༢༠༡༢ ཟླ་ ༦ ཚེས་ ༢༩ རེས་གཟའ་པ་སངས།
སྐུ་པར་ཇེ་རེ་མི་ར་སེལ་ནས།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༨ ཉིན་གྱི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་ཨི་ཊ་ལིའི་གྲོང་ཁྱེར་མི་ལ་ནོའི་ནང་དུ་མི་གྲངས་ ༡༠༠༠༠ ཤོང་ཚད་ཡོད་པའི་རྩེད་རྭའི་ནང་སྤྱན་རས་གཟིགས་ཀྱི་བཀའ་དབང་སྩལ། དེ་ཡང་ཐོག་མར་༸གོང་ས་མཆོག་གིས་སྔོན་འགྲོའི་ཆོ་ག་སོགས་ལེགས་པར་མཛད་རྗེས་ཐེག་པ་ཆེན་པོའི་རྒྱུད་སྡེ་བཞིའི་སྐོར་བཀའ་སློབ་སྩལ་དོན། རྒྱུད་སྡེའི་བཞིའི་ནང་ནས་སྤྱན་རས་གཟིགས་ཀྱི་དབང་དེ་བྱ་རྒྱུད་ཁོངས་སུ་གཏོགས་པ་དང་རྒྱུད་སྡེ་བཞིའི་ནང་ཞི་ལྷག་ཟུང་འབྲེལ་གྱི་ཐབས་ལ་བསྟེན་དགོས་པ་དང་མགོན་པོ་གང་ཉིད་མཆོག་ལ་སྟག་བྲག་རིན་པོ་ཆེ་མཆོག་དང་ཡོངས་འཛིན་གླིང་རིན་པོ་ཆེ་མཆོག་གི་དྲུང་ནས་སྤྱན་རས་གཟིགས་ཀྱི་བཀའ་དབང་ཐོབ་ཡོད་པ་སོགས་ཀྱི་སྔོན་འགྲོའི་ཆོས་འབྲེལ་སྩལ་གྲུབ་བསྟུན། སྤྱན་རས་གཟིགས་ཀྱི་བཀའ་དབང་དངོས་གཞི་སྩལ། སྐབས་དེར་ཡི་ཤུ་དང་ཁ་ཆེའི་བླ་མ་དང་གྲྭ་བཙུན་ཁག་གཅིག་ཀྱང་ཆེད་བཅར་ཞུས་ཡོད།
སྐུ་པར་ཇེ་རེ་མི་ར་སེལ་ནས།
ཉིན་གུང་ལྗགས་སྨིན་གྲུབ་བསྟུན་༸གོང་ས་མཆོག་གིས་བརྙན་འཕྲིན་བརྒྱུད་ལམ་ཞིག་གི་གསར་འགོད་པའི་དྲི་བར་བཀའ་ལན་མཛད། སྐབས་དེར་གསར་འགོད་པ་དེས་བོད་ནང་རང་ལུས་མེར་སྲེག་བཏང་བའི་སྐོར་གྱི་དྲི་བར་༸གོང་ས་མཆོག་གིས་བཀའ་ལན་སྩལ་དོན། གནད་དོན་དེ་ཆབ་སྲིད་དང་འབྲེལ་བ་ཆེན་པོ་ཡོད་པར་བརྟེན་ངོས་ཀྱིས་དེའི་སྐོར་གང་ཡང་བརྗོད་འདོད་མེད། འོན་ཀྱང་ཁྱིམ་ཚང་གི་དཀའ་ངལ་ལ་བརྟེན་ནས་ཁོང་ཚོས་རང་ལུས་མེར་སྲེག་བཏང་བའི་གནས་ཚུལ་དེ་འདྲ་རྩ་བ་ནས་མིན་པ་ར་སྤྲོད་ཐུབ་ཡོད། དེར་བརྟེན།
བོད་མིས་རང་ལུས་མེར་སྲེག་གཏོང་དགོས་པའི་རྒྱུ་རྐྱེན་གཙོ་བོ་གང་ཡིན་ཐོག་རྒྱ་མིའི་དཔོན་རིགས་ཚོས་ཞིབ་འཇུག་ཚད་ལྡན་ཞིག་ངེས་པར་བྱེད་དགོས། དེ་སྔ་ཕྱི་ལོ་ ༡༩༨༠ ལོར་རྒྱ་མིའི་སྲིད་བློན་ཧུའུ་ཡོ་པང་ལྷ་སར་ལྟ་སྐོར་དུ་བསྐྱོད་སྐབས་བོད་ནང་དུ་དཀའ་ངལ་བཟོས་པ་དེར་དགོངས་གསོལ་ཞུས་པ་དང་སྦྲགས། རྒྱ་ཧན་མི་རིགས་བོད་ནས་རྒྱ་ནག་ཏུ་འཕྱིར་འཐེན་བྱ་རྒྱུའི་ཁས་ལེན་ཡང་བྱས་ཡོད། དམ་པ་ཁོང་ནི་གུང་ཁྲན་རིང་ལུགས་པ་ཡག་པོ་ཞིག་ཡིན། དེ་བཞིན་རྒྱ་ནག་གི་སྲིད