༢༠༡༢ ཟླ་ ༦ ཚེས་ ༢༡ རེས་གཟའ་ཕུར་བུ།
༄༅། །འདི་གར་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་ནས་བཏང་གནས་ནང་འཁོད་དོན། ཆེས་མཐོའི་ཁྲིམས་ཞིབ་ཁང་གི་བཀོད་ཁྱབ་གཞིར་བཟུང་། བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་ས་གནས་ཁྲིམས་ཞིབ་པ་བསྟན་འཛིན་ལྷུན་གྲུབ་ལགས་ཀྱིས། ཕྱི་ལོ་ ༢༠༡༢ ཟླ་ ༤ ཚེས་ ༢ ནས་ ༢༤ བར་སིམ་ལ་དབྱངས་ཅན་དགའ་ཚལ་གླིང་དང་། སིམ་ལ་གཏན་སློབ། ཌོ་ལན་ཇི་བོན་གཞིས་དང་སྨན་རི་དགོན་པ། བདེ་སྐྱིད་གླིང་ས་གནས་འགོ་འཛིན་གྱི་ཁྱབ་ཁོངས་ན་ནི་ཏལ། ཧ་རི་ཌུ་ཝར། སཱཧ་རཎ་པཱུར། མ་སུ་རི་སློབ་གྲྭ་ཁག་གཉིས་དང་མི་མང་། དོན་གྲུབ་གླིང་། རཇ་པཱུར་བཟོ་གྲྭ། བདེ་སྐྱིད་གླིང་། ཚེ་རིང་དོན་ལྡན་བཅས་རྒྱ་གར་གྱི་མངའ་སྡེ་གསུམ་ནང་གི་བོད་མིའི་གཞིས་ཆགས་དང་ཁ་འཐོར་ས་གནས་ ༡༢ ཀྱི་སེར་སྐྱ་མང་ཚོགས་དང་། དགེ་ལས་སློབ་ཕྲུག་བཅས་ལ་བཙན་བྱོལ་བོད་མིའི་ཁྲིམས་ལུགས་གོ་རྟོགས་སྤེལ་བའི་ལས་གཞི་ལེགས་གྲུབ་བྱུང་ཡོད་། དེ་བཞིན་མཎ་ཌུ་ཝ་ལ་གཞིས་ཆགས་སུ་རིང་མིན་ཁྲིམས་ལུགས་གོ་རྟོགས་སྤེལ་འཆར་ཡོད་འདུག
མ་སུ་རི་བོད་ཁྱིམ་སློབ་མ།
ཐེངས་འདིར་ཁྲིམས་ལུགས་གོ་རྟོགས་སྤེལ་བའི་གོ་སྐབས་དང་བསྟུན། ཟླ་ ༤ ཚེས་ ༤ ཉིན། ཌོ་ལན་ཇི་བོན་གཞིས་སྐབས་ ༧ པའི་ས་གནས་འཐུས་ཚོགས་ཀྱི་ཚོགས་གཙོ་ཚོགས་གཞོན་དང་། འཐུས་མི་ ༡༠ བཅས་ནས་ས་གནས་ཁྲིམས་ཞིབ་པའི་མདུན་དུ་ལས་ཁུར་དམ་འབུལ་ཞུས་འདུག་པ་བཅས།།
