༢༠༡༢ ཟླ་ ༦ ཚེས་ ༥ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཐོ་སློབ་ཁག་གི་བོད་རིགས་གཞོན་སྐྱེས་གཙོ་བོར་གྱུར་
བའི་དོན་གཉེར་ཅན་རྣམས་ལ་འཇམ་དཔལ་དབྱངས་ཀྱི་རྗེས་གནང་དང་ཚན་རིག་བསླབ་པ་མཐར་སོན་པར་ཕྱག་འཁྱེར་དང་བཀའ་སློབ་སྩལ་འདུག
དེ་ཉིན་སྔ་དྲོ་ཆུ་ཚོད་ ༨།༣༠ ཐོག་བཀའ་ཁྲི་བློ་བཟང་སེང་གེ་མཆོག་གིས་དབུས་བོད་ཀྱི་དཔེ་མཛོད་ཁང་དང་ཨེ་མོ་རི་མཐོ་སློབ་ཀྱི་ནང་ཆོས་ཚན་རིག་ལས་འཆར་འགན་འཛིན་དགེ་ལས་རྣམ་པ། བོད་ཁྱིམ་སློབ་གྲྭ་ཁག་གི་འགན་འཛིན་རྣམ་པ། རྒྱ་གར་མཐོ་སློབ་ཁག་གི་བོད་རིགས་གཞོན་སྐྱེས་སློབ་མ་གཙོ་བོར་གྱུར་པའི་སློབ་མ་བཅས་ཁྱོན་གྲངས་ ༣༠༠༠ བརྒལ་བ་ལྷན་འཛོམས་ཐོག་རྡ་སྟེང་བོད་ཁྱིམ་སློབ་མ་ཁག་གཅིག་ནས་རིགས་ལམ་བརྒྱུད་སུམ་རྟག་དང་ཚན་རིག་སྐོར་སྐར་མ་ ༡༠ རིང་རྩོད་རྒྱུགས་གཟིགས་འབུལ་ཞིས་རྗེས་
༸གོང་ས་མཆོག་གིས་བཀའ་སློབ་ཕེབས་དོན། སུམ་རྟགས་དང་ཡི་གེའི་བརྡ་དག་རྟགས་གསལ་གཏོང་རྒྱུ་དང་། ལྷག་པར་ཚན་རིག་ཀྱི་བརྗོད་བྱ་རྟགས་གསལ་གཏོང་རྒྱུ་དེ་རིང་ཐོག་མ་རེད། ཕལ་ཆེར་བོད་ལ་མེད། ང་ཚོ་བཙན་བྱོལ་ལ་ཡོད་པའི་དེ་འདྲའི་ཞིག་འགོ་བཙུགས་ཐུབ་པར་བཀྲིས་བདེ་ལེགས་དང་བསྔགས་བརྗོད་ཡོད། ང་ཚོ་ཚན་རིག་པས་བརྗོད་གཞི་དེང་དུས་སློབ་ཚན་ཐོག་ལ་ཁྲིད་སྟངས་དེ་བོད་ཀྱི་རིགས་ལམ་ཐོག་ནས་དཔྱད་པ་བྱེད་རྒྱུ་དེ་ཁྲིད་ཐུབ་ཀྱི་མ་རེད་དམ་ཞེས་ཁ་སེང་སྐད་ཆ་བྱུང་ཡོད། དེ་ཡོང་གི་རེད་ང་ཚོ་བོད་པ་འབད་བརྩོན་བྱེད་ཀྱི་ཡོད། དེ་རིང་འདིར་དངོས་སུ་མཐོང་རྒྱུ་ཡོད་པ་ཞིག་བྱུང་བ་རེད། ཧ་ཅང་ཡག་པོ་བྱུང་འདུག ང་རང་ཚོ་བོད་པ་རང་ཉིད་ཀྱི་སྐད་ཡིག་གི་ནང་ནས་རིམ་པས་ཚན་རིག་སློབ་ཚན་གྱི་གྲས་བོད་སྐད་ནང་སློབ་ཐུབ་རྒྱུ་དེ་ལོ་ལྔའི་སྔོན་ནས་སློབ་ཚན་བོད་ཡིག་ནང་སྒྱུར་ཚར་བ་རེད། རིམ་པས་མིང་ཚིག་དེ་དབྱིན་ཡིག་ཚིག་བེད་སྤྱོད་བྱས་ཁྱབ་མཐའ་དེ་བོད་སྐད་ནང་གཏོང་རྒྱུ་དེ་མཚམས་སྦྱོར་དང་མཐུད་རྒྱག་གི་ཡོད། མདོ་དོན་ཡང་སྙིང་དེང་དུས་ཀྱི་ཤེས་ཡོན་རིགས་ལམ་གྱི་དཔྱད་པ་བྱ་རྒྱུའི་ལམ་དེའི་ཐོག་ནས་གཏན་ལ་འབེབས་རྒྱུ་ཞིག་བྱུང་བ་ཡིན་ན། ཁྱབ་མཐའ་བཏང་ནས་དཔྱད་དུས་ཧ་ཅང་ཞིབ་ཚགས་ཡང་གི་རེད། མི་ཚོས་ཨང་རྩིས་ཐོག་ནས་ཞིབ་ཚགས་བཟོ་གི་ཡོད། ང་ཚོ་རིགས་ལམ་གྱི་དཔྱད་པ་བྱེད་སྟངས་ཐོག་ནས་ཞིབ་ཚགས་བཟོ་རྒྱུའི་ཏག་ཏག་ཞིག་ཡོང་གི་འདུག རྩ་བའི་རྟགས་གསལ་ཁྱབ་མཐའ་འགྲོ་སྟངས་དེ་ན་ལནྡྲེའི་མཁས་པའི་གསུངས་པ་ཞིག་ཆགས་ཡོད། དེ་དཔྱད་གཞིར་བཞག་པའི་ཐོག་རྟགས་དང་གསལ་བ་འགོད་རྒྱུ་དེ་བོད་པ་རང་ལ་རིམ་བཞིན་ཆགས་པ་མི་འགྲོ་བསམ་གྱི་འདུག བོད་སྐད་ལ་ལམ་བྱང་ཏེ་བྱང་ཆུབ་པ་ཆགས་ཡོད། རྒྱ་ཡིག་ནང་གཞི་ནས་འབད་བརྩོན་བྱེད་ཀྱི་འདུག གཙོ་བོ་སློབ་ཕྲུག་ཚོས་དོ་སྣང་དང་དགེ་རྒན། དེ་བཞིན་འབྲེལ་ཡོད་ཚོས་དམིགས་ཡུལ་དེ་གཞིར་བཟུང་ཐོག་ཕྱིན་ཆད་ང་ཚོའི་མདུན་ལམ་ཡངས་ཞིང་རྒྱ་ཆེ་བ་ཧ་ལམ་འཛམ་གླིང་སྤྱིར་ང་ཚོས་སློབ་སྦྱོང་གི་སྒོ་གསར་པ་ཞིག་གཏོད་རྒྱུ་ཆགས་ཀྱི་ཡོད། ཧ་ཅང་ཡག་པོ་བྱུང་འདུག་ཐུགས་རྗེ་ཆེ་ཞུ་གི་ཡིན། ཞེས་སོགས་ཀྱི་དཔེ་ཁྲིད་མཇུག་སྐྱོང་གནང་རྗེས་འཇམ་དཔལ་དབྱངས་ཀྱི་རྗེས་གནང་སྩལ་གྲུབ་བསྟུན་ཚན་རིག་བསླབ་པ་མཐར་སོན་པའི་དགེ་འདུན་ཉེར་བརྒྱད་ལ་ཕྱག་འཁྱེར་སྩལ་གྲུབ་བསྟུན་བོད་ཀྱི་དཔེ་མཛོད་ཁང་དང་ཨེ་མོ་རི་གཙུག་ལག་ཟུང་འབྲེལ་གྱི་ཚན་རིག་ལས་འཆར་འབྲེལ་ཡོད་དགེ་བཤེས་ལྷག་རྡོར་ལགས་དང་དགེ་བཤེས་བློ་བཟང་བསྟན་འཛིན་ལགས་སོགས་ཀྱིས་ངོ་སྤྲོད་གསུང་བཤད་རྗེས་ཨེ་མོ་རི་མཐོ་སློབ་སྐུ་ཚབ་དང་ཚན་རིག་དགེ་རྒན་ཁག་ལ་མཇལ་ཁ་སྩལ་རྗེས་༸གོང་ས་མཆོག་གིས་དེང་འཛམ་གླིང་སྟེང་གི་ཚན་རིག་མཁས་དབང་ཚོས་ནང་ཆོས་ནས་འཆད་ཚུལ་ཁག་ལ་དོ་སྣང་ཆེན་པོ་བྱེད་བཞིན་ཡོད་སྐོར་བཀའ་སློབ་སྩལ་ཏེ་ཉིན་གསུམ་གྱི་ཆོས་འབྲེལ་མཇུག་སྒྲིལ་མཛད་ཡོད་པ་བཅས། །
