༢༠༡༢ ཟླ་ ༥ ཚེས་ ༣༠ རེས་གཟའ་ལྷག་པ།
༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༡༢ ཟླ་ ༥ ཚེས་ ༣༠ ཉིན་བཏང་གནས་ནང་འཁོད་དོན། ལྷོ་ཕྱོགས་བོད་མིའི་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ཀྱིས་ཕྱི་ལོ་ ༢༠༡༢ ཟླ་ ༣ ཚེས་ ༢ ནས་ ༡༨ བར་སྦེལ་ཀོབ་དང་ཧུན་སུར། ཀོ་ལེ་གྷལ་བཅས་ཀྱི་ཁྱབ་ཁོངས་གཞིས་ཆགས་ཁག་བཞིར་ཁྲིམས་ལུགས་ཀྱི་གོ་རྟོགས་སྤེལ་ཡོད་པ་དང༌། ད་ལམ་མོན་གྷོ་ས་གནས་སུ་ཆེད་ཕེབས་ཀྱིས་ཕྱི་ཟླ་ ༥ ཚེས་ ༩ ཉིན་མོན་གྷོ་ས་གནས་འཐུས་ཚོགས་སྐབས་ ༨ པའི་ཚོགས་གཙོ་དང་ཚོགས་གཞོན་གྱིས་གཙོས་འཐུས་མི་ཁྱོན་གྲངས་ ༣༡ ནས་ས་གནས་ཁྲིམས་ཞིབ་པའི་མདུན་དུ་ལས་འཁུར་དམ་བཅའ་ཕུལ་ཡོད།
ཕྱི་ཟླ་ ༥ ཚེས་ ༡༠ ཉིན་རྣམ་རྒྱལ་ཚེ་སྐྱིད་ལགས་ཀྱིས་མོན་གྷོ་མི་མང་ཚོགས་ཁང་དུ་ས་གནས་ཀྱི་ལས་སྣེ་དང་གྲོང་སྡེ་ཁག་གི་མི་མང་བཅས་ཁྱོན་མི་གྲངས་ ༡༠༠༠ བརྒལ་བར་ཁྲིམས་ལུགས་ཀྱི་གོ་རྟོགས་སྤེལ་ཡོད།
ཉིན་རྒྱབ་མོན་གྷོ་ས་གནས་སུ་གནས་སྡོད་ཁྲིམས་རྩོད་པ་གྲངས་ ༦ དང་ཐུག་འཕྲད་ཀྱིས་ཁྲིམས་ལུགས་སློབ་སྟོན་དང་འབྲེལ་བསྐྱར་སྦྱོང་ཆེད་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་གལ་ཆེ་རྣམས་སློབ་འཁྲིད་དང༌། བཙན་བྱོལ་བོད་མིའི་ཁྲིམས་ལུགས་དབང་འཛིན་གྱི་སྐོར་ལའང་བསམ་ཚུལ་བརྗེ་ལེན་དང་བགྲོ་གླེང་གནང༌ཡོད།
ཕྱི་ཚེས་ ༡༡ ཉིན་གྱི་སྔ་དྲོ་འབྲས་སྤུངས་སྒོ་མང་གྲྭ་ཚང་དུ་དགེ་འདུན་པ་ ༦༠ ཙམ་དང༌། ཉིན་རྒྱབ་དགའ་ལྡན་ཤར་བྱང་གཉིས་ཀྱི་དགེ་འདུན་པ་གྲངས་ ༥༠ ལྷག་ཙམ་ལ་ཁྲིམས་ལུགས་ཀྱི་གོ་རྟོགས་སྤེལ་ཡོད། ས་གནས་སུ་ཁྲིམས་ལུགས་གོ་རྟོགས་སྤེལ་སྐབས། གཞི་རྩའི་ཆ་རྐྱེན་དང༌། བྱེད་ཐབས་ཇི་ཡོད། ཁྲིམས་ཁོངས་ཁྱབ་ཚད། ཉམ་ཐག་ལ་མཐུན་རྐྱེན། ཞུ་རྩ་བཟོ་ཕྱོགས་བཅས་ཀྱི་སྐོར་ལ་ཡིག་ཆ་ཕྱོགས་བསྒྲིགས་གནང་བ་འགྲེམས་སྤེལ་ཞུས་པ་མ་ཟད། ཆེས་མཐོའི་ཁྲིམས་ཞིབ་ཁང་གི་བཀོད་ཁྱབ་དགོངས་དོན་ས་གནས་ཁྲིམས་ཞིབ་ཁང་དང་ཐག་རིང་ས་གནས་མོན་གྷོ་ལྟ་བུ་ནས་ཉམ་ཐག་དང་གཞན་ཡང་དཀའ་ངལ་ཅན་གྱིས་ཞུ་གཏུགས་བྱ་དགོས་ཚེ་ཁ་མཆུའི་བྱ་རིམ་རྣམས་ས་གནས་ས་ཐོག་ཏུ་ཁྲིམས་ཞིབ་བྱ་རྒྱུའི་ཐབས་ལམ་བསྐྲུན་ཡོད་པའི་སྐོར་འབྲེལ་ཡོད་ཚང་མར་འགྲེལ་བརྗོད་གནང་སྟེ། མོན་གྷོ་ས་གནས་ཀྱི་ཁྲིམས་ལུགས་གོ་རྟོགས་སྤེལ་བའི་ལས་གཞི་མཇུག་སྒྲིལ་གནང་ཡོད།
དེ་བཞིན་ཕྱི་ལོ་ ༢༠༡༢ ཟླ་ ༥ ཚེས་ ༡༨ ཉིན་ལྷོ་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་གཏུག་བཤེར་ཚོགས་ཁང་དུ་སྦེལ་ཀོབ་ས་གནས་སུ་ཡོད་པའི་ཁྲིམས་རྩོད་པ་གྲངས ༦ ལ་བསྐྱར་སྦྱོང་ཆེད་སྤྱི་མང་གཏུག་བཤེར་གྱི་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་གལ་ཆེ་རྣམས་སློབ་འཁྲིད་ཟུར་དུ་གནང་ཡོད་པ་བཅས། །
