༢༠༡༢ ཟླ་ ༦ ཚེས་ ༢༨ རེས་གཟའ་ཕུར་བུ།
༄༅། །བཀའ་ཁྲི་བློ་བཟང་སེང་གེ་མཆོག་གིས་ཕྱི་ལོ་ ༢༠༡༢ ཟླ་ ༦ ཚེས་ ༢༧ ཉིན་ཨོ་སི་ཊོ་ལི་ཡའི་གྲོས་ཚོགས་ཀྱི་ཚོགས་གཙོ་སྐུ་ཞབས་པི་ཊར་སི་ལི་པར་ (Peter Slipper) མཆོག་དང་མཇལ་འཕྲད་གནང་བ་མ་ཟད། ཨོ་སི་ཊོ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མེ་ཁལ་ཌེན་བྷེ་ Michael Danby མཆོག་དང། ཨོ་སི་ཊོ་ལི་ཡའི་གྲོས་ཚོགས་ཀྱི་ཚོགས་གཙོ་ཟུར་པ་སྐུ་ཞབས་ཧེ་རི་ཇེན་ཀིན་སི་ Harry Jenkins མཆོག དེ་བཞིན་གྲོས་ཚོགས་ཀྱི་ཕྱོགས་འགལ་ཚོགས་པའི་ཚོགས་མི་སྐུ་ཞབས་ཝར་རེན་ཨ་ཡིན་སི་ཊ་ཤི་ Warren Entsch མཆོག་དང། ལྗང་ཁུ་ཚོགས་པའི་བོད་དོན་མགྲིན་ཚབ་པ་གྲོས་ཚོགས་གོང་མའི་ཚོགས་མི་ལྕམ་སྐུ་ས་ར་ཧན་སོན་ཡོང་ Sarah Hanson-Young མཆོག དེ་བཞིན་ཨོ་སི་ཊོ་ལི་ཡའི་གདོད་མའི་མི་རིགས་ཀྱི་གྲོས་ཚོགས་འཐུས་མི་སྐུ་ཞབས་ཀེན་ཝཌ་ Ken Wyatt མཆོག བཅས་ཨོ་སི་ཊོ་ལི་ཡའི་གྲོས་ཚོགས་གོང་འོག་གི་ཆབ་སྲིད་ཚོགས་པ་གཉིས་ཀ་ནས་གྲོས་ཚོགས་འཐུས་མི་ ༣༠ ཙམ་དང་མཇལ་འཕྲད་གནང་ཡོད།
ཆུ་ཚོད་གཅིག་ལྷག་ཙམ་གྱི་གྲོས་མོལ་སྐབས་བཀའ་ཁྲི་བློ་བཟང་སེང་གེ་མཆོག་གིས་ཨོ་སི་ཊོ་ལི་ཡའི་གྲོས་ཚོགས་ཀྱི་འཐུས་མི་རྣམས་ལ་བོད་རྒྱ་གཉིས་ཀྱི་འབྲེལ་བའི་སྐོར་དང་བོད་མིའི་མང་གཙོའི་འཕེལ་རིམ། དབུ་མའི་ལམ་གྱི་ངོ་སྤྲོད། དེ་བཞིན་རྒྱ་ནག་ནང་དུ་འགོ་ཁྲིད་འཕོ་འགྱུར་སྐོར་སོགས་ཀྱི་གནད་དོན་ཐོག་གསལ་བཤད་གནང་སྐབས་གྲོས་ཚོགས་འཐུས་མི་རྣམ་པས་ཧ་ཅང་དོ་སྣང་ཆེན་པོ་གནང་ཡོད་པ་མ་ཟད། རྒྱབ་སྐྱོར་གྱི་རྣམ་པ་ཡང་ཤུགས་ཆེ་བཏོན་ཡོད།
