༢༠༡༢ ཟླ་ ༦ ཚེས་ ༢༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༠ ཉིན་༸གོང་ས་མཆོག་གིས་དབྱིན་ཡུལ་གྱི་རྒྱལ་ས་ལོན་ཌོན་དུ་རུའི་ཊར་གསར་འགྱུར་ལས་ཁང་གི་གསར་འགོད་པའི་ཆེད་དོན་དྲི་བར་བཀའ་ལན་སྩལ་འདུག
དྲི་བ། རིང་མིན་རྒྱ་ནག་གཞུང་གི་འགོ་ཁྲིད་འཕོ་འགྱུར་གྱི་སྲིད་འཛིན་དུ་ཞི་ཅིན་ཕིང་སླེབས་ཀྱི་ཡོད་སྐབས་༸གོང་ས་ཏཱ་ལའི་བླ་མ་མཆོག་གིས་ཁོང་ལ་བརྡ་ལན་གང་ཞིག་སྩལ་གནང་རྒྱུ་ཡོད་དམ།
བཀའ་ལན། རྩ་བའི་རྒྱ་ནག་དེ་བཞིན་སྟོབས་ཆེན་རྒྱལ་ཁབ་གཅིག་ཡིན་པ་མ་ཟད། ལོ་རྒྱུས་ལྡན་པའི་རྒྱལ་ཁབ་གཅིག་ཀྱང་རེད། འཛམ་གླིང་ནང་ཕན་ཐོགས་བྱེད་ཐུབ་པའི་ནུས་པ་ཡོད། རྒྱ་ནག་དཔལ་འབྱོར་ཡག་པོ་ཡོང་རྒྱུར་འཛམ་གླིང་ནས་མཐུན་འགྱུར་བསྐྲུན་དགོས་ཀྱི་ཡོད་པ་ལྟར། ད་ཆ་འཛམ་གླིང་གི་རྒྱལ་ཁབ་ཚོས་རྒྱ་ནག་གི་དཔལ་འབྱོར་ཙམ་མ་ཡིན་པར། ཆབ་སྲིད་ཀྱི་ཐོག་ནས་ཁེར་རྐྱང་དུ་མ་ལུས་པར་འགྱུར་བ་གཏོང་ཐུབ་པའི་འབད་བརྩོན་བྱེད་དགོས་ཀྱི་རེད་ལ་རྒྱ་ནག་གཞུང་རང་ཉིད་ནས་ཀྱང་ཆབ་སྲིད་ཀྱི་བཅོས་བསྒྱུར་གཏོང་ཐུབ་པ་དང་། མི་མང་གི་མངོན་འདོད་འགྲུབ་ཐུབ་པ་ཞིག་བྱས་ན་ཧ་ཅང་ཡག་པོ་ཡོང་གི་རེད། དེར་བརྟེན་ཞི་ཅིན་ཕིང་འགོ་ཁྲིད་ལ་འཁོད་སྐབས། ཁོང་གིས་དངོས་ཡོད་གནས་སྟངས་དང་བསྟུན་ནས་རྒྱ་ནག་རྒྱལ་ཁབ་ཀྱི་མ་འོངས་པའི་མདུན་ལམ་བཟང་པོ་ཡོང་ཐབས་སུ་ལག་ལེན་འཁེལ་བ་ཞིག་ཡོང་རྒྱུའི་རེ་བ་བྱེད་བཞིན། དེ་ལྟར་བྱས་ན་ཧ་ཅང་ཕན་ཐོགས་ཆེན་པོ་ཡོང་གི་རེད།
དྲི་བ། བོད་རྒྱ་འབྲེལ་མོལ་གྱི་གནས་སྟངས་དང་འབྲེལ་མོལ་བསྐྱར་གསོ་ཡོང་ཐབས་ཡོད་མེད་ཐོག་སྐུ་ཉིད་མཆོག་ལ་དགོངས་ཚུལ་གང་ཞིག་ཡོད་དམ།
