ཕྱི་ལོ་ ༢༠༠༨ ཟླ་ ༡༢ ཚེས་ ༥ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་ནང་འཁོད་དོན།
འཛམ་གླིང་ས་ཕྱོགས་གང་ས་ནས་ཕེབས་པའི་བོད་དོན་རྒྱབ་སྐྱོར་བ་ཚོས་རྒྱ་གར་ནང་ཚོགས་ཆེན་ཚོགས་བཞིན་ཡོད་པར་ངོས་རང་དགའ་ཚོར་ཆེན་པོ་བྱུང་། ངོས་ཀྱིས་ཐག་རིང་ནས་ཆེད་ཕེབས་ཚོགས་བཅར་ཞུ་མཁན་ཡོངས་ནས་བོད་ཀྱི་ལས་འགུལ་དེ་དག་མདུན་བསྐྱོད་གནང་ཕྱོགས་ཐད་གྲོས་མོལ་གནང་སྟེ་བོད་མིའི་དཀའ་སྡུག་མཇུག་སྒྲིལ་ཡོང་ཐབས་གནང་བཞིན་ཡོད་པར་ཐུགས་རྗེ་ཆེ་ཞུ་རྒྱུ་ཡིན། བོད་ཀྱི་གནད་དོན་དང་བཟང་སྤྱོད་བཅས་དྲང་བདེན་དང་འབྲེལ་བའི་གནད་དོན་ཞིག་རེད། ངོས་ཀྱིས་དུས་རྟག་ཏུ་ཞུས་དང་ཞུ་མུས་ལྟར་ང་ཚོས་ཁྱེད་རྣམས་བོད་མིའི་ཕྱོགས་གཏོགས་པ་ཞིག་ལ་ངོས་འཛིན་ཞུ་གི་མེད། ང་ཚོས་ཁྱེད་རྣམས་དྲང་བདེན་གྱི་ཕྱོགས་གཏོགས་པ་ཞིག་ལ་ངོས་འཛིན་ཞུ་བཞིན་ཡོད། བོད་ཀྱི་གནད་དོན་དེ་བོད་མིའི་ཐོབ་ཐང་གི་གནད་དོན་ཙམ་ཞིག་མ་ཡིན་པར་རྒྱལ་སྤྱིའི་རྣམ་པ་ཅན་གྱི་གནད་དོན་ཞིག་ཀྱང་ཡིན། བོད་ཀྱི་སྲོལ་རྒྱུན་རིག་གཞུང་ནི་ནང་པ་སངས་རྒྱས་པའི་འཚེ་མེད་ཞི་བ་དང་བྱམས་སྙིང་རྗེར་རྩ་འཛིན་བྱས་པ་ཞིག་ཡིན། དེར་བརྟེན་དེས་བོད་མི་ས་ཡ་དྲུག་ཙམ་མ་ཡིན་པར་འཛམ་གླིང་འདིའི་སྟེང་གི་མི་མང་ས་ཡ་ ༡༣ བརྒལ་བས་ཞི་བདེ་དང་མཐུན་སྒྲིལ་བསྐྲུན་ཐུབ་རྒྱུའི་ནུས་པ་ལྡན་པའི་རིག་གཞུང་དེ་མཉམ་སྤྱོད་བྱེད་བཞིན་ཡོད། གཉིས་པ། བོད་ཀྱི་གནད་དོན་དེ་ནི་ཉམས་རྒུད་དུ་འགྲོ་བཞིན་བོད་ཀྱི་ཁོར་ཡུག་དང་འབྲེལ་བ་ཡོད་པ་ཞིག་ཡིན་དུས་ཚན་རིག་པ་ཚོས། མི་མང་ཐེར་འབུམ་མང་པོ་གནས་སྡོད་བྱེད་བཞིན་པའི་ས་ཁུལ་ཁག་ལ་ཤུགས་རྐྱེན་ཐེབས་ཀྱི་ཡོད། ཅེས་མཇུག་བསྡོམས་གནང་ཡོད་པ་རེད། གསུམ་པ། བོད་ཀྱི་གནད་དོན་དེ་རྒྱ་གར་དང་རྒྱ་ནག་རྒྱལ་ཁབ་ཆེན་པོ་གཉིས་ལ་ཤུགས་རྐྱེན་