༢༠༡༢ ཟླ་ ༧ ཚེས་ ༡༠ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༨ ཉིན་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཁེ་ན་ཌ་ཁལ་གྷ་རིའི་གྲོང་ཁྱེར་ནང་གནས་སྡོད་བོད་རིགས་རྣམས་དང་ཐུག་འཕྲད་ཀྱིས་བཀའ་ཤག་གི་སྲིད་བྱུས་དང་རྒྱ་གར་ཨ་རུ་ནཱ་ཅལ་མངའ་སྡེ་ནས་བོད་མི་གཅིག་སྟོང་ཁེ་ན་ཌར་གཞིས་སྤོ་བྱ་རྒྱུའི་ལས་གཞི་དེ་བཞིན་ཧ་ཅང་གལ་ཆེ་ཡིན་པར་བརྟེན་འབྲེལ་ཡོད་བོད་མི་ཚོས་ཕྱར་གྲུ་མཉམ་འདེགས་དགོས་པའི་རེ་འདུན་བཏོན་ཡོད།
གཞན་ཡང་བཀའ་བློན་མཆོག་གིས་ཕྱི་ཚེས་ ༩ ཉིན་བོད་མི་གནས་སྤོ་བྱ་རྒྱུའི་ལས་གཞི་དང་ཐད་ཀར་འབྲེལ་བ་ཡོད་པའི་ཁེ་ན་ཌའི་ཕྱི་མི་གནས་སྤོ་དང་མི་སེར། དེ་བཞིན་རིག་གཞུང་འདྲ་མིན་མཉམ་གནས་ལས་ཁུངས་ཀྱི་བློན་ཆེན་སྐུ་ཞབས་ཇེ་སོན་ཀེ་ནེ་ Jason Kenney མཆོག་དང་མཇལ་འཕྲད་གནང་ཡོད། སྐབས་དེར་ནང་སྲིད་བཀའ་བློན་མཆོག་གིས་བོད་མི་གཅིག་སྟོང་ཁེ་ན་ཌར་གནས་སྤོ་བྱ་རྒྱུའི་ལས་གཞི་དེ་བཞིན་འགོ་བཙུགས་ཏེ་ད་བར་ལས་གཞིའི་ངོ་བོར་ཡར་རྒྱས་ཧ་ཅང་འགྲོ་བཞིན་པར་ཐུགས་རྗེ་ཞུས་པ་དང་སྦྲགས། བསྔགས་བརྗོད་ཀྱང་གནང་ཡོད། ཕྱོགས་མཚུངས་བཀའ་བློན་མཆོག་གིས་སྐབས་དེར་ཁེ་ན་ཌའི་ནང་གནས་སྡོད་བྱེད་བཞིན་པའི་བོད་མི་ཚོའི་བདེ་སྡུག་སྐོར་བགྲོ་གླེང་གནང་ཡོད།
ཕྱི་ཚེས་ ༧ ཉིན་སྲིད་བཀའ་བློན་མཆོག་གིས་ཁེ་ན་ཌའི་གྲོང་ཁྱེར་ཝན་ཁུ་ཝར་ Vancouver ནང་དུ་༸གོང་ས་མཆོག་གི་སྐུའི་འཁྲུངས་སྐར་གྱི་མཛད་སྒོར་ཕེབས་ཏེ་མང་ཚོགས་ལ་གསུང་བཤད་གནང་ཡོད། ཕྱི་ཚེས་ ༡༠ ཉིན་བཀའ་བློན་མཆོག་མོན་ཊི་རེལ་དུ་ཕེབས་ཡོད་པ་བཅས།།