བཀའ་ལན། དེ་སྔ་ཧུའུ་ཡོ་པང་བཞུགས་སྐབས་རེ་བ་ཕྲན་བུ་བྱུང་ཡོད། རྒྱ་ནག་གཞུང་ནས་བོད་རྒྱ་ཞི་འགྲིག་ཡོང་ཐབས་སུ་དོན་ཚན་ལྔ་ཅན་ཞིག་བཏོན་ཡོད་པའི་ནང་ངོས་རང་ཕྱིར་ལོག་འགྲོ་རྒྱུའི་སྐོར་བརྗོད་ཡོད། སྐབས་དེ་དུས་ནས་ངོས་ཀྱིས་དེ་ནི་ངོས་རང་ཕྱིར་ལོག་བྱེད་མིན་གྱི་གནད་དོན་མ་རེད། བོད་མི་མང་གི་གནད་དོན་ཆགས་ཡོད་ཅེས་བརྡ་ལན་སྤྲད་ཡོད། མ་འོངས་པར་ཡང་རྒྱ་ནག་གཞུང་ནས་བོད་མིའི་དཀའ་ངལ་ལ་དྲང་བདེན་ཐོག་དངོས་ཡོད་གནས་སྟངས་ཞིབ་འཇུག་དང་ངོས་ལེན་བྱས་ཏེ་ཞི་འགྲིག་ཐོག་ནས་དཀའ་ངལ་སེལ་ཐབས་བྱེད་དགོས། གང་ལ་ཞེ་ན། བོད་ཀྱི་གནད་དོན་དེ་བོད་རྒྱ་གཉིས་ཀའི་དཀའ་ངལ་ཆགས་ཡོད་པར་བརྟེན། དཀའ་ངལ་མ་སེལ་བ་ཡིན་ན། ཕན་ཚུན་གཉིས་ཀར་དོ་ཕོག་ཡོང་རྒྱུ་རེད། དེ་བཞིན་རྒྱ་ནག་གཞུང་ནས་བོད་ཀྱི་གནད་དོན་ཐོག་བཟང་ཕྱོགས་ཀྱི་འགྱུར་བ་ཞིག་མ་བཏང་བར་དུ་འབྲེལ་མོལ་བྱས་ཀྱང་དམིགས་བསལ་དོན་འབྲས་སོན་པ་ཞིག་ཡོང་གི་རེད་བསམ་གྱི་མེད།
དྲི་བ། རྒྱ་ནག་གཞུང་ཕྱོགས་ནས་དཀའ་ངལ་གང་འདྲ་བྱས་ནས་སེལ་ཐབས་བྱེད་དགོས་སམ།
བཀའ་ལན། ངོས་ཀྱིས་གོང་དུ་བརྗོད་པ་ལྟར། དྲང་བདེན་དང་གནས་ཚུལ་ངོ་མ། དེ་བཞིན་དཀའ་ངལ་གང་ཞིག་འཕྲད་ཀྱི་ཡོད་མེད་ཉམས་ཞིབ་ནན་ཏན་བྱེད་དགོས་པ་ལས་གཞུང་འབྲེལ་ཁ་གཡེང་གཡེང་དང་རང་ཉིད་ཀྱི་བསམ་པ་ཁོ་ནའི་ཐོག་རྟོག་ཞིབ་ཀྱི་སྲིད་བྱུས་ལག་བསྟར་བྱས་ན་ཡོང་ཐབས་མེད། དེ་སྔ་ཏེང་ཞའོ་ཕིང་གིས་གསུངས་པ་ལྟར། དངོས་ཡོད་གནས་སྟངས་དང་བདེན་པ་གང་ཞིག་ཡིན་མིན་ཤེས་རྟོགས་བྱེད་རྒྱུ་ཧ་ཅང་གལ་ཆེན་པོ་རེད།
དྲི་བ། སྐུ་ཉིད་མཆོག་གིས་རྒྱ་ནག་ནང་འགྱུར་བ་འགྲོ་རྒྱུ་ཡིན་སྐོར་གསུང་བཞིན་པ་དེ་གང་གི་ཆ་ནས་དེ་ལྟར་གསུང་གི་ཡོད་དམ།
བཀའ་ལན། ངོས་ཀྱིས་རྒྱ་རིགས་མཁས་དབང་དང་རྩོམ་པ་པོ། སློབ་ཕྲུག་མང་དག་ཅིག་ཐུག་འཕྲད་བྱེད་སྐབས། ཁོང་ཚོ་ཚང་མས་ཁ་གཅིག་གྲག་ཐོག་མང་གཙོ་དགོས་པ་དང་བཅོས་བསྒྱུར་བྱ་རྒྱུའི་འདོད་པ་བྱེད་བཞིན་འདུག དེ་བཞིན་རྩོམ་པ་པོ་མང་པོས་བྲིས་རྩོམ་གནང་བ་དེ་དག་ལ་དཔྱད་ཞིབ་བྱས་ན། རྒྱ་ནག་གཞུང་ནས་ཀྱང་གོམ་པ་མདུན་སྐྱོད་ཀྱིས་འཛམ་གླིང་གི་འགྱུར་འགྲོས་དང་མཐུན་པ་འགྲོ་དགོས་པ་རེད་མ་གཏོགས་ཕྱིར་ཤིག་རྒྱག་རྒྱུ་མེད། ཆབ་སྲིད་ཀྱི་འགྱུར་བ་ག་དུས་འགྲོ་དང་མི་འགྲོ་བརྗོད་ཐུབ་ཐབས་མེད། འོན་ཀྱང་རེ་བ་ཡོད་ལ་འགྱུར་བ་དེ་ཡང་རྒྱ་ནག་མི་མང་རང་ཉིད་ནས་གཏོང་ཐབས་བྱེད་དགོས།
དྲི་བ། དེང་སྐབས་འཛམ་གླིང་སྤྱི་དང་ཡང་སྒོས་ཡུ་རོབ་ནང་དཔལ་འབྱོར་ཉམས་གུད་འགྲོ་བཞིན་པ་དེར་གདོང་ལེན་ཇི་ལྟར་བྱེད་དགོས་སམ།
བཀའ་ལན། ངོས་ཀྱིས་དཔལ་འབྱོར་གྱི་འགྲོ་སྟངས་ཡག་པོ་ཤེས་ཀྱི་མེད། འོན་ཀྱང་ཁག་གཅིག་གིས་གསུང་དོན་ལྟར་ན། འདོད་རྔམ་དང་རྫུན་གཏམ་ཁྱབ་བསྒྲགས་ཆེ་དྲགས་པ་སོགས་ཀྱི་གནས་ཚུལ་དེ་འདྲ་བྱུང་བ་ཡིན་པ་ཧ་ཅང་གསལ་པོ་རེད་ཅེས་འགྲེལ་བརྗོད་གནང་གི་འདུག དེར་བརྟེན་གཙོ་བོ་ཕྱི་དངོས་པོར་དགའ་ཞེན་ཆེ་དྲགས་པ་དང་འདོད་རྔམ་ཆེ་དྲགས་པས་བྱུང་བ་ཞིག་རེད། གང་ལྟར་མིས་བཟོས་པའི་དཀའ་ངལ་ཞིག་ཡིན་པར་བརྟེན། མི་རང་ཉིད་ཀྱིས་གདོང་ལེན་བྱེད་ཐུབ་པའི་ནུས་པ་ཡོད་སྟབས། ཚང་མས་སེམས་ཤུགས་མ་ཆག་པར་སྙིང་སྟོབས་ཆེ་སྐྱེད་ཀྱིས་སླར་ཡང་འབད་བརྩོན་བྱས་ཏེ་དཀའ་ངལ་ལ་གདོང་ལེན་གྱི་དཔལ་འབྱོར་བསྐྱར་གསོ་བྱེད་ཐབས་ལ་འབད་དགོས། ཞེས་བཀའ་ལན་སྩལ་ཡོད་པ་བཅས། །