༢༠༡༢ ཟླ་ ༦ ཚེས་ ༢ རེས་གཟའ་སྤེན་པ།
༄༅། །འདི་གར་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲིས་ལགས་ཀྱིས་བཏང་གནས་ནང་འཁོད་དོན། ཨ་རིའི་སྐུ་ཚབ་དོན་གཅོད་ཁང་ནས་བོད་རིགས་དང༌། ཧི་མ་ལ་ཡའི་རི་རྒྱུད་ཀྱི་མི་རིགས་ལ་སྣེ་ལེན་ཞུ་བའི་ལོ་འདིའི་འདུ་འཛོམས་ཐེངས་དང་པོ་ཕྱི་ལོ་ ༢༠༡༢ ཟླ་ ༥ ཚེས་ ༣༠ དང༌ཕྱི་ཟླ་ ༦ ཚེས་ ༡ ཉིན་ཁག་སོ་སོར་སྐུ་ཚབ་དོན་གཅོད་ཁང་གི་ལས་ཁུངས་སུ་གོ་སྒྲིག་གནང་ཡོད།
གོང་ཞུས་ཚོགས་སྐྱིད་ཁག་ལ་སྣེ་ལེན་ཞུ་བའི་འདུ་འཛོམས་གོ་སྒྲིག་གནང་དགོས་པའི་དགོས་དམིགས་གཙོ་བོ་ནི། བོད་མིའི་སྤྱི་ཚོགས་ཙམ་མ་ཟད། བོད་དང་ཆོས་རིག་གཅིག་གྱུར་ཡིན་པའི་ཧི་མ་ལ་ཡའི་རི་རྒྱུད་མི་རིགས་ཀྱི་སྤྱི་ཚོགས་དང་སྐུ་ཚབ་དོན་གཅོད་ཁང་དབར་གྱི་འབྲེལ་ལམ་སྔར་ལས་ཤུགས་ཆེ་རུ་གཏོང་ཆེད་ཡིན་འདུག
དེ་ཡང་ཕྱི་ཟླ་ ༥ ཚེས་ ༣༠ ཉིན་ནིའུ་ཡོཀ་དང༌། ནིའུ་འཇར་སི་ཁུལ་དུ་ཡོད་པའི་བོད་པའི་ཚོགས་པ་དང༌། སྐྱིད་སྡུག་ཁག ༢༧ ཙམ་གྱི་འགོ་ཁྲིད་ཁྱོན་མི་གྲངས་ ༧༠ ཙམ་སྣེ་ལེན་འདུ་འཛོམས་ལ་ཕེབས་ཡོད་པ་དང༌། སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་ཚང་མར་འཚམས་འདྲི་དང་བཅས་གཙོ་བོ་སྤྱི་མཐུན་ཚོགས་པའི་སྤྱི་ཁང་གསར་ཉོའི་གནས་སྟངས་གསར་པ་ངོ་སྤྲོད་དང༌། སྤྱི་ཁང་ཆེད་ཕྱོགས་གང་ས་ནས་ཞལ་འདེབས་གནང་བའི་དངུལ་འབོར་རྣམས་རྩིས་གཙང་ཁམས་དྭངས་དང༌། དངུལ་གྱི་སྐོར་ལ་སུ་ཞིག་གིས་དྲི་བ་བཏང་ཡང་ལན་འདེབས་ཁ་གསལ་གནང་རྒྱུ་ད་ལྟ་ནས་གྲ་སྒྲིག་དགོས་པའི་དྲན་སྐུལ་ནན་པོ་གནང་ཡོད། བོད་རིགས་སྤྱི་མཐུན་ཚོགས་པའི་ཚོགས་གཙོ་ཚེ་རིང་བཟང་པོ་ལགས་ཀྱིས་ཚོགས་པའི་རྒྱུན་ལས་ཡོངས་ཀྱི་ཚབ་ཞུས་ཏེ་སྐུ་ཚབ་དོན་གཅོད་ཁང་ནས་སྤྱི་ཁང་གི་ཆེད་དུ་གང་ཅིའི་ཕྱག་རོགས་ཤུགས་ཆེ་གནང་བ་དང༌། ལྷག་པར་ཚོགས་སྐྱིད་ཁག་དང༌། མང་ཚོགས་ཚང་མས་ཞལ་འདེབས་གནང་རྒྱུས་མཚོན་ཕྱར་གྲུ་མཉམ་འདེགས་གནང་བར་ཐུགས་རྗེ་ཆེ་ཞུས་ཡོད་པ་རེད།
