༢༠༡༢ ཟླ་ ༦ ཚེས་ ༢༩ རེས་གཟའ་པ་སངས།
༄༅། །འདི་གར་བོད་མི་མང་སྤྱི་འཐུས་འཇམ་དབྱངས་བཟོད་པ་ལགས་ཀྱིས་ཕྱི་ལོ་ ༢༠༡༢ ཟླ་ ༦ ཚེས་ ༢༩ ཉིན་བཏང་གནས་ནང་འཁོད་དོན། དཀར་མཛེས་རྫོང་ཀ་ར་ཤང་ཤོང་ཀ་སྡེ་པ་ནས་ཡིན་པ། ཕ་ཆོས་ཀྱི་ཉི་མ་དང་མ་ཨ་བསོད་ལྷ་མོ་གཉི་ཀྱི་བུ་མོ་རང་ལོ་ ༡༧ ལ་སོན་པ་འཇིགས་མེད་སྒྲོལ་མ་ལགས་ཀྱིས། ཕྱི་ལོ་ ༢༠༡༢ ཟླ་ ༦ ཚེས་ ༢༤ ཉིན་བོད་ནང་གི་ཆུ་ཚོད་ ༡༡ ཡོལ་ཙམ་ལ། དཀར་མཛེས་མཐིལ་གྱི་ཁྲོམ་གཞུང་དུ་༸རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས། བོད་ལ་རང་དབང་དགོས། པཎ་ཆེན་རིན་པོ་ཆེས་གཙོས་ཆབ་སྲིད་བཙོན་པ་རྣམས་གློད་བཀྲོལ་གཏོང་དགོས། ཞེས་རྒྱ་གཞུང་ལ་ངོ་རྒོལ་གྱི་སྐད་འབོད་སྐར་མ་བཞི་ཙམ་བརྒྱབ་རྗེས་ས་གནས་ཉེན་རྟོག་པས་འཛིན་བཟུང་བྱས་འདུག
བུ་མོ་འཇིགས་མེད་སྒྲོལ་མ་ལགས་སུ་གཅུང་མོ་གཉིས་ཡོད་འདུག་པ་དང་། ཁོང་་མོའི་ཨ་ནེ་བཙུན་མ་བུ་མོ་བཀྲ་དགའ་ཕྱི་ལོ་ ༢༠༠༨ ལོའི་ཞི་རྒོལ་ནང་ཞུགས་ཏེ་ལོ་གཉིས་ལྷག་ཙམ་བཙོན་འཇུག་བྱས་ཡོད་པ་དང་། བཙོན་གྲོལ་ཐོབ་ནས་བཙུན་དགོན་བྲག་དཀར་དགོན་པར་ཞུགས་ཐུབ་མེད་ཀྱང་། མཚམས་ལ་བསྡད་ནས་ཡུན་རིང་མ་སོང་བར་ནད་ཀྱིས་མནར་ཡོད་པ་དང་། རྒྱ་ནག་ཏུ་སྨན་བཅོས་ལ་འཁྲིད་སྐབས་ཕྱི་ལོ་ ༢༠༠༨ ལོའི་བཙོན་འཇུག་གི་སྐབས་ཕོག་པའི་ན་ཚ་ཡིན་པ་ངོས་འཛིན་ཐུབ་ཡོད་འདུག ད་ལྟའི་ཆར་ནད་གཅོང་ཆགས་ཡོད་པའི་ཐོག་ནང་དུ་བཟང་བཙོན་ལྟ་བུར་ས་གནས་སྲིད་གཞུང་ལ་ང་བསྡད་ཡོད། ངས་ནག་ཉེས་བསགས་ཡོད་ཟེར་བ་སོགས་བརྗོད་ནས་ཐོ་འགོད་བྱེད་པར་བསྐྱོད་དགོས་ཀྱི་ཡོད་འདུག སྐད་འབོད་བརྒྱབ་པའི་ཉིན་དེར་ཁོང་མོས་ཕ་མ་གཉིས་ལ་ཞིང་ཁའི་ནང་ལས་ཀ་འགྲོ་ཡི་ཡིན་ཞེས་བརྗོད་དེ་ནང་ནས་ཐོན་ཡོད་པ་དང་། དཀར་མཛེས་མཐིལ་དུ་འབྱོར་ནས་སྐད་འབོད་རྒྱག་སྐབས་གཡས་གཡོན་གྱི་མི་མང་པོས་མིག་མཐོང་ལག་ཟིན་བྱུང་ཡོད་འདུག
དེ་ནས་ཕ་ཆོས་ཀྱི་ཉི་མས་ཉེན་རྟོག་པ་ལ་འབྲེལ་བ་བྱས་ཏེ་བུ་མོ་ཐུག་ཐབས་སུ་འབད་རྩོན་བྱས་ཡོད་ཀྱང་ཐུབ་མི་འདུག ཟླ་འདིའི་ཕྱི་ཚེས་་ ༢༨ ཉིན་བུ་མོ་སྨན་ཁང་དུ་འཁྲིད་རྒྱུ་ཡིན་པའི་སྐོར་གོ་ཐོས་བྱུང་བར་བརྟེན། སྨན་ཁང་དང་ཉེ་སར་སོང་ནས་སྒོ་འགྲམ་དུ་སྒུག་ཡོད་པ་དང་། ས་གནས་ཉེན་རྟོག་པས་བུ་མོ་སྨན་ཁང་དུ་འཁྲིད་པའི་ཞོར་ལ་ཕས་མཐོང་ཡོད་པ་ནི། ཁོང་མོའི་ལག་པར་རས་དཀྲིས་ཡོད་པ་དང་སྐེད་པ་འགྱིང་འགྱིང་བྱེད་མི་ཐུབ་པ། རྐང་པ་འཐེང་ནས་འགྲོ་ཡི་འདུག་ཅེས་དང་། དེ་བཞིན་ཕྱི་ཚེས་ ༢༩ ཉིན་ཕས་བུ་མོ་དངོས་སུ་ཐུག་འདུག་པ་དང་། སྐད་འབོད་རྒྱག་སྐབས་མོ་རང་གཅིག་པུ་ཡིན་པ་དང་བཙོན་ཁང་ནང་དུའང་གཅིག་པུ་རེད་འདུག རོགས་པ་མེད་པས་ཞེད་སྣང་སྐྱེས་ཀྱི་འདུག་ཅེས་རྒྱ་གར་ལྷོ་ཕྱོགས་སེ་རར་བཞུགས་ཡོད་པའི་བུ་མོའི་ཨ་ཁུ་ལ་འགྲེལ་བརྗོད་བྱས་འདུག་པ་བཅས།།