ཐེབས་ཀྱི་ཡོད། དོན་དང་ལྡན་པའི་ཐབས་ལམ་ཞིག་གི་ཐོག་ནས་བོད་ཀྱི་གནད་དོན་དེ་སེལ་ཐུབ་ན་དེས་འཛམ་གླིང་ནང་གསུམ་ཆ་གཉིས་ཀྱི་མི་འབོར་ཡོད་པའི་རྒྱལ་ཁབ་ཆེ་ཤོས་དེ་གཉིས་དབར་ལ་ཞི་བདེ་བསྐྲུན་ཐུབ་ཀྱི་རེད། མང་གཙོའི་ལམ་གྱི་ཐོག་ནས་འོས་འདེམས་བྱས་པའི་ང་ཚོའི་ཆབ་སྲིད་ཀྱི་དབུ་ཁྲིད་རྣམས་ནས་ཉེ་ཆར་ཚོགས་པས་བོད་མིའི་དམིགས་བསལ་ཚོགས་ཆེན་གྱི་གྲུབ་འབྲས་ཁྱེད་རྣམས་ལ་འགྲེལ་བརྗོད་གནང་གི་རེད། ངོས་ཀྱིས་ཚོགས་ཆེན་དེ་ཚོགས་རྒྱུའི་བསམ་འཆར་བཏོན་པ་ཡིན། དེ་འདྲ་ཡིན་དུས་ང་ཚོས་འོས་འདེམས་བྱས་པའི་དབུ་ཁྲིད་ཚོར་བོད་མིའི་བསམ་ཚུལ་འདྲ་མིན་ཁག་དང་། ལྷག་པར་བོད་ནང་ཇེ་ཞན་ཇེ་སྡུག་ཏུ་འགྲོ་བཞིན་པའི་གནས་སྟངས། དེང་གི་རྒྱལ་སྤྱིའི་གནས་བབ། དེ་བཞིན་བོད་ཀྱི་གནད་དོན་ཐད་ཡར་རྒྱས་གོང་འཕེལ་ཡོང་སླད་ཐབས་ལམ་འདྲ་མིན་བཅས་ཀྱི་ཐོག་ཤེས་རྟོགས་ཆ་ཚང་ཞིག་བྱུང་ཡོད་པ་རེད། ངོས་ཀྱིས་ཁྱེད་རྣམས་ཚང་མས་སྲོང་པོ་དང་ཕྱོགས་ལྷུང་མེད་པའི་ཐོག་ནས་བོད་མིའི་དམིགས་བསལ་ཚོགས་ཆེན་ཐོག་བྱུང་བའི་རྒྱབ་གཉེར་སྙན་ཐོར་གཞིར་བཞག་ཐོག་བོད་ཀྱི་ལས་འགུལ་དང་འབྲེལ་བའི་མ་འོངས་པའི་བྱེད་ཕྱོགས་ཇི་དགེའི་གྲོས་བསྡུར་ཞིབ་ལྷུག་གནང་བའི་རེ་བ་བྱེད་ཀྱི་ཡོད། ཁྱེད་རྣམས་ཀྱིས་ང་ཚོས་མང་མོས་འོས་བསྡུ་བྱས་པའི་དབུ་ཁྲིད་རྣམས་ལ་བོད་མི་ཚོའི་མངོན་འདོད་སྒྲུབ་ཐབས་ཡག་ཤོས་ཇི་ཡོད་སྐོར་ལ་དགོངས་འཆར་གནང་རོགས། ཞེས་ཞུ་རྒྱུ་ཡིན། ཁྱེད་ཚོའི་ཚོགས་འདུ་འདི་བོད་ཀྱི་སྤྱི་ཚོགས་དང་བོད་མིའི་ཛ་དྲག་གཉན་འགངས་ཆེ་བའི་དུས་སྐབས་ཤིག་བརྒྱུད་བཞིན་པའི་སྐབས་དེ་འདྲ་ཞིག་བརྒྱུད་པའི་དུས་སྐབས་འདིར་སྐོང་ཚོགས་གནང་གི་ཡོད་པ་རེད། འདི་ལོའི་ཕྱི་ཟླ་ ༣ ནས་བཟུང་བོད་མི་ཚོས་སྙིང་སྟོབས་ཆེན་པོའི་སྒོ་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་སྲིད་བྱུས་ལ་འདོད་བློ་མི་ཁེངས་པ་དང་ཡུན་རིང་སྙིང་ལ་བཅངས་པའི་ཁོང་ཁྲོའི་རྣམ་འགྱུར་དེ་དག་ཕྱིར་བཏོན་བྱས་ཡོད་པ་རེད། མི་མང་གི་འདུན་པ་གལ་ཆེ་ཤོས་སུ་བརྩིས་མཁན་རྒྱལ་ཁབ་གང་འདྲ་ཞིག་ཡིན་རུང་གནད་དོན་དེའི་ཚབས་ཆེན་རང་བཞིན་དུ་ངོས་འཛིན་ཐུབ་པ་མ་ཟད། བོད་ནང་གི་གནས་སྟངས་དེ་བཅོས་ཐབས་ཀྱི་ཐབས་ལམ་ཞིག་ཀྱང་བསྟན་ངེས་རེད། ཡིན་ནའང་རྒྱ་ནག་གཞུང་གིས་ལག་ལེན་དེ་ལྟར་བོད་ཀྱི་གྲོང་སྡེ་དང་གྲོང་ཁྱེར་དུ་མའི་ནང་ཉེན་རྟོག་དང་དམག་མི་ཕོན་ཆེ་བཞག་སྟེ་བོད་ཀྱི་གནས་སྟངས་མུ་མཐུད་ནས་ཐབས་སྡུག་གི་གནས་སུ་གྱར་ཡོད། བོད་ཀྱི་ས་ཁུལ་འགའ་ཞིག་ནང་དྲག་པོའི་ཁྲིམས་རྒྱ་བསྡམས་པའི་སྒོ་ནས་དབང་བསྒྱུར་བྱེད་བཞིན་པའི་རྣམ་པ་ཞིག་མངོན་བཞིན་པ་དང་། བོད་མི་རྣམས་དམ་བསྒྲགས་ཆེན་པོའི་འོག་གནས་ཡོད། དེར་བརྟེན་དེང་གི་ཆར་བོད་ནང་གི་བོད་མིའི་འཚོ་བའི་གནས་སྟངས་ཛ་དྲག་ཆེན་པོར་གྱུར་ཡོད་པས་ཁོང་ཚོར་བོད་དོན་རྒྱབ་སྐྱོར་བ་ཚོས་རོགས་རམ་ཇི་ཐོན་གནང་ཐུབ་པ་དེ་དག་དགོས་ངེས་ཆགས་ཡོད་པ་རེད། ཁྱེད་རྣམས་ཚང་མས་མཁྱེན་གསལ་ལྟར། ངོས་ཀྱིས་ལྷག་བསམ་རྣམ་དག་གིས་རྒྱ་གཞུང་གི་འགོ་ཁྲིད་ཚོ་དང་ཕན་ཚུན་གཉིས་ཕན་གྱི་ཐབས་ལམ་ཐོག་ནས་བོད་ཀྱི་གནད་དོན་སེལ་ཐབས་བྱས་པ་ཡིན། ངོས་ཀྱི་སྐུ་ཚབ་རྣམས་ནས་ཁ་གསལ་པོའི་ཐོག་ནས་རྒྱ་གཞུང་གི་དཔོན་རིགས་ཚོར་ངོས་ཀྱི་ཁས་ལེན་བྱས་པའི་དབུ་མའི་ལམ་གྱི་ཐོག་ནས་བོད་མི་མང་གི་མངོན་འདོད་དང་། དེ་བཞིན་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་མཐུན་སྒྲིལ་དང་བརྟན་ལྷིང་སེམས་ཁུར་བྱེད་ཀྱི་ཡོད་པའི་སྐོར་ཞུས་ཡོད་པ་རེད། ཕྱི་ལོ་ ༢༠༠༢ ལོར་བོད་རྒྱ་འབྲེལ་ལམ་བསྐྱར་གསོ་བྱུང་རྗེས་ངོས་ཀྱིས་གྲུབ་འབྲས་ཤིག་ཐོན་རེ་བྱས་པ་ཡིན། ངོས་ཀྱི་སྐུ་ཚབ་ཚོས་རྒྱ་གཞུང་གི་འགོ་ཁྲིད་ཚོར་བོད་རྒྱ་འབྲེལ་མོལ་ཐེངས་བརྒྱད་པའི་སྐབས་བོད་མིའི་མངོན་འདོད་གང་ཡིན་འགྲེལ་བརྗོད་གནང་ཡོད་པ་རེད། ཐོབ་ཐང་དེ་ཡང་རྒྱ་ནག་གཞུང་གི་རྩ་ཁྲིམས་ནང་གསལ་ཡོད་པ་ཞིག་རེད། བློ་ཕམ་དགོས་པ་ཞིག་ལ་ངོས་ཀྱི་སྐུ་ཚབ་རྣམས་ལ་དོན་དང་ལྡན་པའི་སྐད་ཆ་ཤོད་རྒྱུའི་སྒོ་ཚང་མ་བརྒྱབ་ཡོད་འདུག རྒྱ་གཞུང་གིས་ངོས་སྒེར་གྱི་ཁེ་ཕན་ཁོ་ནའི་ཐད་སྐད་ཆ་བཤད་འདོད་ཡོད་པ་ཞིག་རེད་འདུག བོད་ཀྱི་གནད་དོན་དེ་བོད་མི་མང་ཡོངས་ཀྱི་བདེ་དོན་དང་འབྲེལ་བ་ཡོད་པ་ཞིག་ལས་ངོས་སྒེར་གྱི་གནད་དོན་ཞིག་རྩ་བ་ནས་མིན། དེར་བརྟེན་བོད་མི་རྣམས་ནས་ཆིག་སྒྲིལ་གྱི་ཐོག་ནས་བོད་སྤྱི་ཡོངས་ཀྱི་ཁེ་ཕན་ཐད་བསམ་བློ་བཏང་ནས་དེ་བཞིན་ཐག་གཅོད་བྱེད་དགོས་ཀྱི་རེད། ཡིན་ནའང་བོད་མིའི་འབོད་སྒྲ་ཁོ་ནས་རྒྱ་ནག་གཞུང་གི་འགོ་ཁྲིད་ཚོའི་མཁྲེགས་བཟུང་གི་ལངས་ཕྱོགས་དང་སྲིད་བྱུས་ལ་འགྱུར་བ་གཏོང་རྒྱུའི་སྐུལ་མ་བྱ་རྒྱུར་འདང་གི་མེད་ཅིང་། རྒྱལ་སྤྱིའི་སྤྱི་ཚོགས་ཀྱི་བོད་མིའི་དཀའ་སྡུག་སེལ་རྒྱུར་ཕན་གྲོགས་ཆེད་མུ་མཐུད་དེ་འབད་བརྩོན་གནང་རོགས་ཞུ་རྒྱུ་དང་། འདིའི་ཐད་འཛམ་གླིང་ཁྱོན་གྱི་བོད་དོན་རྒྱབ་སྐྱོར་ཚོགས་པ་ཁག་གིས་གནད་ཆེའི་ལས་དོན་སྒྲུབ་ཐུབ་ངེས་ཡིན། མཐའ་དོན་བོད་དོན་རྒྱབ་སྐྱོར་ཚོགས་པའི་ཚོགས་མི་ཡོངས་ནས་བོད་མི་ཚོར་དགོས་མཁོ་ཆེ་བའི་སྐབས་དེར་ང་ཚོའི་ཕྱོགས་སུ་ལངས་པར་བཀའ་དྲིན་ལྷག་པར་ཆེ་ཞུ་རྒྱུ་ཡིན། ཁྱེད་རྣམས་ནི་ང་ཚོའི་རྒྱབ་སྐྱོར་གྱི་འབྱུང་ཁུངས་གཙོ་བོ་ཞིག་ཡིན་པ་དང་། འབྱུང་འགྱུར་གྱི་ལོ་ཟླའི་ནང་ཁྱེད་རྣམས་ཀྱིས་ང་ཚོའི་ཆེད་དུ་འབད་བརྩོན་མུ་མཐུད་གནང་རྒྱུ་ཙམ་མ་ཟད། དེ་བས་ཀྱང་འབད་བརྩོན་བྱེད་ཤུགས་ཆེ་རུ་གཏོང་ངེས་ཡིན་པར་ཐེ་ཚོམ་མེད། ཅེས་ལམ་སྟོན་བཀའ་སློབ་སྩལ་ཡོད།།
