༢༠༡༢ ཟླ་ ༧ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༨ རེས་གཟའ་ཉི་མའི་སྔ་དྲོ་ཆུ་ཚོད་ ༡༠ ཐོག་བཀའ་ཁྲི་བློ་བཟང་སེང་གེ་མཆོག་ལ་དྭགས་ཀྱི་རྒྱལ་ས་སླེའི་ Leh བྷ་ཀུ་ལ་རིན་པོ་ཆེའི་གནམ་ཐང་དུ་ཕེབས་འབྱོར་སྐབས་ས་གནས་ཉེན་རྟོག་དཔོན་རིགས་Superintendent police དང་ལ་དྭགས་བསོད་ནམས་གླིང་གཞིས་ཆགས་ཀྱི་ས་གནས་འགོ་འཛིན། ལ་དྭགས་ནང་པའི་མཐུན་ཚོགས་ཀྱི་ཚོགས་གཙོ། ས་གནས་བོད་རིགས་ཀྱི་ས་འཐུས་ཚོགས་གཙོ། རང་བདེན་ཚོགས་ཆུང་གི་ཚོགས་གཙོ། ས་གནས་གཞོན་ནུའི་ཚོགས་གཙོ། བསོད་ནམས་གླིང་གཞིས་ཆགས་ཀྱི་གྲོང་སྡེ་བཅུ་གཉིས་ཀྱི་བརྒྱ་དཔོན། ཨ་མ་ཚོགས་པའི་ཚོགས་གཙོ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་གནམ་ཐང་ནས་ཕེབས་སྐབས་ལམ་བར་དུ་བོད་མི་རྣམས་ཀྱིས་རང་ལུགས་གྱོན་ཆས་གཟབ་འཕྱོར་སྤྲད་དེ་ལག་ཏུ་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། དེ་རྗེས་ས་གནས་འགོ་འཛིན་གྱིས་བཀའ་ཁྲི་མཆོག་ལ་ས་འགོའི་ལས་ཁུངས་དང་སྨན་ཁང་སོགས་ངོ་སྤྲོད་གནང་བ་མ་ཟད། བཀའ་ཁྲི་མཆོག་གིས་གཞིས་ཆགས་ཀྱི་ས་འཐུས་གཙོས་འབྲེལ་ཡོད་ཚོགས་མི་ཁག་གཅིག་དང་ལྷན་ཐུག་འཕྲད་གནང་ཡོད། དེ་རྗེས་བཀའ་ཁྲི་མཆོག་བོད་ཁྱིམ་སྡོད་ཁང་དུ་ངལ་གསོ་གནང། དེ་ནས་བཀའ་ཁྲི་མཆོག་གིས་བསོད་ནམས་གླིང་གཞིས་ཆགས་ཀྱི་བོད་མི་རྣམས་དང་ཐུག་འཕྲད་ཀྱིས་གསུང་བཤད་གནང་དོན། ང་རང་ས་གནས་འདིར་དེ་སྔ་ཐེངས་གཉིས་སླེབ་ཐུབ་ཡོད་པ་མ་ཟད།
དེ་རིང་ཐེངས་གསུམ་པར་བཅར་ཐུབ་པར་ཧ་ཅང་དགའ་པོ་བྱུང། ཐེངས་འདིར་ངས་ལ་དྭགས་བྱང་ཐང་ཁུལ་དུ་གནས་སྡོད་བོད་མི་འབྲོག་པ་རྣམས་ཀྱི་ས་ཁུལ་ཁག་ཏུ་ཕྱིན་ཏེ་ཁོང་ཚོར་ཐུག་འདོད་ཡོད། གང་ཡིན་བརྗོད་ན། དེ་སྔ་ང་རང་ཁུལ་དེར་ཐེངས་གཉིས་ཙམ་འབྱོར་སྐབས་ཁོང་ཚོའི་གནས་སྟངས་ཕྲན་བུ་རྒྱུས་མངའ་བྱུང། ཞེས་སོགས་ཀྱི་གསུང་བཤད་གནང་བ་མ་ཟད། བཀའ་ཤག་གི་གསར་གཏོད། ཆིག་སྒྲིལ། རང་ཁ་རང་གསོ་བཅས་ལྟ་གྲུབ་གསུམ་སྐོར་ཞིབ་ཕྲ་གསལ་བཤད་གནང་རྗེས་མང་ཚོགས་ཀྱི་དྲི་བར་ལན་འདེབས་དང་གསལ་བཤད་གནང་ཡོད།
དེ་ནས་བཀའ་ཁྲི་མཆོག་གིས་ལ་དྭགས་ནང་པའི་མཐུན་ཚོགས་ཀྱི་ཚོགས་གཙོས་དབུས་འབྲེལ་ཡོད་ལ་དྭགས་མི་སྣ་གལ་ཆེ་ཁག་གཅིག་དང་ཐུག་འཕྲད་ཆེད་ཕེབས་ཏེ་ཁོང་ཚོ་དང་ལྷན་གྲོས་མོལ་ལྷུག་པོ་གནང་ཡོད། སྐབས་དེར་བཀའ་ཁྲི་མཆོག་གིས་ལ་དྭགས་དང་བོད་དབར་ཆོས་དང་རིག་གཞུང་ཐོག་ཧ་ཅང་འབྲེལ་བ་ཆེན་པོ་ཡོད་སྐོར་སོགས་གསལ་བཤད་གནང་རྗེས། འབྲེལ་ཡོད་ཚོགས་མི་རྣམས་ནས་ཀྱང་འབྱུང་འགྱུར་བོད་མིའི་སྤྱི་ཚོགས་དང་མཐུན་སྒྲིལ་རྡོག་རྩ་ཆིག་སྒྲིལ་གནང་རྒྱུའི་གསལ་བཤད་གནང་ཡོད། ཕྱི་ཚེས་ ༩ ཉིན་བཀའ་ཁྲི་མཆོག་བོད་ཁྱིམ་སློབ་གྲྭར་ཕེབས་ཏེ་སློབ་ཕྲུག་རྣམས་ལ་གསུང་བཤད་གནང་རྒྱུ་ཡིན་འདུག་པ་བཅས།།
