༢༠༡༢ ཟླ་ ༦ ཚེས་ ༣༠ རེས་གཟའ་སྤེན་པ།

༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་སིམ་ལར་ཧི་མཱ་ཅལ་མངའ་སྡེའི་བློན་ཆེན་སྐུ་ཞབས་པེ་རེམ་ཀུ་མཱར་ཌུ་མལ་མཆོག་དང་མཇལ་འཕྲད་ཀྱིས་ས་གནས་བོད་མིའི་བདེ་སྡུག་དང་འབྲེལ་བའི་གནད་དོན་སྐོར་གླེང་མོལ་ལྷུག་པོ་གནང་ཡོད་པ་མ་ཟད། བཀའ་བློན་མཆོག་གིས་བློན་ཆེན་མཆོག་ལ་ཧི་མཱ་ཅལ་མངའ་གཞུང་གིས་ཉེ་ལམ་རྒྱལ་བ་ཀརྨ་པ་རིན་པོ་ཆེ་མཆོག་གི་མཚན་ཁྲིམས་འགལ་གྱི་དངུལ་གསོག་འཇོག་བྱས་པའི་ཉེས་མིང་ནང་འཁོད་ཡོད་པ་དེ་ཕྱིར་འཐེན་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་ཡོད།

དེ་ཉིན་སྔ་དྲོ་ཆུ་ཚོད་ ༡༡ ཐོག་ནང་སྲིད་བཀའ་བློན་མཆོག་གིས་སིམ་ལར་རྟེན་གཞི་བྱས་པའི་བསྟན་འཛིན་སྨན་ཁང་དུ་ཕེབས་ཏེ་གཟིགས་ཞིབ་གནང་ཡོད། སྨན་ཁང་དེ་ནི་སིམ་ལའི་ནང་གི་བོད་མི་གཏོང་ཕོད་ཅན་སྐུ་ཞབས་བསྟན་འཛིན་ལགས་ཀྱིས་བཙུགས་པ་ཞིག་ཡིན་པ་དང་ཁོང་ནི་དེང་སྐབས་སིམ་ལ་དབྱངས་ཅན་དགའ་ཚལ་གླིང་གི་ས་གནས་གྲོས་ཚོགས་ཀྱི་ཚོགས་གཙོ་ཡིན་འདུག

དེ་རྗེས་ཆུ་ཚོད་ ༡༢ ཐོག་ནང་སྲིད་བཀའ་བློན་མཆོག་གིས་ཧི་མཱ་ཅལ་མངའ་གཞུང་གི་སྤྱི་ཚོགས་དྲང་བདེན་དང་ནུས་ཤུགས་སྐྱེད་སྲིང་ལས་ཁུངས་ཀྱི་དྲུང་ཆེ་ལས་འཕར་སྐུ་ཞབས་དཱས་མཆོག་དང་ཐུག་འཕྲད་གནང་སྟེ་མངའ་སྡེའི་ནང་བོད་མི་ཚོར་ས་ཆ་བོགས་གན་ (Land Lease) བཏང་བའི་སྐོར་གྲོས་མོལ་གནང་ཡོད།
དེ་བཞིན་ཕྱེད་ཡོལ་ཆུ་ཚོད་ ༣ ཐོག་ཧི་མཱ་ཅལ་མངའ་སྡེའི་ཀོང་རེ་སི་ཚོགས་པའི་ (Congress Party) ཚོགས་གཙོ་སྐུ་ཞབས་ཀོལ་སིངྒ་ཐཱ་ཀུར་མཆོག་དང་མཇལ་འཕྲད་གནང་ཡོད་པ་བཅས།།