༢༠༡༢ ཟླ་ ༦ ཚེས་ ༢༠ རེསགཟའ་ལྷག་པ།
༄༅། །མོན་གྷོ་འདོད་རྒུ་གླིང་གཞིས་ཆགས་ཀྱི་གཞིས་གྲོང་ ༢ ནང་གི་བུད་མེད་སློབ་མ་རང་ལོ་ ༢༡ སོན་པ་ཉི་མ་ཟླ་བ་ལྷ་མོ་ལགས་ནི་བྷེལ་གམ་དུ་རྟེན་གཞི་བྱས་པའི་ཀེ་ཨེལ་ཨི་ (KLE Hospital in Belgaum) སྨན་ཁང་ནང་སློབ་སྦྱོང་བྱེད་བཞིན་ཡོད། ཁོ་མོ་བར་ལམ་ལུས་ཁམས་མི་བདེ་བར་བརྟེན་སྨན་ཁང་དེར་ཕྱི་ལོ་ ༢༠༡༢ ཟླ་ ༥ ཚེས་ ༢༢ ཉིན་བརྟག་དཔྱད་བྱས་འབྲས་སུ་སྨན་པས་ཁོ་མོར་རུས་རྐང་ནད་གཞིས་ bone marrow ཡོད་སྐོར་བརྗོད་ཡོད་པ་མ་ཟད། ནད་གཞི་དེར་གཤག་བཅོས་ཀྱི་ལམ་ནས་གང་མགྱོགས་སྨན་བཅོས་བྱེད་མ་ཐུབ་ཚེ་སྲོག་ཉེན་ཡོད་སྐོར་གསུངས་པ་དང་སྦྲགས། ན་ཚ་དེར་སྨན་གཅོད་ཆེད་ཧིན་སྒོར་འབུམ་བཅུ་ནས་བཅུ་གཉིས་བར་འགྲོ་གྲོན་འགྲོ་རྒྱུ་ཡིན་སྐོར་གསུངས་ཡོད། འོན་ཀྱང་ཁོ་མོ་ཕྱེད་དྭ་ཕྲུག་ཡིན་པ་དང་རང་གི་མ་དང་ལྷན་སྤུ༜ན་མཆེད་བདུན་ཡོད་པར་བརྟེན། འགྲོ་སོང་ཕོན་ཆེ་དེ་འདྲ་ཞིག་རྩ་བ་ནས་བསྒྲུབ་ཐབས་མེད་སྟབས། མོན་གྷོ་ས་གནས་འགོ་འཛིན་བརྒྱུད་ཞལ་འདེབས་ཆེད་འབོད་སྐུལ་ཞུ་རྒྱུ་ལས་དེ་མིན་བྱ་ཐབས་བྲལ་སྐབས། ས་གནས་གཞོན་སྐྱེས་ཁག་གཅིག་གིས་མ་སྐུལ་དང་བླངས་ཐོག་ནས་ཞལ་འདེབས་བསྡུ་རུབ་ཀྱིས་ཐུན་མོང་ཚོགས་པ་དང་། གཞིས་གྲོང་དགུ་པའི་ཕོ་གསར་ཚོགས་པ། སོགས་བཙུགས་ཏེ་གཞིས་གྲོང་སོ་སོའི་ཁྱིམ་ཚང་རེ་རེའི་སྒོ་ཁར་ཞལ་འདེབས་སློང་མི་བཏང་ཡོད་སྟབས། ས་གནས་སུ་རྟེན་གཞི་བྱས་པའི་ས་སྐྱ་མདོ་སྔགས་ཆོས་གླིང་དགོན་པ་དང་ཕྱི་རྒྱལ་ཡུལ་གྲུ་ཨ་རིའི་གྲོང་ཁྱེར་ནིའུ་ཡོཀ་དང་ཁེ་ན་ཌ། བྷེལ་ཇམ་སོགས་ནས་སེམས་ཁུར་ཆེན་པོས་ཞལ་འདེབས་བསྡུ་རུབ་ཀྱི་ལས་འགུལ་ཐོག་རྒྱབ་སྐྱོར་གནང་འབྲས་སུ་ཞལ་འདེབས་ཧིན་སྒོར་ ༡༦ ༧༡ ༧༦༦ བྱུང་ཡོད།
དེ་བཞིན་བསྟན་འཛིན་སྣང་གསལ་ལགས་ཀྱིས་ངོ་དེབ་(Face book) བརྒྱུད་ཉི་མ་ཟླ་བ་ལྷ་མོའི་དཀའ་ངལ་སེལ་ཆེད་རྒྱབ་སྐྱོར་འཚོལ་ཐབས་ཀྱི་ལས་འགུལ་རྒྱ་ཆེ་སྤེལ་ཡོད། གནས་ཚུལ་དེ་དག་ཐོན་འཕྲལ་བཀའ་ཁྲི་བློ་བཟང་སེང་གེ་མཆོག་གིས་མོན་གྷོ་འདོད་རྒུ་གླིང་གཞིས་ཆགས་ཀྱི་ལས་འགུལ་དེ་བཀའ་ཤག་གི་ལྟ་གྲུབ་ཆིག་སྒྲིལ་དང། གསར་གཏོད། རང་ཁ་རང་གསོ་བཅས་དང་མཐུན་པའི་བསྔགས་བརྗོད་གནང་བ་མ་ཟད། རྒྱབ་སྐྱོར་གནང་མཁན་ཚང་མར་ཐུགས་རྗེ་ཆེ་ཞུས་ཡོད། ཉི་མ་ཟླ་བ་ལྷ་མོ་ལགས་ད་ལྟའི་ཆར་རྒྱ་གར་ལྷོ་ཕྱོགས་ཏ་མིལ་ན་ཌུ་མངའ་སྡེའི་ཝལ་ལུར་ Vellore གྲོང་ཁྱེར་དུ་ཡི་ཤུའི་སྨན་ཁང་ཞིག་གི་ནང་སྨན་བཅོས་བྱེད་མུས་ཡིན་འདུག་པ་བཅས།།