༢༠༡༢ ཟླ་ ༧ ཚེས་ ༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༦ སྟེ་༸བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ མཆོག་གི་ཕྱི་ལུགས་ལྟར་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་ཉིན་སྔ་དྲོ་ཆུ་ཚོད་ ༡༡།༠༠ ཐོག་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་དེ་བཞིན་རྒྱ་གར་དབུས་ཆེས་ མཐོའི་ཁྲིམས་ཁང་གི་ཁྲིམས་དཔོན་ཟུར་པ་དང་། ཀེ་ར་ལ་མངའ་སྡེའི་བློན་ཆེན་ཟུར་པ། དེ་བཞིན་ཆེས་སྙན་གྲགས་ཆེ་བའི་རྒྱ་གར་གྱི་གཟེངས་རྟགས་ Padma Vibhushan བཞེས་མྱོང་མཁན་སྐུ་ཞབས་ V. R. Krishna Iyer མཆོག་གི་གཟིམ་ཤག་ཏུ་བོད་མི་དང་། བོད་དོན་རྒྱབ་སྐྱོར་བ་ངོ་བཅར་གྱིས་ཐོག་མར་སྤྱི་འཐུས་ཀརྨ་ཡེ་ཤེས་ལགས་ཀྱིས་ ཁྲིམས་དཔོན་ཟུར་པ་མཆོག་ལ་མཇལ་དར་འབུལ་ལམ་ཞུས་པ་དང་། དེ་རྗེས་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་སྐོར་ངོ་སྤྲོད་སྙིང་ བསྡུས་ཞུས་རྗེས་ཁྲིམས་དཔོན་ཟུར་པ་མཆོག་གིས་ཕྱག་ནས་བདེན་པའི་མེ་ལྕེ་དེ་བཞིན་ སྤྱི་འཐུས་ཀརྨ་ཡེ་ཤེས་ལགས་སུ་གནང་སྟེ།
རྒྱ་གར་ལྷོ་ཕྱོགས་ནས་དབུ་འཛུགས་ཞུ་རྒྱུའི་བདེན་པའི་མེ་ལྕེ་སྐོར་བསྐྱོད་ཀྱི་ ལས་འགུལ་དེ་བཞིན་དངོས་སུ་དབུ་འབྱེད་གནང་བ་དང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་མཆོག་ལ་འབུལ་རྒྱུའི་ས་ རྟགས་བསྡུ་འགོད་ཀྱི་འགེངས་ཤོག་སྟེང་སྐུ་ཞབས་ V. R. Krishna Iyer མཆོག་ནས་མཚན་རྟགས་ཐོག་མ་དེའང་སྐྱོན་གནང་ཡོད་པ་རེད།
ཁྲིམས་དཔོན་ཟུར་པ་སྐུ་ཞབས་ V. R. Krishna Iyer མཆོག་ནས་གསར་འགོད་པའི་དྲི་བར་བཀའ་ལན་གནང་སྐབས་གསུང་དོན། “སྟོན་པ་ཤཀྱཱ་ཐུབ་པ་ནི་དཀོན་མཆོག་ནས་འགྲོ་བ་མིར་བྱིན་རླབས་གོང་ན་མེད་པ་ཞིག་ ཡིན་པ་དང་། བོད་དང་བོད་མིའི་རིག་གཞུང་གི་སྟོན་པ་ཤ་ཀྱཱ་ཐུབ་པ་མཚོན་གྱི་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་རིན་ཐང་དང་བྱམས་ བརྩེ། འགྲོ་བ་མིའི་ཐོབ་ཐང་དང་འགྲོ་བ་མིའི་རིག་གནས་བཅས་ཀྱི་ཆེད་སྐུ་ལས་བསྐྱོན་གནང་ གི་ཡོད་པ་རེད། ངས་༸གོང་ས་༸སྐྱབས་མགོན་ཆེན་པོ་མཆོག་འཛམ་གླིང་འདིའི་ནང་མཚན་སྙན་རྒྱས་པའི་ སྨོན་འདུན་ཞུ་རྒྱུ་ཡིན། ༸གོང་ས་༸སྐྱབས་མགོན་ཆེན་པོ་མཆོག་ནི་གང་ཟག་གཅིག་དང་། རྒྱལ་ཁབ་གཅིག་གི་དབུ་འཁྲིད་ལྟ་བུ་མིན། ཁོང་ནི་འཛམ་གླིང་ས་གོ་ལ་འདིའི་རིག་གནས་ཆེད་སྐུ་ལས་སྐྱོན་གནང་མཁན་སྤྱིའི་ སྐྱེས་བུ་ཞིག་ཆགས་ཡོད། ད་སྐབས་བོད་ནང་བོད་མི་རྣམས་སྡུག་སྔལ་གྱིས་མནར་ཏེ་འདས་གྲོངས་སུ་འགྲོ་དང་ འགྲོ་མུས་ཡིན་པ་དང་། བོད་མི་རྣམས་ད་ལྟའི་དུས་ཚོད་འདིར་བྲན་གཡོག་ལྟ་བུའི་ངང་གནས་བཞིན་ཡོད། ང་ཚོས་དེ་ལྟར་འགྱུར་བཅུག་རྒྱུ་མེད། བོད་མི་ཚོར་རང་དབང་ཆ་ཚང་གི་བདག་དབང་ཡོད། ང་ཚོས་དེར་རྒྱབ་སྐྱོར་བྱེད་དགོས། བོད་མི་ཚོའི་རིག་གཞུང་སྲུང་སྐྱོབ་དང་རང་དབང་རང་བཙན་ལ་རྒྱབ་སྐྱོར་བྱེད་དགོས། ང་ཚོ་ཁོང་ཚོའི་རྒྱབ་ཏུ་ཡོད། དེ་རིང་གི་ཉིན་མོ་འདི་གོང་ནས་གོང་དུ་འཕེལ་བར་ཤོག” ཅེས་བཀའ་གནང་ཡོད་པ་རེད།
དེ་རྗེས་དགུང་གྲངས་དགུ་བཅུ་གོ་ལྔ་ལ་ཕེབས་པའི་རྒྱ་གར་ཆེས་མཐོའི་ཁྲིམས་ དཔོན་ཟུར་པ་སྐུ་ཞབས་ V. R. Krishna Iyer མཆོག་གིས་ལས་འགུལ་དངོས་སུ་དབུ་འབྱེད་གནང་བ་དང་འབྲེལ། སྤྱི་འཐུས་ཀརྨ་ཡེ་ཤེས་ལགས་ཀྱིས་སྣེ་ཁྲིད་དེ་བདེན་པའི་མེ་ལྕེ་སྐོར་བསྐྱོད་ ཀྱི་ལས་འགུལ་དེ་བཞིན་ཁོང་གི་གཟིམ་ཤག་ནས་འགོ་འཛུགས་ཞུས་ཏེ། གྲོང་ཁྱེར་གྱི་མི་ཚོགས་འདུ་འཛོམས་ཆེ་ས་ཞིག་ཏུ་ཡོད་པའི་མེས་པོ་དམ་པ་གྷན་ རྡིའི་སྐུ་བརྙན་ཡོད་ས་བར་བོད་མི་དང་བོད་ཀྱི་གྲོགས་པོ་ཚོགས་པའི་ཚོགས་གཙོས་ དབུས་རྒྱུན་ལས་དང་། ས་གནས་འགའ་ནས་ཕེབས་པའི་བོད་དོན་རྒྱབ་སྐྱོར་བ་བཅུ་ཕྲག་བརྒལ་བས་མཉམ་ཞུགས་འོག་ གོམ་བགྲོད་ཀྱིས་སྐོར་བསྐྱོད་བྱས་པ་དང་། མེས་པོ་དམ་པ་གྷན་རྡིའི་སྐུ་བརྙན་ཡོད་སར་འབྱོར་སྐབས་དང་ཐོག་སྤྱི་འཐུས་ཀརྨ་ ཡེ་ཤེས་ལགས་ནས་གྷན་རྡིའི་སྐུ་བརྙན་ལ་མཇལ་དར་སྒྲོན་འབུལ་ཞུས། དེ་རྗེས་བདེན་ཚིག་སྨོན་ལམ་དང་། ༸རྒྱལ་བའི་ཞབས་བརྟན་འུར་འདོན་དང་། མཐར་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ། ལས་འགུལ་མཇུག་སྒྲིལ་ཞུས་པ་དང་། སྐབས་དེར་ས་གནས་མི་མང་ཚོས་ཐུགས་སྣང་ཆེན་པོ་གནང་ཡོད་པས་མ་ཟད། བརྒྱུད་ལམ་འདྲ་མིན་གྱི་གསར་འགོད་པ་མང་པོས་ཀྱང་ལྷན་ཞུགས་གནང་ཡོད་པ་རེད།
