༢༠༡༢ ཟླ་ ༦ ཚེས་ ༢༨ རེས་གཟའ་ཕུར་བུ།
༄༅། །འདི་གར་ཕྱི་ལོ་ ༢༠༡༢ ཟླ་ ༦ ཚེས་ ༢༧ ཉིན་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༧ ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུ་ཆེད་ཐེ་ཝན་ནང་རྟེན་གཞི་བྱས་པའི་ཚོགས་སྡེ་འདྲ་མིན་ཁག་ནས་རྣམ་པ་འདྲ་མིན་གྱི་ལས་འགུལ་སྣ་མང་སྤེལ་དང་སྤེལ་འཆར་ཁོངས་ནས།
ཐེ་ཝན་གྲོང་ཁྱེར་ཆེ་ཁག་གསུམ་ནང་དུས་ཡུན་ཟླ་བ་གཉིས་རིང་༸གོང་ས་མཆོག་གི་སྐུ་པར་དང་རྒྱ་དབྱིན་གཉིས་ཐོག་༸གོང་ས་མཆོག་གི་འཁྲུངས་སྐར་ལ་བཀྲ་ཤིས་བདེ་ལེགས་ཞུ། ཞེས་མགོན་པོ་གང་ཉིད་མཆོག་གི་སྐུ་པར་དང་ཡི་གེ་འཁོད་པའི་སྤྱི་སྤྱོད་རླངས་འཁོར་ཁྱོན་གྲངས་ ༣༠ རྒྱུན་དུ་གཞུང་ལམ་ཐོག་འགྲོ་བཞིན་ཡོད་པ་མ་ཟད།
དེ་རིང་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ནས་གོ་སྒྲིག་ཐོག་༸གོང་ས་མཆོག་གི་འཁྲུངས་སྐར་ལ་བཀྲ་ཤིས་བདེ་ལེགས་ཞུ་བའི་ཁྱབ་བསྒྲགས་ཡོད་པའི་རླང་འཁོར་གཅིག་ཆེད་དུ་གླས་ཏེ་ཉིན་ཕྱེད་རིང་ཐའེ་པེ་གྲོང་ཁྱེར་ནང་བསྐོར་བསྐྱོད་གནང་ཡོད། ཡུལ་སྐོར་སྤྲོ་འཆམ་གྱི་མི་ཚོགས་མང་བའི་ས་ཚིགས་ཐའེ་པེ་ཐོག་བརྩེགས་བརྒྱ་དང་གཅིག་ཅན་ཁང་ཆེན་མདུན་ཐང་དང་། སུང་ཀྲུང་ཧྲན་དྲན་གསོ་ཁང་། སྲིད་འཛིན་ཕོ་བྲང་། ཐེ་ཝན་རང་དབང་ཐང་ཆེན་བཅས་ཀྱི་མདུན་དུ་༸གོང་ས་མཆོག་ལ་དགའ་དད་རྣམ་པ་སྟོན་པའི་མཛད་སྒོ་དང་། སྦྱིན་བདག་རྣམས་རླང་འཁོར་ཐོག་གསལ་བའི་༸གོང་ས་མཆོག་གི་སྐུ་པར་མདུན་དྲན་རྟེན་པར་ལེན་པ་བཅས་བྱས་པ་དང་། སྐབས་དེ་དུས་སྤྱིར་བཏང་ཐེ་ཝན་ཡུལ་མི་དང་། རྒྱ་ནག་སྐམ་ས་ནས་ཡུལ་སྐོར་སྤྲོ་འཆམ་དུ་ཡོང་མཁན་ཁག་གིས་ཀྱང་རླངས་འཁོར་པར་ལེན་བྱེད་པ་སོགས་དོ་སྣང་ཆེན་པོ་བྱུང་ཡོད། མཐའ་མའི་ས་ཚིགས་སུ་སླེབས་སྐབས། ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་སྦྱིན་བདག་རྣམས་ལ་མཇལ་དར་བསྒྲོན་ཏེ་ཐུགས་རྗེ་ཆེ་ཞུས་ཏེ་ཉིན་ཕྱེད་རིང་གི་སྐོར་བསྐྱོད་མཇུག་སྒྲིལ་གནང་འདུག་པ་བཅས།།