བོད་རིགས་སྤྱི་མཐུན་ཚོགས་པའི་ཚོགས་ཁང་ཉོ་སྒྲུབ་བྱ་རྒྱུའི་ཐད་སྔ་རྗེས་སུ་གོ་བསྡུར་ཡང་ཡང་བྱས་འབྲས་སུ། ད་ཆ་ཨ་སྒོར་ས་ཡ་བཞི་ལྷག་གི་ཁང་པ་ཞིག་ཉོ་རྒྱུར་ཐོག་མའི་གན་རྒྱ་བཞག་ཟིན་པ་དང༌། དེ་སྔ་ཚོགས་སྐྱིད་སོ་སོས་ཚོགས་ཁང་གཏན་འཁེལ་བའི་མཚམས་ཞལ་འདེབས་འབུལ་རྒྱུ་ཡིན་ཞེས་ཞལ་བཞེས་གནང་ཟིན་པ་ཨ་སྒོར་འབུམ་བཞི་ལྷག་ཙམ་ཡོད་ཅིང༌། གོང་ཚེས་ཉིན་གྱི་འདུ་འཛོམས་སྐབས་ཨ་སྒོར་འབུམ་གཅིག་ལྷག་ཙམ་བསྡུ་རུབ་ཐུབ་པ་བྱུང་ཡོད་པ་མ་ཟད། སྐྱིད་སྡུག་ཁག་གཅིག་གི་ཞལ་འདེབས་དངུལ་འབོར་རྣམས་བསྡུ་ལེན་གནང་བཞིན་ཡོད།
ཕྱི་ཟླ་ ༦ ཚེས་ ༡ ཉིན་འབྲུག་པ་དང༌། སོག་པོ། ཝ་ལུང་སོགས་ཧི་མ་ལ་ཡའི་རི་རྒྱུད་ཀྱི་མི་རིགས་ཀྱི་ཚོགས་པ་འདྲ་མིན་ ༨ ཙམ་གྱི་འཐུས་མི་ཕེབས་ཏེ་ཕན་ཚུན་ངོ་སྤྲོད་དང༌། མ་འོངས་པར་མཉམ་ལས་གནང་ཕྱོགས་སྐོར་བཀའ་བསྡུར་གནང༌།
སྐབས་དོན་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་འཚམས་འདྲིའི་གསུང་བཤད་གནང་སྐབས། ཧི་མ་ལ་ཡའི་རི་རྒྱུད་ཀྱི་མི་རིགས་དང་བོད་པའི་དབར་གྱི་འབྲེལ་ལམ་ཡག་ཏུ་གཏོང་རྒྱུར་ཚང་མས་ཤུགས་སྣོན་རྒྱག་རྒྱུ་དེ་ཧ་ཅང་གི་གནད་འགག་ཆེན་པོ་ཡིན་པ་དང༌། དེ་ནི་ྋགོང་ས་ྋསྐྱབས་མགོན་ཆེན་པོ་མཆོག་གི་དགོངས་གཞི་ཡང་ཡིན་པའི་སྐོར་གསུངས། ཚོགས་པ་སོ་སོའི་སྐུ་ཚབ་ནས་སོ་སོའི་ཚོགས་པ་ངོ་སྤྲོད་དང་འབྲེལ་དེ་ལྟ་བུའི་འདུ་འཛོམས་ཀྱིས་འབྲེལ་ལམ་རྒྱ་བསྐྱེད་འགྲོ་རྒྱུར་ཕན་ཐོགས་ཡོད་པ་དང༌། མ་འོངས་པར་ཆོས་དང་རིག་གཞུང་ཙམ་མ་ཟད། རྩེད་མོ་འགྲན་བསྡུར་གྱི་ལམ་ནས་ཕན་ཚུན་མཉམ་ལས་དང༌། ལས་འགུལ་སྤེལ་ཐེངས་མང་དུ་གཏོང་རྒྱུར་ཕྱོགས་ཚང་མས་ངོས་འཛིན་གཅིག་གྱུར་བྱུང་ཡོད། དེ་རིང་གོ་སྐབས་འདི་བརྒྱུད་ཝ་ལུང་སྐྱིད་སྡུག་ནས་ནིའུ་ཡོཀ་དང༌། ནིའུ་འཇར་སི་བོད་རིགས་སྤྱི་མཐུན་ཚོགས་པའི་སྤྱི་ཁང་གི་ཆེད་དུ་ཨ་སྒོར་ ༡༠༠༠༠།༠༠ ལྷག་ཙམ་ཞལ་འདེབས་ཕུལ་འདུག་པ་བཅས།།
