༢༠༡༢ ཟླ་ ༦ ཚེས་ ༢༡ རེས་གཟའ་ཕུར་བུ།
སྐུ་པར་སྐུ་སྒེར་ཡིག་ཚང།
༄༅། །༸གོང་ས་མཆོག་གིས་ཕྱི་ལོ་ ༢༠༡༢ ཟླ་ ༦ ཚེས་ ༢༠ ཉིན་དབྱིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་ཝེ་སི་མིན་སི་ཊར་ཨེ་བྷེ་ཡི་སྙན་གྲགས་ཆེ་བའི་ཡི་ཤུའི་མཆོད་ཁང་ (Westminster Abbey) དུ་ཆོས་ལུགས་རིས་མེད་ཀྱི་དབུ་ཁྲིད་ཁག་གཅིག་དང་ལྷན་ཆོས་ལུགས་མཐུན་སྒྲིལ་ཆེད་སྨོན་ལམ་གསུང་འདོན་མཛད་རྗེས་བཀའ་སློབ་སྩལ་ཡོད།
སྐུ་པར་སྐུ་སྒེར་ཡིག་ཚང།
དེ་ཡང་༸གོང་ས་མཆོག་ཁུལ་དེར་༸ཞབས་སོར་འཁོད་མཚམས་མཆོད་ཁང་གི་འགན་འཛིན་སྐུ་ཞབས་ཇོན་ཨར་ཧོལ་ Reverend John R Hall མཆོག་གིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་སྨོན་ལམ་གསུང་འདོན་གྲུབ་རྗེས་༸གོང་ས་མཆོག་གིས་བཀའ་སློབ་སྩལ་དོན། ཆོས་ལུགས་ཕན་ཚུན་ལྟ་གྲུབ་མི་འདྲ་བ་དང་གྱོན་ཆས་དང་ཞྭ་མོ་མི་འདྲ་བ་གྱོན་རྒྱུ་ཡོད་ཀྱང་གཞི་རྩའི་བྱམས་པ་དང་བརྩེ་བ་སོགས་བཟང་པོའི་བསླབ་བྱ་གཅིག་མཚུངས་སུ་ཡོད་པ་དེར་བསམ་བློ་ཤུགས་ཆེ་བཏང་སྟེ་གནས་ཐུབ་ཧ་ཅང་གལ་ཆེན་པོ་ཆགས་ཡོད། ང་ཚོ་ཚང་མ་ཆོས་གྲོགས་ཕོ་མོ་ཡིན་བསམ་པའི་འདུ་ཤེས་འཆང་སྟེ་མཐུན་ལམ་བྱེད་ཐུབ་པ་བྱུང་ན། ཁོར་ཡུག་སྲུང་སྐྱོབ་ཀྱི་མཚོན་གོ་ལ་སྤྱིའི་དཀའ་ངལ་མང་དག་ཅིག་སེལ་ཐུབ་རྒྱུར་ཧ་ཅང་ཕན་ཐོགས་ཡོད།
སྲོལ་རྒྱུན་གྱི་བསླབ་བྱ་དེ་དག་ང་ཚོས་ཉིན་རེའི་འཚོ་བའི་ཁྲོད་བེད་སྤྱོད་བྱེད་ཐུབ་ཚེ་ང་ཚོས་ཆོས་ལུགས་ཀྱི་རིན་ཐང་དེ་དག་དངོས་སུ་ར་སྤྲོད་ཐུབ། ཅེས་སོགས་ཀྱི་བཀའ་སློབ་སྩལ། དེ་རྗེས་མཆོད་ཁང་དེའི་ནང་གི་ཇེ་རུ་ས་ལིམ་ཚོགས་ཁང་ (Jerusalem Chamber) ཞེས་པ་དེར་གདན་ཞུས་ལྟར་ཆིབས་སྒྱུར་བསྐྱངས། ཚོགས་ཁང་དེར་རྒྱ་མིས་བོད་ནང་བཙན་འཛུལ་མ་བྱས་སྔོན་དུ་བོད་ནང་བསྐྱོད་མྱོང་མཁན་གྱི་དབྱིན་ཇིའི་མི་རིགས་ཁག་གཅིག་དང་མཇལ་འཕྲད་མཛད། སྐབས་དེར་ཕྱི་ལོ་ ༡༩༥༩ གོང་དུ་བོད་ཁམས་ཀྱི་ས་ཁུལ་དུ་བོད་གཞུང་གི་རླུང་འཕྲིན་ལས་བྱེད་པ་སྐུ་ཞབས་རོ་བྷ་ཌ་ཕོ་ཌ་ Robert Ford ལགས་མཐར་རྒྱ་མིས་བཙོན་འཇུག་བྱས་པ་ཁོང་ད་ལྟ་གཟུགས་གཞི་བདེ་མིན་གྱིས་དངོས་སུ་ཚོགས་ཁང་དུ་༸གོང་ས་མཆོག་ལ་མཇལ་བཅར་ཞུ་མ་ཐུབ་པར་བརྟེན། ཁོང་གི་བུས་ཕའི་གནས་འཕྲིན་ཞིག་བསྐུར་བ་དེ་སྙན་སྒྲོན་ཞུས། གནས་འཕྲིན་དེའི་ནང་བོད་དེ་བཞིན་དེ་སྔ་རང་བཙན་གཙང་མའི་རྒྱལ་ཁབ་གཅིག་ཡིན་པ་དང། བོད་རང་ཉིད་ལ་སྲིད་གཞུང་དང་སྐད་ཡིག ཆས་གོས། བོད་མིའི་ཐུན་མིན་ཁྱད་ཆོས་ལྡན་སྐོར་བཀོད་ཡོད་པ་མ་ཟད། ཁོང་བོད་ནང་དུ་སྡོད་སྐབས་ཐུག་འཕྲད་བྱུང་བའི་བོད་མི་ཚང་མ་དྲང་པོ་དྲང་གཞག་དང། རང་གཤིས་འཇམ་པོ། སྣང་བ་སྐྱིད་པོ། ཆོས་དད་དང་རང་གི་དབུ་ཁྲིད་༸གོང་ས་ཏཱ་ལའི་བླ་མ་མཆོག་ལ་ཧ་ཅང་དད་པ་བྱེད་མཁན་ཡིན་སྐོར་སོགས་འཁོད་ཡོད་རྣམས་སྙན་སྒྲོན་ཞུས། སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། ང་ཚོའི་འཐབ་རྩོད་དེ་བདེན་པ་དང་མེ་མདའི་དབར་གྱི་འཐབ་རྩོད་གཅིག་ཡིན། གནས་སྐབས་མེ་མདར་རྒྱལ་ཁ་ཐོབ་ཀྱང་ཕུགས་ལ་དྲང་བདེན་ལ་རྒྱལ་ཁ་ཐོབ་ངེས་ཡིན།
ང་ཚོས་མཐའ་གཅིག་ཏུ་འཚེ་བ་མེད་པའི་ལམ་ལ་བརྟེན་ནས་འཐབ་རྩོད་བྱས་དང་བྱེད་བཞིན་པར་བརྟེན་དབྱིན་ཡུལ་གཙོས་འཛམ་གླིང་ནང་རྒྱབ་སྐྱོར་བྱེད་མཁན་ཇེ་མང་ཇེ་མང་དུ་འགྲོ་བཞིན་པ་མ་ཟད། རྒྱ་རིགས་དངོས་ཡོད་གནས་ཚུལ་ཤེས་མཁན་ཁྲོད་ང་ཚོར་ཤ་ཚའི་ཐོག་ནས་རྒྱབ་སྐྱོར་བྱེད་མཁན་ཇེ་མང་དུ་འགྲོ་བཞིན་ཡོད། དེར་བརྟེན་ཁྱེད་ཚོས་བོད་སྐོར་དངོས་སུ་མཐོང་ཐོས་བྱུང་བའི་བདེན་པའི་གནས་ཚུལ་དེ་དག་གཞན་ལ་འགྲེལ་བཤད་གང་ཐུབ་རྒྱག་རོགས། ཞེས་སོགས་ཀྱི་བཀའ་སློབ་སྩལ།
དེ་རྗེས་༸གོང་ས་མཆོག་གིས་དབྱིན་ཇིའི་རུའི་ཊར་གསར་འགྱུར་བརྒྱུད་ལམ་གྱི་གསར་འགོད་པའི་ཆེད་དོན་དྲི་བར་བཀའ་ལན་སྩལ་ཡོད་པ་བཅས།།
