ཕྱི་ལོ་ ༢༠༠༨ ཟླ་ ༡༡ ཚེས་ ༤ རེས་གཟའ་མིག་དམར།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་རྒྱལ་ས་ཊོཀ་ཁྱོའི་ནང་རྒྱལ་སྤྱིའི་གསར་འགོད་པ་ཚོར་བཀའ་སློབ་སྩོལ་བཞིན་པ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱིཟླ་ ༡༡ ཚེས་ ༣ ཉིན་ཉི་ཧོང་གི་རྒྱལ་ས་ཊོཀ་ཁྱོའི་ནང་རྒྱལ་སྤྱིའི་གསར་འགོད་པར་ཚོར་མགོན་པོ་གང་ཉིད་ཀྱི་སྐུ་ཚབ་རྣམས་དེང་སྐབས་རྒྱ་ནག་གི་རྒྱལ་ས་པེ་ཅིང་དུ་འབྲེལ་མོལ་གནང་རྒྱུ་དབུ་འཛུགས་གནང་ཡོད་པས་གཅིག་བྱས་ན་བོད་ཀྱི་གནས་སྟངས་ལ་ཉིན་ཤས་ནས་འགྱུར་བ་ཡོང་བའི་ཐུགས་རེ་གནང་གི་ཡོད་ལུགས་སོགས་བཀའ་སྩལ་དོན། བོད་ནང་ལ་ཉིན་ཤས་ནས་འགྱུར་བ་ཡོང་སྲིད་པ་རེད། ངོས་ནས་དུས་རྒྱུན་དུ་རྒྱ་ནག་གི་རྒྱ་ཆེའི་མི་མང་ལ་ཡིད་ཆེས་ཞུ་གི་ཡོད། སྤྱིར་བཏང་བྱས་པ་ཡིན་ན་རྒྱ་ནག་གི་རྒྱ་ཆེའི་མི་མང་རྣམས་དངོས་ཡོད་ཀྱི་གནས་ཚུལ་ཐོག་འགྲོ་མཁན་དང་སྙིང་རུས་ཅན་ཞིག་ཡིན་པ་རེད། བོད་དེ་རྒྱ་ཁོངས་སུ་བསྡད་པ་ཡིན་ན་ཁེ་ཕན་ཡོང་རྒྱུ་ཡིན་པ་རེད། ཡིན་ནའང་བོད་ཀྱི་མ་འོངས་པའི་ཐག་གཅོད་དེ་བོད་མི་ཚོས་བྱ་རྒྱུ་ཡིན་པ་ལས་ངོས་ཀྱིས་བྱ་རྒྱུ་མིན། བོད་ནང་ཕྱི་དངོས་པོའི་ཐོག་ནས་ཡར་རྒྱས་གང་འཚམ་ཞིག་ཕྱིན་ཡོད་པ་དངོས་ཡོད་ཡིན་མོད་ཀྱང་བོད་མི་རྣམས་རྒྱ་ནག་གི་དབང་སྒྱུར་འོག་སྐྱིད་པོ་མེད་པ་གསལ་པོ་ཡིན། བཟང་སྤྱོད་ཀྱི་ཆ་ནས་བརྗོད་ནའང་ངོས་ཀྱིས་རི་བོང་རྡོ་བརྫུས་བྱས་ཏེ་བོད་ནང་གི་གནས་སྟངས་ཡག་པོ་ཡོད་པར་ངོས་འཛིན་བྱས་ཏེ་བསྡོད་ཐབས་མེད་པ་དང་། ང་ཚོས་དངོས་ཡོད་གནས་ཚུལ་ངོས་ལེན་བྱེད་དགོས་པ་ཞིག་རེད། རྒྱ་ནག་གཞུང་གི་བོད་མིའི་གནད་དོན་ལ་སྒྲིག་འཇགས་ཡོང་ཐབས་བྱེད་ཀྱི་མེད་པས་ངོས་ཀྱིས་རྒྱ་མིིའི་འགོ་ཁྲིད་ཚོར་ཡིད་ཆེས་ཆུང་དུ་འགྲོ་གི་འདུག བོད་མིའི་གནད་དོན་དེ་ནི་བོད་མིི་སྤྱི་ཡོངས་ཀྱི་གནད་དོན་ཞིག་ཡིན་པ་ལས་ཏཱ་ལའི་བླ་མའི་གནད་དོན་ཞིག་མིན། ཞེས་བཀའ་སྩལ་ཡོད།
