༢༠༡༢ ཟླ་ ༧ ཚེས་ ༩ རེས་གཟའ་ཟླ་བ།
༄༅། །བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཤི་རི་ན་གའི་ (Sirinagar) བོད་རིགས་ཁ་ཆེ་དང་ལ་དྭགས་ནང་པ་དང་དགོན་ཚོགས་བཅས་ཀྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ལོ་ ༢༠༡༢ ཟླ་ ༧ ཚེས་ ༨ རེས་གཟའ་ཉི་མའི་ཉིན་བཞུགས་སྒར་ནས་ལྡི་ལི་དང་། དེ་ནས་ཇ་མུ་ཀ་ཤི་མིར་ཤི་རི་ན་གའི་བོད་རིགས་ཁ་ཆེའི་གཞིས་ཆགས་སུ་ཆིབས་སྒྱུར་བསྐྱངས་ཡོད།
ཕྱི་ཚེས་ ༡༨ ཉིན་མགོན་པོ་གང་ཉིད་མཆོག་ལ་དྭགས་ཀྱི་གནམ་ཐང་དུ་༸ཞབས་སོར་འཁོད་སྐབས་ལ་དྭགས་ཁུལ་དུ་གནས་སྡོད་ནང་པ་དང་ཧིན་ཌུ། ཁ་ཆེ། ཡི་ཤུའི་ཚོགས་པ་སོགས་ནས་ཕེབས་བསུ་གཟབ་རྒྱས་ཞུ་རྒྱུ་ཡིན་འདུག དེ་རྗེས་གནམ་ཐང་ནས་ཞི་བའི་ཚལ་གྱི་ཕོ་བྲང་དུ་༸ཞབས་སོར་འཁོད་མཚམས་མནྜལ་རྟེན་གསུམ་འདེགས་འབུལ་ཞུས་རྗེས་གནད་ཡོད་མི་སྣ་ཁག་ལ་མཇལ་ཁ་སྩལ་རྒྱུ་དང་ལྕོག་ལམ་སར་ཆིབས་སྒྱུར་བསྐྱངས་སྐབས་ས་ཁུལ་སོ་སོའི་མི་མང་ནས་ཕེབས་བསུ་གཟབ་རྒྱས་ཞུ་རྒྱུ་ཡིན་འདུག
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཟངས་དཀར་དུ་ཉིན་གྲངས་གཉིས་རིང་དད་ལྡན་མི་མང་རྣམས་ལ་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མ་དང་། དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་བཀའ་ཆོས་སྩལ་རྒྱུ་མ་ཟད། ལ་དྭགས་སླེ་གྲོང་ཁྱེར་ཞི་བའི་ཚལ་དུ་ཉིན་གྲངས་བཞིའི་རིང་ལམ་གཙོ་རྣམ་གསུམ་དང་བྱང་ཆུབ་ལམ་སྒྲོན་གྱི་བཀའ་ཆོས། དེ་བཞིན་ཉིན་མཐའ་མར་སྤྱན་རས་གཟིགས་ཀྱི་བཀའ་དབང་སྩལ་རྒྱུ་ཡིན་འདུག
གཞན་ཡང་ལ་དྭགས་ནང་པ་དང་དགོན་ཚོགས། དགའ་ལྡན་ཁྲི་རིན་པོ་ཆེའི་བླ་བྲང་བཅས་ནས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པའི་བརྟན་བཞུགས་རྒྱས་པ་ཞིག་ཀྱང་འདེགས་འབུལ་ཞུ་རྒྱུ་ཡིན་འདུག་པ་བཅས། །