དེ་རྗེས་བཀའ་ཁྲི་མཆོག་གིས་ཨོ་སི་ཊོ་ལི་ཡའི་གྲོས་ཚོགས་ཀྱི་གསར་འགོད་ཚན་པ་ཕེ་ཌེ་རལ་པེ་རེ་སི་གེ་ལེ་རི་ Federal Press Gallery ཞེས་པ་དེའི་གསར་འགོད་པ་ཚོ་དང་ཐུག་འཕྲད་གནང་སྐབས་སྐུ་ཞབས་མེ་ཁལ་ཌེན་བྷེ་མཆོག་དང་ཀེན་ཝཌ་རྣམ་གཉིས་ཀྱང་ཕེབས་ཡོད།
དེ་བཞིན་ཉིན་དེར་སྐུ་ཞབས་མེ་ཁལ་ཌེན་བྷེ་མཆོག་གིས་ཨོ་སི་ཊོ་ལི་ཡའི་གྲོས་ཚོགས་གོང་མའི་ནང་གསུང་བཤད་གནང་དོན། ང་ཚོ་མང་གཙོ་དོན་གཉེར་བ་ཡིན་པར་བརྟེན། ང་ཚོའི་ཚོང་འབྲེལ་བྱེད་སའི་རོགས་པ་ཚོས་ཉན་འཇོག་བྱེད་མིན་ལ་མ་ལྟོས་པར་སྐད་ཆ་དྲང་བདེན་ཤོད་དགོས། སྐད་ཆ་དྲང་པོ་བཤད་ན་བོད་མི་ཚོ་ལོ་ངོ་ ༦༠ རིང་རྒྱ་ཡི་གདུག་རྩུབ་འོག་དཀའ་སྡུག་མྱངས་ཏེ་མཐར་འུ་ཐུག་ཐབས་ཟད་ཀྱིས་རང་ལུས་མེར་སྲེག་གཏོང་དགོས་པ་ཆགས་ཡོད། བྱ་སྤྱོད་དེས་བོད་མི་ཚོ་ད་ཆ་འ་ཆད་འུ་ཐུག་གི་གནས་སྟང་འོག་ཡོད་པ་གསལ་སྟོན་བྱེད་བཞིན་ཡོད། ངས་བསམ་པར་བྱ་སྤྱོད་དེས་བོད་མིིས་རང་དབང་ཆེད་འཐབ་རྩོད་བྱ་རྒྱུའི་ཆོད་སེམས་སྔར་བས་སྲ་བརྟན་དུ་འགྲོ་རྒྱུའི་མཚོན་རྟགས་ཤིག་ཡིན། ཞེས་སོགས་ཀྱི་གསུང་བཤད་གནང།
ཕྱེད་ཡོལ་བཀའ་ཁྲི་མཆོག་གིས་རྒྱ་རིགས་མཁས་དབང་ཁག་གཅིག་དང་ལྷན་ཨོ་སི་ཊོ་ལི་ཡའི་རྒྱལ་ཡོངས་གཙུག་ལག་སློབ་གཉེར་ཁང་དུ་བགྲོ༞་གླེང་གནང་ཡོད། གཙུག་ལག་སློབ་གཉེར་ཁང་དེར་རྒྱ་ནག་སྐོར་དང་རྒྱལ་སྤྱིའི་འབྲེལ་ལམ་སྐོར་སློབ་ཁྲིད་གནང་བཞིན་ཡོད། དེ་བཞིན་བཀའ་བློན་ཁྲི་པ་མཆོག་གིས་༞ཨོ་སི་ཊོ་ལི་ཡའི་ས་གནས་བོད་རིགས་རྣམས་ལ་ཐུག་འཕྲད་གནང་ཡོད། ཐེངས་འདིར་བཀའ་ཁྲི་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་ཀེན་བྷེ་རའི་ནང་ཉིན་གསུམ་གྱི་ཕྱོགས་ཕེབས་སྐབས་ཨོ་སི་ཊོ་ལི་ཡའི་གྲོས་ཚོགས་ཀྱི་འཐུས་མི་གྲངས་ ༤༥ ཙམ་དང་མཇལ་འཕྲད་གནང་འཆར་ཡོད་འདུག་པ་བཅས།།
