༢༠༡༢ ཟླ་ ༦ ཚེས་ ༢༥ རེས་གཟའ་ཟླ་བ།
སྐུ་པར་ཇེ་རི་མི་ར་སེལ་ནས།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༢ རེས་གཟའ་པ་སངས་ཉིན་གྱི་སྔ་དྲོ་༸གོང་ས་མཆོག་གིས་སི་ཀོ་ཊ་ལན་ཌིའི་སིག་ནེ་ཌི་དཔེ་མཛོད་ཁང་ (Signet Library) གི་ཚོགས་ཁང་དུ་སི་ཀོ་ཊ་ལན་ཌིའི་གྲོས་ཚོགས་བོད་དོན་རྒྱབ་སྐྱོར་གྱི་འཐུས་མི་རྣམས་ (Scottish Parliament Cross Party Group on Tibet) དང་ས་གནས་བོད་རིགས་རྣམས་ལ་མཇལ་ཁ་དང་བཀའ་སློབ་སྩལ་དོན། ངོས་རང་ས་གནས་འདིར་སླེབས་ཐུབ་པར་ཧ་ཅང་དགའ་པོ་བྱུང། ས་གནས་འདིར་ངོས་རང་ཡོང་ཐེངས་ལྔ་པ་ཆགས་ཡོད།
སྐུ་པར་ཇེ་རེ་མི་ར་སེལ་ནས།
དེང་སྐབས་གཅིག་ལ་གཅིག་བརྟེན་དགོས་པའི་དུས་སྐབས་འདིར་རང་ཉིད་ཀྱི་བདེ་དོན་བསྒྲུབ་ཆེད་གཞན་གྱི་བདེ་དོན་སྣང་མེད་དུ་འཇོག་ཐབས་མེད།
སྐུ་པར་ཇེ་རེ་མི་ར་སེལ་ནས།
ལོ་གསུམ་བརྒྱ་ཙམ་གྱི་གོང་ནས་ཚན་རིག་ལ་བརྟེན་པའི་འཕྲུལ་ཆས་ཀྱི་རིགས་ཡར་རྒྱས་ཐོག་མར་འགོ་བཙུགས་ཏེ་ད་ཆ་འཕྲུལ་ཆས་ཡར་རྒྱས་ཧ་ཅང་ཚད་མཐོན་པོར་སོན་ཡོད། དེར་བརྟེན་མི་མང་པོ་ཞིག་གིས་ཕྱི་དངོས་པོའི་རིན་ཐང་ཁོ་ནར་གལ་ཆེ་བརྩིས་པ་ལས་ནང་སེམས་ཀྱི་རིན་ཐང་ལ་དོ་སྣང་དེ་ཙམ་སྤྲད་མེད།
ང་ཚོ་སྐྱེས་ཙམ་ཉིད་ནས་གཞན་གྱི་བྱམས་བརྩེ་ལ་བརྟེན་ནས་འཚོ་གནས་བྱས་ཡོད། དེར་བརྟེན་འཇིགས་སྣང་དང་ཁོང་ཁྲོའི་བསམ་པ་སྐྱེ་སྐབས་རང་བཞིན་གྱི་མ་སྐྱིད་པ་ཆགས་ཀྱི་ཡོད། དེར་བརྟེན་ནང་སེམས་ཀྱི་བྱམས་བརྩེ་དགོས་རྒྱུ་ཧ་ཅང་གལ་ཆེན་པོ་ཡིན། ཞེས་སོགས་ཀྱིས་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་ཡང་སྩལ།
སྐུ་པར་ཇེ་རེ་མི་ར་སེལནས།
དེ་རྗེས་༸གོང་ས་མཆོག་གིས་སོ་ཀོ་ཊ་ལན་ཌིའི་རྒྱལ་ཡོངས་དཔེ་མཛོད་ཁང་དུ་ National Library of Scotland ཆིབས་སྒྱུར་བསྐྱངས་ཏེ་བོད་ཀྱི་རིག་གཞུང་དང་འབྲེལ་བའི་དཔེ་དེབ་དང་འདྲ་པར་སོགས་དངོས་རྫས་རྣམས་ལ་ཐུགས་ཞིབ་མཛད། དེ་རྗེས་༸གོང་ས་མཆོག་གིས་གསར་འགོད་པ་ཚོར་མཇལ་འཕྲད་མཛད་སྐབས་གསར་འགོད་པ་ཞིག་གིས་ཐེངས་འདིར་རྒྱ་ནག་གཞུང་ཚབ་ཀྱིས་༸གོང་ས་མཆོག་ཁུལ་འདིའི་ཆིབས་སྒྱུར་འགོག་ཆེད་གནོན་ཤུགས་སྤྲད་པ་དེར་དགོངས་ཚུལ་ཇི་བྱུང་གི་དྲི་བར་བཀའ་ལན་སྩལ་དོན།
རྒྱ་ནག་གཞུང་གི་བྱེད་སྟངས་དེ་ནི་ལོ་ངོ་ ༤༠ ཙམ་ནས་རྒྱུན་ལྡན་ཞིག་ཆགས་ཡོད།
སྐུ་པར་སྐུ་ཇེ་རེ་མི་ར་སེལ་ནས།
