༢༠༡༢ ཟླ་ ༥ ཚེས་ ༢༣ རེས་གཟའ་ལྷག་པ།

པར་ལེན་སྐུ་སྒེར་ཡིག་ཚང།

༄༅། །༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༢ ཟླ་ ༥ ཚེས་ ༢༡ ཉིན་ཨོ་སི་ཊི་རི་ཡའི་གྲོང་ཁྱེར་སལ་སི་བྷག་ Salzburgཏུ་༸ཞབས་སོར་འཁོད་སྐབས་གྲོང་སྡེའི་སྤྱི་ཁྱབ་པ་ལྕམ་སྐུ་ག་བྷི་བྷག་སི་ཊ་ལར་Governor Ms. Gabi Burgstaller མཆོག་གིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་ཚོགས་ཁང་དུ་ཆིབས་སྒྱུར་བསྐྱངས་ཏེ་ཨལ་པན་པི་སི་ཀོར་སིང་Alpine Peace Crossing ཞེས་པ་གཞུང་འབྲེལ་མིན་པའི་ཚོགས་པས་གོ་སྒྲིག་འོག་འཛམ་གླིང་ཞི་བདེ་དང་ཀུན་ཁྱབ་འགན་འཁུར། ཞེས་པའི་བརྗོད་གཞིའི་ཐོག་བགྲོ་གླེང་ལྷན་ཚོགས་སུ་བཀའ་སློབ་སྩལ་དོན། ངོས་རང་མི་སུ་འདྲ་ཞིག་དང་ཐུག་སྐབས་ངོ་དབྱིབས་ཕྲན་བུ་མི་འདྲ་བ་ཡོད་པ་ཙམ་ལས་དོན་དངོས་འཛམ་གླིང་མི་འབོར་ཐེར་འབུམ་བདུན་ཙམ་ཡོད་པ་ཚང་མ་འགྲོ་བ་མི་གཅིག་མཚུངས་ཤིག་ཡིན་བསམ་པ་དྲན་གྱི་འདུག ལྷག་པར་དུ་དེང་སྐབས་འཛམ་གླིང་སྤྱི་ཚོགས་དེ་བཞིན་གཅིག་ལ་གཅིག་བརྟེན་དགོས་པའི་གནས་སྟངས་འོག་ང་ཚོ་དང་ཁོང་ཚོ་ཞེས་དབྱེ་འབྱེད་བྱེད་རྒྱུའི་དུས་ཚོད་ཡོལ་ཟིན། ཞེས་བཀའ་སྩལ་བ་དང་སྦྲགས་ཡུ་རོབ་སྤྱི་མཐུན་ཚོགས་པས་ཡུལ་གྲུ་སོ་སོའི་ངོ་བོ་གཅེས་འཛིན་ཐོག་སྤྱིའི་སྒྲིག་འཛུགས་ཤིག་འཛུགས་ཐུབ་པ་དེར་བསྔགས་བརྗོད་མཛད་པ་མ་ཟད། དེང་སྐབས་རྒྱལ་ཁབ་སོ་སོས་རང་གི་ཁེ་ཕན་ཙམ་ལས་གོ་ལ་སྤྱིའི་དཀའ་ངལ་སེལ་ཆེད་མཉམ་རུབ་བྱ་རྒྱུའི་བསམ་བློ་གཏོང་མ་ཐུབ་ཚེ་དཀའ་ངལ་འཕྲད་རྒྱུ་ཡིན་པ་ནི། དཔེར་ན་སྔ་ལོ་ཌན་མཀ་རྒྱལ་ས་ཀོ་ཕན་ཧེ་གྷན་Copenhagen དུ་གོ་ལའི་གནམ་གཤིས་ཀྱི་ལྷན་ཚོགས་ལམ་ལྷོང་གང་ཡང་བྱུང་མེད་པ་ལྟ་བུ་ཡོང་ངེས་ཡིན། འོན་ཀྱང་ང་ཚོས་སེམས་ཤུགས་མ་ཆག་པ་བྱེད་དགོས། ཞེས་སོགས་བཀའ་སྩལ་བ་མ་ཟད། དེ་སྔ་མགོན་པོ་གང་ཉིད་མཆོག་དབྱིན་ཇིའི་རྒྱལ་མོ་དགུང་ལོ་ ༩༦ སོན་པ་མཆོག་དང་མཇལ་འཕྲད་སྐབས་དུས་རབས་ ༢༠ ནང་འགྲོ་བ་མིའི་ཐོབ་ཐང་དང་རང་ཐག་རང་གཅོད་སོགས་ཀྱི་གནད་དོན་གསར་དུ་དར་ཁྱབ་བྱུང་བ་ལུང་འདྲེན་གནང་སྟེ་འཛམ་གླིང་སྤྱིའི་གནས་སྟངས་ཇེ་བཟང་དུ་འགྲོ་བཞིན་ཡོད་སྐོར་གསུངས་པ་ཐུགས་དྲན་གསོ་མཛད། དེར་བརྟེན་༸གོང་ས་མཆོག་གིས་བཟང་ཕྱོགས་ཀྱི་ཐུགས་རེ་འཆང་བཞིན་ཡོད་སྐོར་བཀའ་སློབ་སྩལ།