་འཛིན་ཟུར་པ་སྐུ་ཞབས་ཏིང་ཞའོ་ཕིང་གིས་དངོས་ཡོད་གནས་ཚུལ་ནས་བདེན་པ་འཚོལ་ཐབས་བྱེད་དགོས། ཞེས་གསུངས་ཡོད། དེ་བཞིན་ཧུའུ་ཅིན་ཐའོ་རྒྱ་ནག་གི་སྲིད་འཛིན་དུ་བསྐོ་བཞག་བྱུང་མཚམས་འཆམ་མཐུན་གྱི་སྤྱི་ཚོགས་བསྐྲུན་དགོས་པ་བརྗོད་སྐབས་ངོས་ཀྱིས་རྒྱབ་སྐྱོར་བྱས་པ་ཡིན། འཆམ་མཐུན་གྱི་སྤྱི་ཚོགས་དེ་ཕན་ཚུན་ཡིད་ཆེས་ཐོག་ནས་ཡོང་དགོས་པ་ལས་དྲག་པོའི་དཔུང་ཤུགས་ཁོ་ནས་བཟོ་ཐུབ་བསམ་པ་དེ་རྒྱུ་མཚན་ཡང་དག་ཅིག་རྩ་བ་ནས་མིན།
སྐུ་པར་ཇེ་རེ་མི་ར་སེལ་ནས།
དྲག་ཤུགས་བེད་སྤྱོད་བྱས་ཚེ་ཡིད་ཆེས་བསྐྲུན་རྒྱུའི་ཚབ་ཏུ་གྲུབ་འབྲས་ལྡོག་ཕྱོགས་ཤིག་ཐོན་ངེས་རེད། བོད་མི་རིགས་ཀྱི་སྙིང་སྟོབས་དང་ལྷག་བསམ་དེ་དྲག་ཤུགས་ཀྱིས་ཉམས་གུད་གཏོང་ཐབས་རྩ་བ་ནས་མེད། གང་ཡིན་བརྗོད་ན་བོད་མིའི་ལ་རྒྱ་དང་སྙིང་སྟོབས་དེ་ལོ་ངོ་ ༢༥༠༠ ལྷག་སོང་བའི་ནང་ཆོས་ཀྱི་སྲོལ་རྒྱུན་ལ་རྩ་བ་བཟུང་ནས་གནས་ཡོད།
སྐུ་པར་ཇེ་རེ་མི་ར་སེལ་ནས།
དེང་སྐབས་འཛམ་གླིང་ནང་ཆོས་ལ་དོ་སྣང་ཇེ་ཆེར་འགྲོ་བཞིན་ཡོད། དམར་ཤོག་ཚོགས་པ་ལྟ་བུར་ཆ་མཚོན་ན་ལོ་ངོ་ ༢༠༠ ཙམ་ཟིན་པའི་ལོ་རྒྱུས་ལས་མེད་པ་དང་། གུང་ཁྲན་གྱི་མཐོང་དེ་དེང་སྐབས་ཉམས་གུད་འགྲོ་བཞིན་ཡོད་པ་མ་ཟད། གཅིག་བསྡུས་རིང་ལུགས་ཀྱི་སྲིད་དབང་དེ་བཞིན་ད་ཆ་མཇུག་སྒྲིལ་ཚར་བ་རེད། ཅེས་སོགས་ཀྱི་བཀའ་ལན་སྩལ།
སྐུ་པར་ཇེ་རེ་མི་ར་སེལ་ནས།
དེ་རྗེས་༸གོང་ས་མཆོག་གིས་བོད་རིགས་དང་སོག་རིགས་རྣམས་ལ་མཇལ་ཁ་དང་བཀའ་སློབ་སྩལ། སྐབས་དེར་༸གོང་ས་མཆོག་གིས་བོད་མི་ཚོར་ཉེ་ལམ་མགོན་པོ་གང་ཉིད་མཆོག་གི་ཆབ་སྲིད་ཀྱི་སྐུ་དབང་མི་མང་གིས་འོས་འདེམས་བྱས་པའི་བཀའ་བློན་ཁྲི་པར་རྩིས་སྤྲོད་མཛད་པ་དེ་ནི་ཐུགས་ཤུགས་ཆག་པ་ལྟ་བུ་རྩ་བ་ནས་མིན་པར་མ་འོངས་པར་བོད་མི་ཚོའི་བདེ་དོན་ཁོ་ནར་དགོངས་བཞེས་མཛད་པ་ཞིག་ཡིན་པ་མ་ཟད།
༸གོང་ས་མཆོག་སྐུ་གཞོན་ནུའི་དུས་ནས་བོད་མིའི་འཛིན་སྐྱོང་དེ་ཡང་དག་པའི་མང་གཙོའི་ལམ་ལུགས་ཐོག་བསྐྱོད་རྒྱུའི་ཐུགས་ཀྱི་འཆར་སྣང་ཡོད་སྐོར་སོགས་བཀའ་སློབ་སྩལ།
ཕྱོགས་མཚུངས་སོག་རིག་རྣམས་ལ་རང་གི་ཕ་མེས་ནས་བོད་བརྒྱུད་ནང་བསྟན་ལ་གཞི་བཅོལ་ནས་ཡོད་པ་དེའི་རིན་ཐང་ཤེས་པའི་སྒོ་ནས་བདག་གཅེས་དགོས་རྒྱུ་ཧ་ཅང་གལ་ཆེ་ཡིན་སྐོར་སོགས་བཀའ་སློབ་སྩལ་ཡོད་པ་བཅས།།
