༢༠༡༢ ཟླ་ ༦ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༦ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཇིའི་གྲོང་ཁྱེར་མན་ཆེ་སི་ཊར་ཁུལ་དུ་ཐོག་མར་གསར་ཤོག་གྲགས་ཅན་ཁག་གཅིག་གི་གསར་འགོད་པའི་ཆེད་དོན་དྲི་བར་བཀའ་ལན་སྩལ། དེ་རྗེས་གཞོན་སྐྱེས་ཚོགས་པ་འདྲ་མིན་གྱི་འགོ་ཁྲིད་རྣམས་ལ་སོ་སོས་འགན་ཁུར་བླངས་ཏེ་སྤྱི་ཚོགས་བཟང་པོ་ཞིག་ཏུ་སྒྱུར་ཐབས་བྱེད་དགོས།
ཞེས་པའི་བརྗོད་གཞིའི་ཐོག་ (Stand up & Be the Change) བཀའ་སློབ་སྩལ་དོན། ངོས་རང་དུས་རབས་ ༢༠ མི་ཞིག་ཆགས་ཡོད། དུས་རབས་ ༢༠ ད་ཆ་ཡོལ་ཟིན། དུས་རབས་དེའི་སྐབས་མི་ཚོས་འཛམ་གླིང་གི་རྙོག་གྲ་དང་དཀའ་ངལ་དེ་དག་སེལ་རྒྱུའི་ཐབས་ལམ་ཉག་གཅིག་ནི་དྲག་པོའི་སྟོབས་ཤུགས་ཁོ་ན་ཡིན་པར་ངོས་འཛིན་བྱས་ཡོད།
སྤྱིར་རྙོག་གྲ་སེལ་རྒྱུའི་འདུན་པ་བཅང་སྟེ་དྲག་ཤུགས་བེད་སྤྱོད་བྱེད་སྐབས་ཀུན་སློང་ལ་སྐྱོན་མེད་ཀྱང། ཐབས་ལམ་དེ་ནོར་བ་རེད། གང་ཡིན་བརྗོད་ན། དྲག་པོས་རྙོག་གྲ་སེལ་རྒྱུའི་ཚབ་ཏུ་རྙོག་གྲ་འཕར་མ་བཟོ་གི་ཡོད། ང་ཚོས་ཉམས་མྱོང་ཐོག་ནས་དཀའ་ངལ་དེ་དག་འཚེ་བ་མེད་པའི་གྲོས་མོལ་གྱི་ཐབས་ལམ་ཁོ་ན་བརྒྱུད་སེལ་རྒྱུ་གལ་ཆེ་ཡིན་པ་ཤེས་དགོས། ཞེས་སོགས་ཀྱི་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་སྩལ།
ཉིན་གུང་ལྗགས་སྨིན་གྲུབ་བསྟུན་༸གོང་ས་མཆོག་གིས་མན་ཆེ་སི་ཊར་ཨེ་རི་ན་ (Manchester arena) ཆིབས་སྒྱུར་བསྐྱངས་ཏེ་གཞོན་སྐྱེས་ཆིག་ཁྲི་བརྒལ་བར་བཀའ་སློབ་སྩལ་ཡོད། སྐབས་དེར་དབྱིན་ཇིའི་མཚར་གཏམ་འཁྲབ་སྟོན་པ་སྙན་གྲགས་ཅན་སྐུ་ཞབས་རས་སེལ་བྷ་རན་ཌ་ (Russell Brand) ལགས་ཀྱིས་གཞོན་སྐྱེས་ཚོར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ངོ་སྤྲོད་ཀྱི་གསུང་བཤད་གནང་རྗེས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་ལྷོ་ཨ་མི་རི་ཀའི་གོ་ཏ་མ་ལ་ནས་Guatamalaཡིན་པ་སྐུ་ཞབས་མ་ཡན་རི་གོ་བྷེར་ཏ་མན་ཅུ་ Mayan Rigoberta Menchu མཆོག་དང། ལྷོ་ཨ་ཕི་རི་ཀའི་ཡི་ཤུའི་ཆོས་དཔོན་སྐུ་ཞབས་ཌེ་སི་མོན་ཊུ་ཊུ་མཆོག་ Desmond Tutu རྣམ་གཉིས་ཀྱིས་གནས་འཕྲིན་ཐུང་ངུ་ཞིག་བརྙན་འཕྲིན་བརྒྱུད་མང་ཚོགས་ལ་བསྟན་ཡོད། དེ་རྗེས་༸གོང་ས་མཆོག་གིས་བཀའ་སློབ་སྩལ་དོན།
གལ་ཏེ་ངོས་རང་ནང་པ་ཞིག་དང་བོད་མི་ཞིག་ཡིན་བསམ་པའི་ཀུན་སློང་བཅང་ཚེ་ང་ཚོའི་དབར་རང་བཞིན་གྱིས་བར་ཁྱད་ཅིག་ཡོང་རྒྱུ་ཡིན། དེར་བརྟེན་ངོས་ཀྱིས་རྒྱུན་དུ་ང་ཚོ་ཚང་མ་ལུས་ཤེས་དང་། སེམས་ཚོར་གང་གི་ཆ་ནས་བདེ་བ་འདོད་མཁན་དང་སྡུག་བསྔལ་མི་འདོད་པའི་འགྲོ་བ་མི་རིགས་གཅིག་མཚུངས་ཤིག་ཆགས་ཡོད་བསམ་དྲན་གྱི་ཡོད། མིའི་རྣམ་དཔྱོད་ལ་བརྟེན་ནས་དུད་འགྲོ་དང་ཁྱད་པར་འབྱེད་ཀྱི་ཡོད། འོན་ཀྱང་གལ་ཏེ་ཆགས་སྡང་གིས་གཞན་དབང་དུ་སོང་ཚེ་རྣམ་སྤྱོད་དེས་ཕན་པ་ལས་གནོད་པའི་རྐྱེན་དུ་འགྲོ་རྒྱུ་ཡིན། དེར་བརྟེན་དེ་འདྲ་མི་ཡོང་ཆེད་ང་ཚོས་དངོས་ཡོད་གནས་ཚུལ་ལ་གཞི་བཅོལ་ཏེ་བྱམས་བརྩེའི་བསམ་པ་ཉམས་སུ་བླང་སྟེ་མ་འོངས་པར་སྤྱི་ཚོགས་བཟང་པོ་ཞིག་བསྐྲུན་རྒྱུར་འཆར་སྣང་ཙམ་མ་ཟད།
ཆོད་སེམས་དང་ཞུམ་པ་མེད་པའི་སྙིང་སྟོབས་བཅང་དགོས། བཟང་སྤྱོད་ཀྱི་བསམ་བློ་དེ་འདྲ་ཞིག་བརྒྱུད་ལ་བསྐྱེད་པར་རང་ཉིད་ལ་གདེང་སྤོབས་དགོས། སེམས་ནང་གདེང་སྤོབས་དེ་འདྲ་ཞིག་ཡོང་བར་རང་ཉིད་ཀྱིས་གཞན་ལ་དྲང་པོ་དྲང་གཞག་དང་བསམ་པ་རྣམ་དག་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་སོགས་ཀྱི་བཀའ་སློབ་སྩལ། དེ་རྗེས་དབྱིན་ཡུལ་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་ཀྱིས་༸གོང་ས་མཆོག་ལ་གསོལ་འདེབས་ཞུས་དོན་ལྟར་མགོན་པོ་གང་ཉིད་མཆོག་གིས་དབྱིན་ཇིའི་སློབ་གྲྭའི་སློབ་ཕྲུག་བུད་མེད་སོ་ཕི་ཡ་ Sophia ལགས་ཀྱིས་བྱམས་བརྩེའི་ཉམས་ལེན་ཐོག་སྤྱི་ཚོགས་ནང་ལས་རིགས་འདྲ་མིན་སྤེལ་བར་ཆེ་བསྟོད་ཀྱི་བྱ་དགའ་གསོལ་རས་སྩལ་ཡོད་པ་བཅས།།
