༢༠༡༢ ཟླ་ ༦ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༧ ཉིན་བོད་མིའི་སྒྲི་འཛུགས་ཀྱི་ས་གནས་འགོ་འཛིན་དང་འབྲེལ་མཐུད་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༨ བརྒྱད་པ་འཇུག་སྒྲིལ་དང་འབྲེལ་བློན་ཆེན་ལས་ཁུངས་ཁག་གི་ས་གནས་སུ་ལས་དོན་དང་འབྲེལ་བའི་ངོ་སྤྲོད་སྙིང་བསྡུས་དང་གྲོས་ཆོད་ཁག་གཅིག་བཞག་འདུག
དེ་ཉིན་སྔ་དྲོ་ཆུ་ཚོད་ ༩ ཐོག་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་ཀྱིས་ངོ་སྤྲོད་གསུང་བཤད་རྗེས་ཆོས་རིག་ལས་ཁུངས་ཀྱི་དྲུང་ཆེ་ངག་དབང་ཆོས་གྲགས་ལགས་ཀྱིས་ས་གནས་སུ་ལས་དོན་དང་འབྲེལ་བའི་གསུང་བཤད་རྗེས་དྲི་བ་དྲིས་ལན་གནང་། དེ་རྗེས་བདེ་སྲུང་བཀའ་བློན་འབྲོང་ཆུང་དངོས་གྲུབ་ལགས་དང་དྲུང་ཆེ་དངོས་གྲུབ་རྡོ་རྗེ་ལགས་ཀྱིས་༸རྒྱལ་བའི་སྐུ་ཕྱྭ་དང་སྐྱབས་བཅོལ་ལག་དེབ་འབྲེལ་བའི་ས་གནས་སུ་ལས་དོན་སྐོར་གསུང་བཤད་གནང་རྗེས་དྲི་བ་དྲིས་ལན་གནང་། དེ་ནས་ཤེས་རིག་དྲུང་འཕར་སྟོབས་རྒྱལ་ཚེ་རིང་ལགས་དང་ཟུང་དྲུང་འཆི་མེད་ཚེ་དབྱངས་ལགས་གཉིས་ཀྱིས་ཕྲུ་གུའི་སློབ་ཡོན་དང་འབྲེལ་བའི་སྐོར་གསུང་བཤད་དང་དྲི་བ་དྲིས་ལན་རྗེས་ཕྱི་དྲིལ་ལས་ཁུངས་ཀྱི་དྲུང་ཆེ་བཀྲིས་ལགས་ཀྱིས་དབུས་ཕྱག་རོགས་རྣམ་པས་ས་གནས་སུ་ལས་དོན་དང་འབྲེལ་བའི་སྐོར་གསུང་བཤད་རྗེས་དྲི་བ་དྲིས་ལན་གནང་། དེ་ནས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་ཀྱིས་དབུས་ཕྱག་རོགས་རྣམ་པ་བཅས་ཀྱིས་སྤྱིར་ས་གནས་སུ་འཕྲོད་བསྟེན་དང་ན་ཚ་སྔོན་འགོག་རྩིས་ཁྲ་བཅས་ཀྱི་སྐོར་ལ་ངོ་སྤྲོད་རྗེས་དྲི་བ་དྲིས་ལན་གནང་། དེ་རྗེས་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་དང་དྲུང་ཆེ་འཕྲིན་ལས་རྒྱ་མཚོ་ལགས་ཀྱིས་དབུས་ཕྱག་རོགས་རྣམ་པས་ལག་དེབ་ལྗང་གུ་གསར་བཟོ་དང་བཟོ་བཅོས། འགྲོ་སོང་དངུལ་རྩིས་སྟངས་འཛིན་བྱེད་ཕྱོགས་སྐོར་གསུང་བཤད་གནང་སྟེ་དྲི་བ་དྲིས་ལན་རྗེས་བཀའ་ཤག་ནས་ས་གནས་འགོ་འཛིན་རྣམ་པར་གསོལ་སྟོན་བཤམས་ཏེ་ཚོགས་འདུ་གྲོལ་ཡོད་པ་བཅས།