ཆེས་དང་རེ་བ་བྱེད་ཀྱི་ཡོད་པས་བོད་མིའི་འདོད་དོན་དེ་ངོས་ཀྱི་ཀུན་སློང་ནང་རྒྱུན་མ་ཆད་པར་ཡོད་པ་དང་ངོས་ནི་བཙན་བྱོལ་དུ་རང་དབང་ལྡན་པའི་བོད་མིའི་མགྲིན་ཚབ་པ་ཞིག་ལ་བརྩི་བཞིན་ཡོད། ཅེས་དང་རྒྱ་མིའི་ལས་བྱེད་པ་འགའ་ཞིག་གིས་ང་ཚོའི་འབད་བརྩོན་དེ་ཁ་བྲལ་ལས་འགུལ་ལ་བརྩི་བཞིན་འདུག འོན་ཀྱང་དོན་དངོས་ཐོག་དེ་འདྲ་མ་རེད། ཁོ་ཚོས་རྦད་དེ་ནོར་ཡོད། ང་ཚོས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་སྒྲིག་འཛུགས་ནང་ང་ཚོའི་ཁེ་ཕན་ཆེད་དུ་རང་སྲིད་རང་སྐྱོང་རྩོད་ཀྱི་ཡོད་པ་ཚང་མས་ཤེས་ཀྱི་ཡོད། བོད་འདི་སེམས་ཁམས་རིག་པ་དང་ཆོས་ཕྱོགས་ཐད་ཡར་ཐོན་ཅན་ཞིག་ཡིན་པ་གང་ཞིག་ལ་ཕྱི་དངོས་པོའི་ཐད་རྗེས་ལུས་ཅན་ཞིག་ཡིན་སྟབས། བོད་མི་ཚང་མས་དེང་རབས་ཅན་གྱི་བོད་ཅིག་འདོད་ཀྱི་ཡོད་པ་དང་། ཕྱི་དངོས་པོའི་ཡར་རྒྱས་ཐད་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཁོངས་སུ་གནས་ན་ང་ཚོར་ཁེ་ཕན་ཡོད་པ་རེད། དེར་བརྟེན་ང་ཚོའི་ལངས་ཕྱོགས་ནི་ཁ་བྲལ་ལས་འགུལ་མིན་པ་གསལ་པོ་བཟོ་འདོད་བྱུང་། ཞེས་དང་། ཉེ་ལམ་བོད་མིའི་དམིགས་བསལ་ཚོགས་ཆེན་སྐོང་ཚོགས་གནང་ཡོད་པའི་ནང་འཛམ་གླིང་གི་ས་ཕྱོགས་གང་ས་ནས་བོད་མིའི་འཐུས་མི་ ༦༠༠ བརྒལ་བ་དང་། དེ་བཞིན་བོད་ནང་གི་བོད་མི་ཚོས་དགོངས་འཆར་བཏོན་པ་ཁག་ལ་རྟོག་ཞིབ་གནང་རྒྱུ་ཡིན་ཞེས་བཀའ་སྩལ་ཡོད།དེ་རྗེས་ཡུ་རོབ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ཀྱི་ཚོགས་གཙོ་ཧན་སི་གྷར་ཊེ་པོ་ཊི་རིང་མཆོག་ནས། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་རྒྱ་ནག་ཐོག་འཛིན་པའི་སྲིད་བྱུས་དེ་ནི་འོས་ངེས་ཀྱི་རྩ་དོན་ཞིག་གི་ཆེད་ཞི་བདེ་དང་ཆོད་སེམས་གཏན་པོའི་ལས་འགུལ་དམིགས་བསལ་ཅན་ཞིག་ཡིན་པའི་འགྲེལ་བརྗོད་གནང་བ་དང་། རྒྱ་ནག་གི་ས་གཞི་གོང་བུ་གཅིག་གྱུར་ལ་བརྩི་བཀུར་ཞུས་པ་དང་ཆབས་ཅིག་ཡུ་རོབ་གྲོས་ཚོགས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་གླེང་སློང་གནང་ཡོད་པའི་སྐོར་ཁ་སྣོན་གནང་ཡོད། ཅེས་གསུངས་ཡོད་པ་རེད། ཡུ་རོབ་གྲོས་ཚོགས་ཀྱི་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཐོ་མ་སེ་མན་(Thomas Mann)ནས་༸གོང་ས་༸སྐྱབས་མགོན་ཆེན་པོ་མཆོག་ལ་དགོངས་སེལ་ཞུས་པ་བཞིན་ཕྱི་ཚེས་ ༣ མཚན་མོ་ནས་ཕྱི་ཚེས་ ༤ མཚན་མོ་བར་ཡུ་རོབ་གྲོས་ཚོགས་ཀྱི་ཚོགས་མི་མང་པོ་ཞིག་དང་དེ་མིན་བོད་དོན་རྒྱབ་སྐྱོར་བ་བཅས་ཁྱོན་བསྡོམས་མི་གྲངས་ ༥༠༠ ཙམ་ནས། རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་དང་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་ལ་གདུང་སེམས་མཉམ་སྐྱེ་མཚོན་ཆེད་དུ་ཆུ་ཚོད་ ༢༤ རིང་བཟས་བཅད་ངོ་རྒོལ་གནང་ཡོད་པ་རེད། དེ་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག ཆིབས་ཞབས་པ་བཅས་ནས་ཀྱང་བཟས་བཅད་ངོ་རྒོལ་ནང་མཉམ་ཞུགས་གནང་ཡོད་པ་རེད།
དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཡུ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་པོ་ཊི་རིང་མཆོག་རྣམ་གཉིས་ནས་ཡུ་རོབ་གསར་འགོད་བསྟི་གནས་སུ་གསར་འགོད་གསལ་བསྒྲགས་བསྐྱངས་ཏེ་གསར་འགོད་པ་རྣམས་ཀྱི་དྲི་བ་ཁག་ལ་བཀའ་ལན་སྩལ་ཡོད་པ་རེེད། དེ་ཉིན་ཕྱེད་ཡོལ་བེལ་ཇ་ཡམ་གྲོས་ཚོགས་འོག་མའི་ཚོགས་གཙོ་སྐུ་ཞབས་ཧར་མན་ན་རོམ་པུའི་(Herman Van Rompuy) མཆོག་དང་བེལ་ཇ་ཡམ་གྲོས་ཚོགས་གོང་མའི་ཚོགས་གཙོ་སྐུ་ཞབས་ཨར་མན་ཌེ་ཌི་ཌིཀ་ཀར་(Armand De Decker) མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕེབས་བསུ་གཟབ་རྒྱས་ཞུས་ཏེ་བེལ་ཇ་ཡམ་གྲོས་ཚོགས་ཀྱི་ཚོགས་གཙོ། ཆབ་སྲིད་ཚོགས་པ་ཁག་གི་དབུ་ཁྲིད། ཚོགས་པ་ཁག་གི་འགན་འཛིན་བཅས་ལྷན་ཚོགས་ཤིག་གནང་ཡོད་པ་རེད། ལྷན་ཚོགས་གྲུབ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་གྲོས་ཚོགས་ཀྱི་འཐུས་མི་རྣམས་ལ་བྱམས་པ་དང་སེམས་ཞི་བདེ་ཡོང་ཐབས་ལ་དོ་སྣང་གནང་དགོས་པའི་ལམ་སྟོན་གནང་རྗེས་ཁོང་རྣམས་ཀྱིས་བོད་ཀྱི་ཁོར་ཡུག་དང་། དེས་གོ་ལའི་ཚ་དྲོད་འཕེལ་བར་ཤུགས་རྐྱེན་ཐེབས་ཚུལ། གྲོས་ཚོགས་ཀྱི་ངོས་ནས་བོད་ལ་རང་སྲིད་རང་སྐྱོང་ཡོང་ཐབས་ལ་ཕན་ཐོགས་གང་བྱེད་དགོས་པ་སོགས་ཀྱི་སྐོར་ལ་དྲི་བ་ཕུལ་བ་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་གནང་ཡོད་པ་རེད།
ཐེངས་འདིའི་བེལ་ཇ་ཡམ་གྲོས་ཚོགས་ཀྱི་ལྷན་ཚོགས་ཐོག་བེལ་ཇ་ཡམ་གྱི་སྲིད་བློན་ཟུར་པ་སྐུ་ཞབས་ཌི་ཌི་ཡར་རིན་ཌར་སེ་(Didier Reynders) མཆོག་དང་། བེལ་ཇ་ཡམ་དབུས་གཞུང་གི་དཔལ་འབྱོར་བློན་ཆེན་བཅས་ཀྱང་བཅར་ཞུགས་གནང་ཡོད་པ་རེད།ཐེངས་འདིའི་ཆིབས་སྒྱུར་སྐབས་བེལ་ཇ་ཡམ་གཞུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆུ་ཚོད་ ༢༤ སྐུའི་ཉེན་སྲུང་གི་མཐུན་འགྱུར་གཟབ་ཅིང་རྒྱས་པ་གནང་ཡོད་པ་རེད།
ཕྱི་ལོ་ ༢༠༠༨ ཟླ་ ༡༢ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌི་ཡུལ་གྱི་སྲིད་འཛིན་ཟུར་པ་སྐུ་ཞབས་ལེག་ཝ་ལེན་ཛ་ལ་མཆོག་ལ་འཛམ་གླིང་སྟེང་སྙན་གྲགས་ཤིན་ཏུ་ཆེ་བའི་ནོ་བེལ་ཞི་བདེའི་གཟེངས་རྟགས་ཐོབ་ནས་ལོ་ངོ་ ༢༥ ཧྲིལ་པོ་འཁོར་བའི་དུས་དྲན་སྲུང་བརྩིའི་མཛད་སྒོར་གདན་ཞུ་ཕུལ་བ་ལྟར་ཡུལ་དེར་༸ཞབས་སོར་འཁོད་དེ་ཆོས་སྲིད་ཀྱི་མཛད་འཕྲིན་བསྐྱངས་དང་སྐྱོང་བཞིན་པའི་གནས་ཚུལ་དུ།།
