༢༠༡༢ ཟླ་ ༥ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༢༠ རེས་གཟའ་ཉི་མའི་སྔ་དྲོ་ཆུ་ཚོད་ ༡༠ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བཀའ་བློན་ཁྲི་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་རྣམ་གཉིས་ཀྱིས་༸རྒྱལ་བའི་སྐུ་ཕྱྭ་དང་འབྲེལ་བའི་བཀའ་ཤག་གི་གསལ་བསྒྲགས་སྤེལ་གྲུབ་བསྟུན། གསར་འགོད་པ་ཁག་གཅིག་གི་དྲི་བར་ལན་འདེབས་གནང་དོན། ད་རེས་ཀྱི་གནས་ཚུལ་འདིར་ཉེ་བའི་ཆར་བརྒྱུད་ལམ་མང་པོ་ཞིག་གིས་དོ་སྣང་ཆེན་པོ་ཞིག་བྱས་ཡོད་པའི་རྐྱེན་བོད་ཕྱི་ནང་གཉིས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་དད་པ་དང་། དགའ་ཞེན་ཡོད་པ་ཧ་ཅང་མང་པོ་ཞིག་གིས་བློ་འཚབ་དང་སྦྲགས་འདི་ག་བོད་མིའི་སྒྲིག་འཛུགས་ལ་སྐད་ཆ་དྲི་མཁན་མང་དག་ཅིག་ཡོང་བཞིན་འདུག་པར་སོང་ཚང་མས་མཁྱེན་གསལ་ལྟར་ཉེན་སྲུང་རིག་པའི་འགྲོ་ལམ་དང་ཉེན་སྲུང་གི་གནས་ཚུལ་མང་པོ་ཞིག་བརྒྱུད་ལམ་ཁག་ལ་མཁོ་སྤྲོད་བྱེད་རྒྱུའི་ལུགས་སྲོལ་མེད་ལ་སྤྲད་ནས་དགོས་པའང་མེད་པ་ཞིག་ཡིན།
ཡིན་ནའང་གནས་ཚུལ་རིགས་གཅིག་ནི་དུས་ཚོད་གང་ཙམ་སོང་ཚར་བ་ཞིག་རེད། འོན་ཀྱང་རྣམ་པ་ཚོར་གསར་པ་ལྟ་བུ་ཡིན་སྲིད། སྲུང་སྐྱོབ་ཀྱི་ལས་དོན་སྒྲུབ་མཁན་ཞིག་གི་ངོས་ནས་ཞུས་ན་གོང་གསལ་གནས་ཚུལ་དེ་འབྱོར་མ་ཐག་༸གོང་ས་མཆོག་གི་སྐུ་ཕྱྭ་དང་འབྲེལ་ཡོད་ཚང་མས་མཁྱེན་རྟོགས་ཐུབ་པ་བྱུང་ཡོད་ལ་དོགས་ཟོན་དང་སྔོན་འགོག་ག་རེ་བྱེད་རྒྱུ་ཡོད་པའི་སྐོར་ལའང་གོ་བསྡུར་དང་ལག་བསྟར་ཞུ་བཞིན་ཡོད། གནས་ཚུལ་དེ་དག་ལ་བརྟེན་ནས་རྒྱ་ཆེའི་མང་ཚོགས་ལ་དོགས་འདྲོག་དང་ཐུགས་འཚབ་ཡོང་རྒྱུ་གདོན་མི་ཟ་ཡང་འབྲེལ་ཡོད་ཚན་པ་ཁག་ནས་སྐུ་ཕྱྭའི་སྲུང་སྐྱོབ་ཐད་དོ་འཁུར་ཆེན་པོ་ཞུ་བཞིན་ཡོད། ཅེས་དང་ཡང་ཕྱོགས་གཞན་ཞིག་ནས་ད་ལྟའི་སྤྱི་ཚོགས་ཀྱི་གནས་སྟངས་ནས་བརྗོད་ན་དོལ་རྒྱལ་ཚོགས་པ་དེ་༸རྒྱལ་བའི་སྐུ་ཕྱྭའི་ཐོག་ཉེན་ཁ་ཆེ་ཤོས་ཤིག་ཡིན་པ་ང་ཚོས་བརྗོད་མི་དགོས་པར་རྒྱ་གར་གཞུང་ཕྱོགས་ནས་སྲུང་བྱའི་གཏན་འབེབས་ཡིག་ཆའི་ཐོག་ལའང་འཁོད་ཡོད།
དོལ་རྒྱལ་བསྟེན་མཁན་བཙན་བྱོལ་སྤྱི་ཚོགས་ནང་དང་བོད་ནང་དུའང་ཡོད། ཁོ་པ་ཚོས་གྱོན་གོས་གང་འདྲ་ཞིག་གྱོན་ནས་ཡོང་དང་རྣམ་པ་གང་འདྲ་སྟོན་ནས་ཡོང་གི་ཡོད་མེད་སུ་ཞིག་གིས་བརྗོད་མི་ཐུབ་པའི་གནས་ཚུལ་ཞིག་ཡིན། དེར་བརྟེན་༸གོང་ས་མཆོག་གི་སྐུ་ཕྱྭའི་ཐད་རྒྱ་ཆེའི་མང་ཚོགས་ངོས་ནས་ཀྱང་ཐུགས་སྣང་དང་སྦི་གསང་གནང་བཞིན་ཡོད། འོན་ཀྱང་གནད་འགག་གཅིག་ཡོད་པ་དེ་གང་ཡིན་བརྗོད་ན། ཕན་ཚུན་དོགས་གཞི་བྱུང་བའི་གནས་ཚུལ་མཁྱེན་རྟོགས་བྱུང་ཚེ་སྐབས་འཕྲལ་གནས་ཚུལ་མཁོ་སྤྲོད་གནང་རྒྱུ་གལ་ཆེན་པོ་ཡིན། སྲུང་སྐྱོབ་ཅེས་པ་དེ་གྲི་མེ་མདའ་གཅིག་པུས་གནས་ཚུལ་ཞིག་མིན་ཡང་དེའི་ནང་གནས་ཚུལ་མཁོ་སྒྲུབ་ཞུ་རྒྱུ་དང་གནས་ཚུལ་དུས་ཐོག་རག་རྒྱུ་དེ་སྲུང་བྱའི་ཐོག་རང་བཞིན་གྱི་གལ་གནད་ཆེན་པོ་ཡིན། དེར་བརྟེན་རྒྱ་ཆེའི་མང་ཚོགས་ཚང་མས་དོ་སྣང་གནང་གི་ཡོད་ལ་ད་དུང་མུ་མཐུད་དེ་སྦི་གསང་དང་དོགས་ཟོན་གནང་རོགས་ཞུ་རྒྱུ་ཡིན། ཞེས་གསུངས་ཡོད་ལ་ཡང་ཆོས་རིག་བཀའ་བློན་མཆོག་གིས། གནས་ཚུལ་འདིར་རྒྱ་ཆེའི་མང་ཚོགས་རྣམས་ཞེད་སྣང་དང་དངངས་སྐྲག་བྱེད་དགོས་དོན་མེད། འོན་ཀྱང་ཚང་མས་གང་གཟབ་གཟབ་དང་དོ་སྣང་གནང་རྒྱུ་དེ་ཚང་མར་འགན་ཡོད། ཅེས་གསུངས་ཡོད།
