༢༠༡༢ ཟླ་ ༥ ཚེས་ ༢༥ རེས་གཟའ་པ་སངས།
ཆེ་བསྟོད་མི་སེར་གྱི་ཕྱག་འཁྱེར་འབུལ་བཞེས་མཛད་སྐབས། སྐུ་པར་སྐུ་སྒེར་ཡིག་ཚང་ནས་གནང།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༢༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་བྷེལ་ཇམ་ཧུའི་གྲོང་ཁྱེར་དུ་རྟེན་གཞི་བྱས་པའི་ཡོན་ཏན་གླིང་ཆོས་ཚོགས་ཀྱི་གཙུག་ལག་ཁང་གསར་བཞེངས་ལེགས་གྲུབ་བྱུང་བའི་དབུ་འབྱེད་རབ་གནས་བཀའ་དྲིན་ཆེ་བ་བསྐྱངས་ཆེད། ཁུལ་དེར་ཆིབས་སྒྱུར་བསྐྱངས་སྐབས་ཆོས་ཚོགས་ཀྱི་སྐྱེད་མོས་ཚལ་གྱི་སྤངས་ལྗོངས་སུ་བྷེལ་ཇམ་དང་ཧོ་ལན་ཌི་ནས་བོད་རིགས་དང་སོག་རིག་དད་ལྡན་མི་མང་ཁག་གཅིག་ལ་བཀའ་སློབ་སྩལ་རྗེས། ཡོན་ཏན་གླིང་ཆོས་ཚོགས་ཀྱི་ཚོགས་ཁང་རྙིང་པར་༸ཞབས་སོར་བདེ་བར་འཁོད་བསྟུན། ཆོས་ཚོགས་ཀྱི་དྲུང་ཆེ་དང་གདན་ཞུ་གོ་སྒྲིག་ཚོགས་ཆུང་གི་འབྲེལ་མཐུད་པ་སྐུ་ཞབས་ཕེ་རེངྐ་གོ་ཌ་བོར་ Mr Franz Goethghbeur ལགས་ཀྱིས་༸གོང་ས་མཆོག་དང་ཧུའི་ Huy གྲོང་སྡེའི་སྤྱི་ཁྱབ་པ་སྐུ་ཞབས་ཨེ་ལེཀ་སི་ཧོ་ཤེཀ་སི་མཆོག (Alexis Housiaux ) བཅས་ཕེབས་བསུའི་འཚམས་འདྲི་ཞུས་པ་མ་ཟད། བྷེལ་ཇམ་ཆབ་སྲིད་མི་སྣ་ཁག་གཅིག་ཀྱང་ཆེད་བཅར་ཞུས་ཡོད་པ་རྣམས་ཀྱི་ངོ་སྤྲོད་དང་འབྲེལ་བའི་གསུང་བཤད་གནང་། དེ་ནས་གྲོང་སྡེའི་སྤྱི་ཁྱབ་པ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ཧུའི་གྲོང་ཁྱེར་གྱི་ཆེ་བསྟོད་མི་སེར་གྱི་ཕྱག་འཁྱེར་ Honorary Citizenship འབུལ་ལམ་ཞུས་ཡོད།
སྐབས་དེར་མགོན་པོ་གང་ཉིད་མཆོག་གིས་བཀའ་སྩལ་དོན། དེ་རིང་འདིར་ཁྱེད་ཚོ་ཐུག་རྒྱུ་བྱུང་བར་ངོས་རང་ཧ་ཅང་དགའ་པོ་བྱུང། ངོས་རང་ཆོས་ཚོགས་ཐོག་མར་གསར་བཞེངས་གྲུབ་མཚམས་ཚར་གཅིག་བསླེབས་ཡོད། དེ་ནས་བར་སྐབས་ཤིག་ཚར་གཅིག་དང་ད་ཆ་གཙུག་ལག་ཁང་གསར་བཞེངས་ལེགས་པར་གྲུབ་རྗེས་སླར་ཡང་ཡོང་ཐུབ་ཡོད། འབྱུང་འགྱུར་ཡང་ནས་ཡང་དུ་བསླེབ་རྒྱུའི་རེ་བ་ཡོད། ཅེས་བཀའ་སློབ་སྩལ། དེ་རྗེས་གསར་འགོད་པ་ཁག་གཅིག་ལ་འགྲོ་བ་མིའི་རིན་ཐང་དང་ཁོར་ཡུག་སྲུང་སྐྱོབ་སྐོར་བཀའ་སློབ་མཛད་པ་དང་སྦྲགས། གསར་འགོད་པ་ཚོས་ཕྱོགས་ལྷུང་དང་རྒྱབ་མདུན་ངོ་ལྐོག་མེད་པའི་ལམ་ནས་གནས་ཚུལ་སྤེལ་ཏེ་འཛམ་གླིང་གི་སྤྱི་ཚོགས་ཇེ་བཟང་དུ་གཏོང་ཐབས་བྱེད་དགོས་སྐོར་བཀའ་སྩལ་བ་མ་ཟད། གསར་འགོད་པ་ཁག་གཅིག་གིས་བོད་ནང་རང་ལུས་མེར་སྲེག་བཏང་བའི་དོན་རྐྱེན་སྐོར་གྱི་དྲི་བ་ཞུས་སྐབས་གསར་འགོད་པ་ཚོས་རང་ཉིད་དངོས་སུ་ས་གནས་ས་ཐོག་ཏུ་བསྐྱོད་དེ་དངོས་ཡོད་གནས་ཚུལ་རྟོག་ཞིབ་བྱེད་ཐུབ་ཚེ་དགེ་མཚན་ཆེ་བ་ཡོད་སྐོར་བཀའ་ལན་སྩལ། དེ་བཞིན་༸གོང་ས་མཆོག་བོད་དུ་ཕྱིར་ཕེབས་མཛད་རྒྱུའི་ཐུགས་རེ་ཡོད་མེད་དྲི་བ་ཞུས་པར། ཐུགས་རེ་ཧ་ཅང་ཆེན་པོ་ཡོད་སྐོར་བཀའ་སྩལ་བ་དང་སྦྲགས་དེང་སྐབས་རྒྱ་རིགས་ནང་པ་ས་ཡ་ ༣༠༠ ལྷག་ཡོད་པའི་ཁོངས་ནས་མང་པོ་ཞིག་གིས་དེ་ལྟར་རེ་བ་འཆང་བཞིན་ཡོད་སྐོར་བཀའ་ལན་སྩལ།
ཕྱེད་ཡོལ་དུ་༸གོང་ས་མཆོག་གིས་ཡོན་ཏན་གླིང་གཙུག་ལག་ཁང་གསར་པའི་དབུ་འབྱེད་རབ་གནས་མཛད་རྗེས་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་ཆོས་ཚོགས་ཀྱི་དབུ་བླ་མཆོག་གིས་བཀའ་དྲིན་གཏང་རག་གི་མཎྜལ་རྟེན་གསུམ་འདེགས་འབུལ་ཞུས་པ་དང་སྦྲགས། ༸གོང་ས་མཆོག་གིས་ལོ་མང་རིང་ནས་ཆོས་ཚོགས་སུ་ལམ་སྟོན་བཀའ་སློབ་བཀའ་དྲིན་ཆེ་བ་ཟམ་མ་ཆད་པར་སྩལ་བ་སོགས་ལ་བརྟེན་སེམས་ཤུགས་དང་སྙིང་སྟོབས་གཡོ་བ་མེད་པར་གནས་ཐུབ་ཡོད་སྐོར་སོགས་སྙན་སྒྲོན་ཞུས། དེ་རྗེས་༸གོང་ས་མཆོག་གིས་ཡིད་ཤེས་ལ་བརྟེན་པའི་བདེ་བ་གལ་ཆེན་པོ་ཡིན་པར་བརྟེན་དོན་གཉེར་བྱེད་དགོས་པ་ལས་ང་ཚོས་གཟུགས་སྒྲ་དྲི་རོ་སོགས་དབང་ཤེས་ལ་བརྟེན་པའི་ཚོར་བ་བདེ་བ་དེ་དག་ལ་སྙིང་པོ་ལྟ་ཞིང་དོན་གཉེར་གྱིས་རྩོལ་བ་བྱེད་བཞིན་ཡོད་སྐོར་བཀའ་སློབ་སྩལ་བ་མ་ཟད། དྲི་བ་ཁག་གཅིག་ལ་བཀའ་ལན་ཡང་སྩལ། ཕྱི་ཚེས་ ༢༥ སྔ་དྲོ་༸གོང་ས་མཆོག་ཧུའི་ནས་ཨོ་སི་ཊི་རི་ཡར་སླར་ཡང་ཆིབས་སྒྱུར་བསྐྱང་རྒྱུ་ཡིན་འདུག་པ་བཅས།།
