ཕྱི་ལོ་ ༢༠༠༨ ཟླ་ ༡༡ ཚེས་ ༡༠ རེས་གཟའ་ཟླ་བ།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ནུབ་ཕྱོགས་གྲོང་ཁྱེར་པུཎེའི་ནང་ཡོད་པའི་ཧིན་དྷུའི་ས་དྷུ་ཝསེ་ཝ་ནིའི་ (Sadhu Vaswani)ཆོས་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་ཕྱིི་ལོ་ ༢༠༠༨ ཟླ་ ༡༡ ཚེས་ ༨ རེས་གཟའ་སྤེན་པའི་ཉིན་ཆོས་ཚོགས་དེར་ཆིབས་སྒྱུར་བསྐྱངས་ཏེ་གྷི་ཏཱ་མན་ལར་ (Gita Mandir)ཞེས་པའི་ལྷ་ཁང་གསར་པ་ཞིག་དབུ་འབྱེད་བཀའ་དྲིན་བསྐྱངས་ཡོད་པ་དང་། གྷི་ཏཱ་མན་ལྷིར་ཞེས་པའི་ལྷ་ཁང་གསར་པ་དེའི་དབུ་འབྱེད་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། རྒྱ་གར་དང་བོད་གཉིས་ཀྱི་འབྲེལ་བ་དེ་དགེ་རྒན་དང་དགེ་ཕྲུག་གི་འབྲེལ་བ་ཞིག་ཡིན་པས་གལ་ཏེ་དགེ་ཕྲུག་ལ་དཀའ་ངལ་ཡོད་པ་ཡིན་ན་དེ་སེལ་རྒྱུའི་འགན་དེ་དགེ་རྒན་ལ་ཡོད་པ་རེད། ཅེས་དང་། རྒྱ་གར་གྱི་བྱམས་བརྩེའི་གདམས་ངག་བོད་ལ་འབྱོར་བའི་རྗེས་སུ་གཞི་ནས་བོད་འདི་རིག་གཞུང་གི་དཔལ་ཡོན་ལྡན་པའི་སྤྱི་ཚོགས་ཤིག་ཏུ་གྱུར་པ་རེད། སྟོན་པ་སངས་རྒྱས་བཅོམ་ལྡན་འདས་ཀྱི་བསྟན་པ་བོད་ལ་དར་བ་དེས་བོད་མིའི་མི་ཚེ་དོན་དང་ལྡན་པ་ཞིག་ཡོང་རྒྱུར་ཕན་རླབས་ཤིན་ཏུ་ཆེན་པོ་བྱུང་ཡོད། དེར་བརྟེན་ད་ལྟ་ང་ཚོའི་ལུང་པ་རྒྱ་ནག་གི་དབང་སྒྱུར་འོག་ཤོར་བའི་སྐབས་འདིར་ཡང་བོད་མི་ཚོའི་རེ་བ་བཅོལ་ཡུལ་རྒྱ་གར་ཆགས་ཡོད། ཅེས་བཀའ་སྩལ་ཡོད། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས། དེ་ལྟར་རྒྱ་གར་གྱིས་བོད་ཀྱི་རྩ་དོན་ལ་རྒྱབ་སྐྱོར་གནང་བའི་སྐབས་འདིར་ཡང་སྲིད་དོན་ཁོ་ནའི་དབང་དུ་མ་སོང་བར་རང་བྱུང་ཁོར་ཡུག་དང་། རིག་གཞུང་། དེ་བཞིན་མི་སྤྱོད་རིང་ལུགས་བཅས་ཀྱི་ཐོག་ལའང་བསམ་ཤེས་བྱ་རྒྱུ་ཧ་ཅང་གི་གལ་ཆེན་པོ་ཡིན། ཞེས་བཀའ་གནང་བ་དང་འབྲེལ། རྒྱ་དཀར་ནག་གཉིས་ཀྱི་འབྲེལ་བར་ཆ་མཚོན་ན། རྒྱ་གར་དང་རྒྱ་ནག་གཉིས་ཀྱི་དབར་མཛའ་མཐུན་གྱི་འབྲེལ་བ་བཟང་པོ་ཞིག་བྱུང་བ་ཡིན་ན་འཛམ་གླིང་སྤྱིའི་ཞི་བདེ་དང་། བརྟན་ལྷིང་ལ་ཕན་ཐོགས་ཡོང་རྒྱུ་མ་ཟད། བོད་ལ་རང་དབང་ཐོབ་རྒྱུར་ཡང་ཕན་ཐོགས་ཡོང་རྒྱུ་རེད། ཅེས་བཀའ་སྩལ་ཡོད་པ་རེད། མཛད་སྒོ་དེའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེའི་ཐད་བཀའ་སློབ་སྩལ་དོན། འདས་ཟིན་པའི་དུས་རབས་ཉི་ཤུ་པ་དེའི་མགོ་སྟོད་དུ་མི་གསོད་ཁྲག་སབྱོར་སོགས་བྱུང་ཡོད་ཀྱང་། དུས་རབས་དེའི་དུས་མཇུག་ཏུ་འཛམ་གླིང་ས་ཕྱོགས་མང་པོ་ཞིག་ཏུ་མི་རྣམས་དེ་ལྟའི་དྲག་སྤྱོད་ལ་ཞེ་ཁྲེལ་ནས་ཞི་བདེ་ཡོང་ཐབས་བྱེད་རྒྱུ་གལ་ཆེ་ཡིན་པ་ངོས་འཛིན་ཐུབ་ཡོད། དེ་ལྟ་བུའི་ཞི་བདེ་དང་བརྟན་ལྷིང་ནི་དྲག་ཤུགས་ཀྱི་ཐོག་ནས་མ་ཡིན་པར་ཕན་ཚུན་མི་མཐུན་པ་ཡོད་རིགས་གྲོས་མོལ་གྱི་ལམ་ནས་སེལ་ཐབས་བྱེད་པ་ཁོ་ན་བརྒྱུད་ནས་ཡོང་རྒྱུ་རེད། ཅེས་བཀའ་སྩལ་ཡོད་པའི་གནས་ཚུལ་དུ།།
