༢༠༡༢ ཟླ་ ༦ ཚེས་ ༧ རེས་གཟའ་ཕུར་བུ།
༄༅། །འདི་གར་སིམ་ལ་དབྱངས་ཅན་དགའ་ཚལ་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༦ ཚེས་ ༤ དང་བོད་ཟླ་ ༤ ཚེས་ ༡༥ ཉིན་སྔ་འགྱུར་རྙིང་མའི་བླ་ཆེན་ཐུན་མོང་ནས་ཇི་ལྟར་གསོལ་བ་བཏབ་པ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་སྐྱབས་རྗེ་རྩེ་སྤྲུལ་རྡོ་རྗེ་འཆང་ཆེན་པོ་བཤད་སྒྲུབ་ཉིན་བྱེད་འཕྲིན་ལས་དཔལ་བཟང་པོ་མཆོག་ལ་སྔ་འགྱུར་རྙིང་མའི་དབུ་འཛིན་མངའ་གསོལ་རྟེན་འབྲེལ་ཀྱི་མཇལ་དར་སྩལ་ཏེ་ཁོང་གིས་གསང་ཆེན་སྔ་འགྱུར་རྙིང་མའི་དབུ་འཛིན་ཁྲི་རབས་དྲུག་པར་ཞལ་བཞེས་གནང་བར་བརྟེན། ཕྱིར་སིམ་ལར་ཞབས་སོར་འཁོད་སྐབས་ས་གནས་ཚོགས་པ་ཁག་གི་མཛད་གཙོ་རྣམ་པས་གཙོས་མི་མང་ཡོངས་ནས་རྒྱལ་སྒོ་གསར་གཞེངས་ཀྱིས་ཕེབས་ལམ་གཡས་གཡོན་དུ་བང་བསྒྲིགས་ཏེ་དགོན་པའི་སེར་སྦྲེངས་དང་བཅས་ཕེབས་བསུ་གཟབ་རྒྱས་ཞུས་ཡོད།
ཕྱི་ཚེས་ ༦ ཉིན་སྔ་འགྱུར་རྙིང་མའི་ཆོས་སྡེ་ཆེན་པོ་དྲུག་གི་ཡ་གྱལ་རྡོ་རྗེ་བྲག་དགོན་པར་རྟེན་འབྲེལ་མཛད་སྒོ་ཞིག་གོ་སྒྲིག་གནང་བ་དེའི་ཐོག་ཕེབས་པའི་མཁྱེན་བརྩེ་ཡང་སྲིད་རིན་པོ་ཆེ་མཆོག་གིས་གཙོས་རྒྱ་བལ་འབྲུག་གསུམ་ནས་རིས་མེད་དགོས་སྡེ་ཁག་གི་སྐུ་ཚབ་བླ་སྤྲུལ་རྣམ་པ་དང༌། དཔལ་ལྡན་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང༌། དཔལ་ལྡན་ཆོས་རིག་དྲུང་ཆེ་ངག་དབང་ཆོས་གྲགས་ལགས། ས་གནས་འཐུས་ཚོགས་ཀྱི་ཚོགས་གཙོ་དང་།
གཞིས་འགོས་གཙོས་ཚོགས་པ་ཁག་གི་མཛད་གཙོ་རྣམ་པ་དང་སེར་སྐྱ་མི་མང་ཡོངས་ནས་སྐྱབས་རྗེ་རིན་པོ་ཆེ་མཆོག་ལ་མཎྜལ་རྟེན་གསུམ་འདེགས་འབུལ་ཞུས་རྗེས་མི་མང་ནས་དགའ་སྤྲོའི་གཞས་སྣ་འཁྲབ་སྟོན་སོགས་ཕུལ་ཏེ་མཛད་སྒོ་རྒྱ་ཆེ་ཞིག་གནང་བ་ཡོད་པ་བཅས།།
