༢༠༡༢ ཟླ་ ༧ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༨ ཉིན་ཆོས་རིག་བཀའ་བློན་པདྨ་ཆོས་འབྱོར་མཆོག་ཨི་ཊ་ལིའི་གྲོང་ཁྱེར་མི་ལཱ་ནོར་རྟེན་གཞི་བྱས་པའི་དགེ་འཕེལ་གླིང་ཆོས་ཚོགས་སུ་ཕེབས་འབྱོར་སྐབས་ཆོས་ཚོགས་ཀྱི་དབུ་བླ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་དང། ས་གནས་བོད་རིགས་ཚོགས་པའི་ཚོགས་གཙོ་སྐལ་བཟང་སྒྲོལ་དཀར་ལགས་ཀྱིས་གཙོས་བོད་མི་སེར་སྐྱ་ཁག་གཅིག་གིས་ཕེབས་བསུའི་སྣེ་ལེན་ཞུས། དེ་རྗེས་ཆོས་ཚོགས་ཀྱི་ཚོགས་ཁང་དུ་བཀའ་བློན་མཆོག་གིས་བོད་རིགས་རྣམས་ལ་ལམ་སྟོན་གསུང་བཤད་གནང་དོན།
ད་ལྟའི་བཀའ་ཤག་གི་འཛིན་སྐྱོང་འོག་འདས་པའི་ཟླ་བ་བཅུའི་རིང་བོད་དོན་ལ་རྒྱལ་སྤྱིའི་ཐོག་ནས་རྒྱབ་སྐྱོར་ཤུགས་ཆེ་ཐོབ་ཡོད། དཔེར་ན། ཨ་རི་དང་ཡུ་རོབ། ཉི་ཧོང་སོགས་ཀྱི་གྲོས་ཚོགས་སུ་བོད་དོན་ཆེད་རྒྱབ་སྐྱོར་གྱི་གྲོས་ཆོད་འདྲ་མིན་བཞག་ཐུབ་པ་བྱུང་བ་མ་ཟད། འདི་ལོའི་ཕྱི་ཟླ་ ༤ ནང་ཁེ་ན་ཌའི་གྲོང་ཁྱེར་ཨོ་ཊ་ཝེའི་ནང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་གྱི་ཚོགས་ཆེན་ཐེངས་ ༦ ཚོགས་ཏེ་གྲོས་ཆོད་བཞག་ཐུབ་པ་བྱུང་ཡོད། དེ་བཞིན་ཕྱི་དྲིལ་བཀའ་བློན་མཆོག་གིས་ཐེངས་དང་པོ་ཐེ་ཝན་གྲོས་ཚོགས་སུ་གསུང་བཤད་གནང་ཐུབ་པ་བྱུང་ཡོད་པ་མ་ཟད། ཕྲན་རང་ཉིད་ནས་ཀྱང་འདི་ལོ་ཕྱི་ཟླ་ ༦ ནང་ལྷོ་ཀོ་རི་ཡའི་རྒྱལ་ས་སི་ཡོལ་ནང་རྒྱལ་སྤྱིའི་ནང་པའི་ལྷན་ཚོགས་སྐབས་མཉམ་ཞུགས་བྱ་རྒྱུ་བྱུང།
ང་རང་བཀའ་ཁྲི་བློ་བཟང་སེང་གེ་མཆོག་གིས་སུད་སི་དང་ཇར་མན་ནི། ཨི་ཊ་ལི། ཨོ་སི་ཊི་རི་ཡ་བཅས་ནང་ཆེད་བཅར་གྱིས་ས་གནས་བོད་རིགས་ཚོ་དང་ཐུག་འཕྲད་ཀྱིས་༸གོང་ས་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་དགོས་པའི་བཀོད་མངགས་ལྟར་བཅར་བ་ཞིག་ཡིན། ཞེས་སོགས་ཀྱི་གསུང་བཤད་གནང་། ལྷག་པར་བཀའ་བློན་མཆོག་གིས་གསུངས་དོན། བོད་རིགས་ཚོས་རང་ཉིད་བོད་མི་ཞིག་ཡིན་པའི་ཆ་ནས་རྒྱལ་ཁབ་དང་མི་རིགས་ཀྱི་འགན་ཞིག་ཡོད་པ་དེ་དུས་ནམ་ཡང་མ་བརྗེད་པར་ཡིད་གཟབ་བྱེད་དགོས། དེ་བཞིན་རང་ཉིད་གང་དུ་གནས་སའི་ཡུལ་ཁྲིམས་ལ་བརྩི་སྲུང་དང་ལེན་གྱིས་མི་སེར་ཚུལ་ལྡན་ཞིག་ཆགས་བྱ་རྒྱུ་ཧ་ཅང་གལ་ཆེན་པོ་ཡིན།
བོད་མིའི་སྒྲིག་འཛུགས་དེ་བཞིན་མང་གཙོའི་ལམ་ནས་འོས་འདེམས་བྱས་པའི་ཁྲིམས་མཐུན་གྱི་སྒྲིག་འཛུགས་ཤིག་ཡིན། གཞན་ཡང་བོད་མི་ནང་ཁུལ་རྡོག་རྩ་ཆིག་སྒྲིལ་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བསྒྲུབ་རྒྱུར་འབད་བརྩོན་གནང་དགོས། ཞེས་གསུངས་ཡོད་པ་བཅས།།