ཡང་༸གོང་ས་མཆོག་གིས་བཀའ་ཕེབས་དོན། བོད་ནང་གི་བོད་མི་ཚོས་དཀའ་སྡུག་མྱོང་གི་ཡོད་པའི་དངོས་ཡོད་གནས་སྟངས་ལ་རྒྱ་ནག་གཞུང་གིས་ངོས་འཛིན་བྱེད་དགོས་པ་ཞིག་ཡིན་མོད་ཀྱང་རྒྱ་ནག་གཞུང་གིས་དེ་ལྟར་བྱས་མེད་པ་དང་། བོད་ནང་གནས་སྟངས་དེ་ནི་ཕལ་ཆེར་དམག་མིའི་དབང་སྒྱུར་འོག་ཡོད་པ་ལྟ་བུ་ཞིག་ཆགས་ཡོད། བོད་ས་གང་དུ་ཕྱིན་རུང་བོད་མི་རྣམས་འཇིགས་སྣང་དང་དངངས་སྐྲག་གི་འོག་ལ་སྡོད་དགོས་ཀྱི་ཡོད། ངོས་ཀྱིས་དོན་རྐྱེན་དེའི་ཐོག་བཏང་སྙོམས་བྱས་ཏེ་སྡོད་ཐབས་རྩ་བ་ནས་མེད། ཅེས་དང་༸གོང་ས་མཆོག་གིས་རྒྱ་གཞུང་ནས་རྒྱ་ནག་དང་བོད་ཀྱི་རྒྱལ་ས་ལྷ་ས་དབར་མེ་འཁོར་གྱི་འབྲེལ་མཐུད་ཅིག་བཙུགས་ཡོད་པ་དེ་ནི་དཔལ་འབྱོར་ཡར་རྒྱས་བཏང་བའི་རྟགས་མཚན་ཞིག་ཡིན་པས་ངོས་ནས་དགའ་བསུ་ཡོད། བཀའ་སྩལ་ཡོད་པ་རེད།
མགོན་པོ་གང་ཉིད་ཀྱིས་རྒྱ་ནག་ནི་གནའ་རབས་ཀྱི་རྒྱལ་ཁབ་ཅིག་དང་དེང་དུས་ཀྱི་གལ་ཆེའི་རྒྱལ་ཁབ་ཅིག་ཡིན་ལུགས་བཀའ་ཕེབས་ཡོད་པ་དང། ཡུལ་དེར་དེང་སང་མི་ཆ་དང་། དྲག་ཤུགས། དཔལ་འབྱོར་གྱི་སྟོབས་ཤུགས་བཅས་ཆ་ཚང་ཡོད་མོད་ཀྱང་ཡུལ་དེེར་ད་ལྟའི་ཆར་ཡ་རབས་སྤྱོད་ཚུལ་གྱི་ཤུགས་རྐྱེན་མེད་པས་དེ་ནི་ཕུགས་རྒྱང་རིང་པོའི་ཐོག་རྒྱ་ནག་ལ་གནོད་སྐྱོན་གཏོང་གཞི་ཞིག་ཆགས་ཀྱི་རེད། ཅེས་བཀའ་ཕེབས་ཡོད་པ་རེད།
༸གོང་ས་མཆོག་གིས་རྒྱ་ནག་ནས་གསར་འགྱུར་བརྒྱུད་ལམ་ཁག་ལ་དམ་བསྒྲགས་བཀག་སྡོམ་བྱེད་ཀྱི་ཡོད་སྟབས་བོད་ནང་བྱུང་བའི་གནས་ཚུལ་ཐོག་ལ་རྒྱ་ནག་གི་རྒྱ་ཆེའི་མི་མང་གིས་གང་ཡང་ཤེས་ཀྱི་མེད་ལུགས་བཀའ་སྩལ་གསལ། རྒྱ་ནག་མི་མང་ཚོར་དངོས་ཡོད་གནས་ཚུལ་ཤེས་རྟོགས་བྱ་རྒྱུའི་བརྒྱུད་ལམ་འཚོལ་ས་ཡོད་པ་མ་རེད། རྒྱ་ནག་གི་མི་མང་ཚོས་ཉེ་དུས་བོད་ནང་བྱུང་བའི་དངོས་ཡོད་གནས་ཚུལ་དེ་དག་ཞིབ་ཕྲ་ཤེས་རྟོགས་བྱུང་བ་ཡིན་ན་ངོས་ཀྱི་བསམ་པར་རྒྱ་མི་མང་པོ་ཞིག་སེམས་སྐྱོ་སྟེ་བློ་ཕམ་བྱེད་སྲིད་པ་ཞིག་རེད། ཅེས་དང་། རྒྱ་ནག་གི་ཞིང་ཆེན་ཟི་ཁྲོན་ནང་འདི་ལོའི་མགོ་སྟོད་དུ་ས་ཡོམ་གྱི་འཇིག་པ་ཆེན་པོ་ཞིག་བྱུང་བའི་སྐབས་སུ་རྒྱ་གཞུང་གིས་སྦ་གསང་གང་ཡང་མེད་པར་གནས་ཚུལ་ཁ་གསལ་བཤད་ཡོད་པ་དང་གསར་འགྱུར་བརྒྱུད་ལམ་ཁག་ལ་གསལ་བཤད་བྱེད་དུ་བཅུག་ཡོད་པ་དེས་ངོས་རང་ཧ་ཅང་དགའ་པོ་བྱུང་། ཡིན་ནའང་རྒྱ་གཞུང་ཕྱོགས་ནས་བོད་ཀྱི་དཀའ་རྙོག་གཙོས་ཡུལ་དེའི་ས་ཁུལ་གཞན་ཁག་གི་གནད་དོན་ཐད་ལ་ཁ་གསང་ངོ་གསང་བྱེད་ཀྱི་མེད་ལུགས་བཀའ་སྩལ་ཡོད་པ་རེད།།
ལྷག་པར་༸གོང་ས་མཆོག་གིས་བཀའ་སྩལ་དོན། མགོན་པོ་གང་ཉིད་བོད་ཀྱི་དབུ་ཁྲིད་ཅིག་ལ་ངོས་འཛིན་མ་གནང་བར་བོད་མིའི་མགྲིན་ཚབ་པ་ཞིག་ལ་ངོས་འཛིན་གནང་གི་ཡོད་པ་དང་། ཕྱི་རྒྱལ་དུ་ཡོད་པའི་བོད་མི་ཚོས་བོད་ནང་གི་བོད་མི་ཚོའི་སྐུ་ཚབ་བྱས་ཏེ་སྐད་ཆ་བཤད་རྒྱུ་དེ་ནི་སོ་སོའི་ཐོག་ཏུ་བབས་པའི་ལས་འགན་ཞིག་ཡིན། ཅེས་བཀའ་སྩལ་ཡོད་པ་རེད།
མཐའ་དོན་༸གོང་ས་མཆོག་གིས་དབུ་མའི་ཐབས་ལམ་གྱི་ཐོག་ནས་བོད་ལ་རང་སྲིད་རང་སྐྱོང་རག་ཐབས་མཛད་ཡོད་པ་དེར་ད་ལྟ་བར་གྲུབ་འབྲས་སོན་མེད་པ་དང་༸གོང་ས་མཆོག་གིས་དབུ་མའི་ཐབས་ལམ་ཐོག་ཕེབས་ཡོད་པ་དེས་བོད་ནང་བཟང་ཕྱོགས་ཀྱི་འགྱུར་བ་ཡོང་འགྱུར་ཕན་ཐོགས་དང་དགེ་མཚན་བྱུང་མེད་པས་ད་ཕྱིན་བོད་མི་ཚོས་ཐབས་བྱུས་ཇི་འདྲ་ཞིག་ལག་བསྟར་བྱ་རྒྱུ་ཡིན་མིན་ཐད་རིང་མིན་བཞུགས་སྒར་རྡ་སར་ཚོགས་རྒྱུའི་ལྷན་འཛོམས་ཀྱི་སར་བོད་མི་ཚོས་གྲོས་མོལ་ལྷུག་པོ་བྱེད་དགོས་པའི་བཀའ་སློབ་ལམ་སྟོན་ཡང་གནང་ཡོད་པ་རེད།།