གཞན་ཡང་ཕྱི་ཚེས་ ༥ ཉིན་ཀོ་ཅི་ལ་རྟེན་གཞི་བྱས་པའི་ཨར་ན་ཀུ་ལམ་གསར་འགོད་མཐུན་ཚོགས་ཀྱི་ཚོགས་ཁང་ ནང་། བོད་མི་མང་སྤྱི་འཐུས་ལྷན་ཚོགས་ཀྱི་དབུ་འཁྲིད་པའི་བདེན་པའི་མེ་ལྕེ་སྐོར་ བསྐྱོད་ཀྱི་ལས་འགུལ་སྐོར་གསར་འགོད་ལྷན་ཚོགས་ཤིག་སྐོང་ཚོགས་གནང་བ་དང་། དང་ཐོག་འདི་གའི་རྒྱ་གར་བོད་ཀྱི་གྲོགས་པོ་ཚོགས་པའི་ལས་འགུལ་འབྲེལ་མཐུད་པ་ སྐུ་ཞབས་ V. J. Jose ལགས་ཀྱི་ཡུལ་སྐད་ཐོག་ངོ་སྤྲོད་ཅུང་ཙམ་གནང་རྗེས། བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་གོ་སྒྲིག་ཚོགས་ཆུང་གི་འཐུས་མི་ སྤྱི་འཐུས་ཀརྨ་ཡེ་ཤེས་ལགས་ནས་དབྱིན་སྐད་ཐོག་བདེན་པའི་མེ་ལྕེ་སྐོར་བསྐྱོད་ ཀྱི་རྒྱབ་ལྗོངས་དང་། ད་ལྟའི་བོད་ནང་གི་གནས་སྟངས། ལས་འགུལ་གྱི་ལས་རིམ། ལས་འགུལ་གྱི་དམིགས་ཡུལ། ལས་འགུལ་གྱི་དགོས་འདུན་བཅས་འགྲེལ་བཤད་གནང་གྲུབ་མཚམས། བདེན་པའི་མེ་ལྕེ་དངོས་སུ་གསར་འགོད་པར་མིག་བཏོན་དང་འབྲེལ། གསར་འགོད་པའི་དྲི་བར་ལན་འདེབས་ཀྱང་གནང་ཡོད་པ་རེད།
ད་རེས་ཀྱི་གསར་འགོད་ལྷན་ཚོགས་འདིའི་ཐོག་གསར་ཤོག་དང་། དྲ་རྒྱ། གཟུགས་མཐོང་བརྙན་འཕྲིན་བཅས་གསར་འགྱུར་བརྒྱུད་ལམ་འདྲ་མིན་ནས་གསར་འགོད་པ་མི་ གྲངས་ ༢༠ ལྷག་མཉམ་ཞུགས་གནང་ཡོད་པས་མ་ཟད། ཁུལ་འདིའི་བརྒྱུད་ལམ་ཕལ་ཆེ་བའི་ནང་གནས་ཚུལ་ཡང་རྒྱ་ཆེ་ཐོན་ཐུབ་པ་བྱུང་ཡོད།
ཀོ་ཅི་ཁུལ་གྱི་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་གྲུབ་མཚམས་མེ་ ལྕེ་དེ་བཞིན་ Tamil Nadu མངའ་སྡེའི་གྲོང་ཁྱེར་ Coimbatore གསར་འགོད་མཐུན་ཚོགས་ཀྱི་ཚོགས་ཁང་ནང་གསར་འགོད་ལྷན་ཚོགས་ཤིག་སྐོང་ཚོགས་ཞུ་ རྒྱུ་དང་། གྲོང་ཁྱེར་ནང་སྐོར་བསྐྱོད་ཞུ་རྒྱུ་མ་ཟད། དེ་རྗེས་སླར་ཡང་བདེན་པའི་མེ་ལྕེ་དེ་བཞིན་རྒྱ་གར་ལྷོ་ཕྱོགས་ཀྱི་གྲོང་ཁྱེར་ འདྲ་མིན་ནང་རིམ་བཞིན་སྐོར་བསྐྱོད་བྱ་རའཆར་ཡོད་པའི་གནས་ཚུལ་སྙིང་བསྡུས་སུ།
གནས་ཚུལ་མཁོ་གཏོང་བ་ཀོ་ཆི་ས་གནས་ནས་བོད་མི་མང་སྤྱི་འཐུས་ཀརྨ་ཡེ་ཤེས།
