༢༠༡༢ ཟླ་ ༦ ཚེས་ ༢༡ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་ཕྱི་ལོ་ ༢༠༡༢ ཟླ་ ༦ ཚེས་ ༢༠ ཕྱེད་ཡོལ་ཆུ་ཚོད་ ༤ ཐོག་རྟ་མགྲིན་ཐར་ལགས་ཀྱི་ཆེད་མཆོད་འབུལ་སྨོན་ལམ་ཚུགས་བཞིན་པའི་སྐབས་སླར་ཡང་ཕྱི་ལོ་ ༢༠༡༢ ཟླ་ ༦ ཚེས་ ༢༠ ཉིན་བོད་ནང་གི་ཕྱི་དྲོའི་ཆུ་ཚོད་ ༣།༣༠ ཐོག་རང་ལོ་ ༢༢ ཡིན་པའི་ངག་དབང་ནོར་འཕེལ་ལགས་དང་། རང་ལོ་ ༢༤ ཡིན་པའི་བསྟན་འཛིན་མཁས་གྲུབ་ལགས་གཉིས་ཀྱིས་ཁམས་ཡུལ་ཤུལ་རྫ་སྟོད་གྲོང་རྡལ་དུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་པའི་གནས་ཚུལ་ཐོན་ཡོད། དེ་ཡང་བརྙན་པར་ལག་སོན་བྱུང་བའི་ནང་ཁོང་གཉིས་ཀྱིས་རང་ལུས་མེར་སྲེག་གཏོང་སྐབས་ལག་ཏུ་བོད་ཀྱི་རྒྱལ་དར་ཐོགས་ཏེ་བོད་ནང་རང་དབང་དགོས། ༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པའི་འབོད་ཚིག་བསྒྲགས་ཡོད།
སྐབས་དེར་བསྟན་འཛིན་མཁས་གྲུབ་ལགས་འདས་གྲོངས་སུ་གྱུར་ཡོད་ཀྱང། ངག་དབང་ནོར་འཕེལ་ལགས་ལ་རྨས་སྐྱོན་ཚབས་ཆེ་ཕོག་རྗེས་ཁོང་ད་ལྟ་ས་གནས་གང་དུ་ཡོད་མེད་སྐོར་གནས་ཚུལ་ཤེས་རྟོགས་གང་ཡང་བྱུང་མེད།
ཐེངས་འདིར་རྒྱ་ནག་ཏུ་རྟེན་གཞི་བྱས་པའི་ཌེན་མཀ་གཞུང་ཚབ་ནས་ཕྱི་ཚེས་ ༡༩ ཉིན་བརྗོད་དོན་ལྟར་ན། ཌེན་མཀ་ཕྱི་འབྲེལ་ཆབ་སྲིད་ཚོགས་ཆུང་གི་སྐུ་ཚབ་འཐུས་མིས་རྒྱལ་ས་པེ་ཅིང་དང་མཚོ་སྔོན་ཞིང་ཆེན་གྱི་ས་ཁུལ་དུ་ཕེབས་ཏེ་ཁོར་ཡུག་དང་སྤྱི་ཚོགས། དཔལ་འབྱོར། ཆབ་སྲིད་གནས་སྟངས་སོགས་ཀྱི་དཀའ་ངལ། དེ་བཞིན་རྒྱལ་སྤྱིའི་ནང་རྒྱ་ནག་འབྲེལ་བ་ཆེན་པོ་ཆགས་བཞིན་ཡོད་སྐོར་སོགས་བགྲོ་གླེང་གནང་རྒྱུ་དང། ཕྱོགས་མཚུངས་སྐུ་ཚབ་འཐུས་མི་རྣམ་པས་ཡུལ་ཤུལ་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་དུ་ཕེབས་རྒྱུ་མ་ཟད། བོད་རིགས་གནས་སྡོད་ཀྱི་གྲོང་ཚོ་ཁག་གཅིག་ལའང་གཟིགས་སྐོར་གནང་རྒྱུ་ཡིན་འདུག དེར་བརྟེན་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་གསུང་དོན། རྒྱ་ནག་གཞུང་ནས་ཌེན་མཀ་སྐུ་ཚབ་འཐུས་མི་རྣམས་ལ་ཡུལ་ཤུལ་ས་གནས་ཀྱི་བོད་མི་ཚོར་རང་དབང་ཐོག་ནས་ཁོང་ཚོའི་བདེ་སྡུག་སྐོར་ལ་དྲི་བ་དྲིས་ལན་བྱ་རྒྱུའི་ཐོབ་ཐང་སྤྲོད་རྒྱུར་ང་ཚོས་རེ་བ་ཞུ་བཞིན་ཡོད་ཅེས་གསུངས་ཡོད། ཕྱི་ལོ་ ༢༠༠༩ ནས་ད་བར་བོད་མི་ ༤༢ ཀྱིས་རང་ལུས་མེར་སྲེག་བཏང་སྟེ་བོད་ལ་རང་དབང་དགོས་པ་དང་༸གོང་ས་མཆོག་བོད་དུ་གདན་འདྲེན་ཞུ་དགོས་པའི་དགོས་འདུན་བཏོན་ཡོད་པ་བཅས།།
