ཕྱི་ལོ་ ༢༠༠༨ ཟླ་ ༡༡ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༠༨ ཟླ་ ༡༡ ཚེས་ ༢༦ རེས་གཟའ་ལྷག་པའི་དགོང་དྲོ་ཆུ་ཚོད་ ༩ ཡས་མས་ཙམ་ལ་རྒྱ་གར་ནང་སྔར་བྱུང་མ་མྱོང་བའི་འཇིགས་སྐུལ་དྲག་སྤྱོད་པ་འགས་གྲོང་ཁྱེར་མུམ་སྦེའི་ནང་ཡོད་མགྲོན་ཁང་ཆེ་ཁག་དང་། དེ་བཞིན་མེ་འཁོར་འབབ་ཚུགས་སོགས་མདོར་ན་གྲོང་ཁྱེར་དེའི་ས་ཁག་བཅུ་སྐོར་ནང་དུས་གཅིག་དུ་མི་གསོད་ཁྲག་སྦྱོར་གྱི་འཇིགས་སྐུལ་ཤུགས་ཆེ་བྱས་རྐྱེན་མི་མང་པོ་ཞིག་ལ་སྲོག་སྐྱོན་དང་དངོས་པོར་དོ་ཕོག་ཤུགས་ཆེ་བྱུང་ཡོད་སྟབས་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༠༨ ཟླ་ ༡༡ ཚེས་ ༢༧ ཉིན་རྒྱ་གར་གྱི་སྲིད་བློན་སྐུ་ཞབས་ཌོག་ཊར་མན་མོ་ཧན་སིང་མཆོག་ལ་ཐུགས་གསོའི་གསུང་འཕྲིན་ཞིག་སྩལ་ཡོད་པ་རེད།
དེ་ཡང་གསུང་འཕྲིན་ནང་འཁོད་དོན། ཆེས་བཀུར་བར་འོས་པའི་སྐུ་ཞབས་མན་མོ་ཧན་སིང་མཆོག མདང་ནུབ་མུམ་སྦེའི་ས་ཁུལ་མང་པོ་ཞིག་ནང་འཇིགས་སྐུལ་བྱུང་ནས་མི་མང་པོར་སྲོག་སྐྱོན་དང་རྨས་སྐྱོན་བྱུང་བར་ངོས་རང་ཧ་ཅང་གི་བློ་ཕམ་དང་ཧང་སངས་བྱུང་། དེར་བརྟེན་ངོས་ཀྱིས་སྐུ་ཉིད་ལ་ཐུགས་གསོའི་འཚམས་འདྲི་ཞུ་རྒྱུ་དང་སྐུ་ཉིད་བརྒྱུད་ནས་ངན་སེམས་ཀྱི་བྱ་སྤྱོད་དེས་རྐྱེན་པས་འདས་གསོན་ཁ་བྲལ་དུ་གྱུར་བའི་གནོད་འཚེ་ཕོག་ཡུལ་རྣམས་ལ་ཐུགས་གསོའི་འཚམས་འདྲི་ཞུ་རྒྱུ་ཡིན།
ངོས་ཀྱིས་དུས་རྟག་ཏུ་རྒྱ་གར་མི་མང་གི་ནུས་ཤུགས་ལ་ཡིད་སྨོན་ཞུ་གི་ཡོད། དེར་བརྟེན་དེ་ལྟ་བུའི་མི་སྤྱོད་ལས་འདས་པའི་བྱ་སྤྱོད་དེས་ཁོང་ཚོར་ཤུགས་རྐྱེན་མ་ཐེབས་པའི་ཡིད་ཆེས་བརྟན་པོ་ཡོད། ངོས་ཀྱིས་རྒྱ་གར་མི་མང་དང་ལྷག་པར་མུམ་སྦེའི་མི་མང་རྣམས་ཀྱིས་འཇིགས་སྐུལ་རིང་ལུགས་ཀྱི་སྡིགས་ར་དང་འཚེ་བར་གདོང་ལེན་བྱེད་བཞིན་ཡོད་པར་གདུང་སེམས་མཉམ་སྐྱེ་ཡོད། ཅེས་བསྐྱར་ཟློས་ཡང་ཟློས་ཞུ་རྒྱུ་ཡིན།
ཀུན་བདེའི་སྨོན་ལམ་བཅས། ཞེས་བཀའ་སྩལ་ཡོད་པ་རེད།
ཐུགས་སྣང་།
གསུང་འཕྲིན་ངོ་མ་དེ་དབྱིན་ཡིག་ཐོག་ཡོད་པ་ནས་འདི་ག་བོད་ཡིག་ཚན་པས་ཕབ་སྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་རྩ་བ་དབྱིན་ཡིག་ལ་རྩ་འཛིན་ཡོད་པ་ཞུ།།