ཅེས་བཀའ་ལན་སྩལ། ཡང་གསར་འགོད་པ་ཞིག་གིས་སོ་ཀོ་ཊ་ལན་ཌིའི་རང་བཙན་སྐོར་གྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། ང་ཚོས་རྒྱུན་དུ་ཕུགས་རྒྱང་རིང་པོར་བསམ་བློ་བཏང་སྟེ་ཡུ་རོབ་སྤྱི་མཐུན་ཚོགས་པ་ལྟ་བུ་བཙུགས་པ་དེར་མིག་དཔེ་བླང་ཐུབ་པ་དགོས། བོད་ལྟ་བུར་ཆ་མཚོན་ན་བོད་པ་རང་ཉིད་ལ་རྒྱལ་རབས་ལོ་རྒྱུས་དང་སྐད་ཡིག ཆོས། ཐུན་མིན་རིག་གཞུང་སོགས་ཡོད་པར་བརྟེན་རྒྱབ་རྟེན་གྱི་བསམ་བློ་དེར་གཞི་བཅོལ་ཏེ་བོད་མི་རང་བཙན་རྩོད་མཁན་གང་ཙམ་ཡོད། འོན་ཀྱང་ཕྱི་ལོ་ ༡༩༧༤ ལོ་ནས་ང་ཚོའི་སྒྲིག་འཛུགས་ཀྱིས་དབུ་མའི་ལམ་གྱི་ཐབས་ལམ་ཐོག་ནས་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབས་ཚད་ལྡན་ཞིག་རག་ཐབས་བྱས་ཡོད། ལངས་ཕྱོགས་དེ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མཐུན་པ་ཞིག་ཆགས་ཡོད།
བྱམས་བརྩེའི་ལས་འགུལ་སྤེལ་བར་གཟེངས་རྟགས་རོལ་རས་སྩོལ་བཞིན་པ། སྐུ་པར་སྐུ་སྒེར་ཇེ་རེ་མི་ར་སེལ་ནས།
ཕྱི་ལོ་ ༡༩༥༤ ལོར་མའོ་ཙེ་ཏུང་གིས་གནས་བབས་དེར་མོས་མཐུན་ཡོད་སྐོར་བརྗོད་ཡོད་པ་ཐུགས་དྲན་གསོ་མཛད།
དེ་རྗེས་རྒྱལ་ས་ཨེ་ཌིན་བྷག་གི་ཨུ་ཤར་ཚོགས་ཁང་ (Usher Hall) དུ་ཆིབས་སྒྱུར་བསྐྱངས་ཏེ་
ཆོས་ལུགས་ཀྱི་རྒྱ་ལས་བརྒལ་བའི་འཇིག་རྟེན་ཀུན་ལ་སྨན་པའི་བཟང་སྤྱོད། ཅེས་པའི་བརྗོད་གཞིའི་ཐོག་བཀའ་སློབ་སྩལ་དོན། དེང་སྐབས་འཛམ་གླིང་ནང་གི་དཀའ་ངལ་མང་པོ་ཞིག་མིས་བཟོས་པ་ཤིག་ཆགས་ཡོད། དེར་བརྟེན་དཀའ་ངལ་དེ་དག་སེལ་ཐབས་ཀྱང་མིའི་རྣམ་དཔྱོད་ཐོག་ནས་སེལ་དགོས། ང་ཚོས་རང་བདེ་རྐྱང་པར་དམིགས་པའི་བསམ་བློ་དོར་ཏེ་གཞན་གྱི་བདེ་བ་དོན་གཉེར་གྱི་བསམ་བློ་ཤུགས་ཆེ་རུ་གཏོང་དགོས་པའི་དུས་ལ་སླེབས་ཡོད། དེ་འདྲ་ཞིག་ཡོང་བར་ནང་གི་བསམ་བློ་ཇེ་བཟང་དུ་གཏོང་རྒྱུ་དེ་ཡིན། ཞེས་སོགས་ཀྱི་བཀའ་སློབ་སྩལ་རྗེས་དྲི་བ་ཁག་ལ་བཀའ་ལན་ཡང་སྩལ།
སྐུ་པར་སྐུ་སྒེར་ཡིག་ཚང་གི་ཇེ་རེ་མི་ར་སེལ་ནས།
དེ་རྗེས་གཞོན་སྐྱེས་ཁག་གཅིག་ལ་བྱམས་བརྩེའི་གཟེངས་རྟགས་གསོལ་རས་སྩལ་རྗེས་གོ་སྒྲིག་ཚོགས་ཆུང་གིས་ཊར་ཊན་ཞི་བདེའི་གཟེངས་རྟགས་ (Tartan for Peace) དེ་བཞིན་༸གོང་ས་མཆོག་ལ་འབུལ་ལམ་ཞུས། དེ་ནས་སི་ཀོ་ཊ་ལན་ཌིའི་གྲོས་ཚོགས་སུ་ཉིན་གུང་ལྗགས་སྨིན་འབུལ་བཞེས་མཛད་ཡོད།
དེ་ནས་༸གོང་ས་མཆོག་གིས་ཡི་ཤུ་དང་ཧིན་སྡུ། སིཀ ཇིའུ། ནང་པ། ཁ་ཆེ་བཅས་ཆོས་ལུགས་རིས་མེད་ཀྱི་སྐུ་ཚབ་འཐུས་མི་རྣམས་དང་ལྷན་འཛོམས་ཐོག་བཀའ་སློབ་སྩལ་རྗེས་༸གོང་ས་མཆོག་གིས་ཌུན་ཌེའི་ Dundee གཙུག་ལག་སློབ་ཁང་ University དུ་ཆིབས་སྒྱུར་བསྐྱངས་ཏེ་བཀའ་སློབ་སྩལ་ཡོད་པ་བཅས།།
