༢༠༡༢ ཟླ་ ༥ ཚེས་ ༢༡ རེས་གཟའ་ཟླ་བ།
༄༅། །འདི་ཟླའི་ཚེས ༡༨ དང ༡༩ ཉིན་གཉིས་རིང་། ཕ་རན་སིར་གནས་སྡོད་བྱས་པའི་སྤྱི་དམངས་ནུས་སྟོབས་ཀྱི་འགན་འཁུར་བ་ཝང་ལུང་མེང་དང་སུས་སིར་གནས་སྡོད་དབུས་བོད་མིའི་སྒྲིག་འཛུགས་ཀྱི་རྒྱ་རིགས་འབྲེལ་མཐུད་པ་བློ་བཟང་ཉི་མ་ལགས་བཅས་ནས་གོ་སྒྲིག་བྱས་ཏེ། ཕ་རན་སིའི་རྒྱལ་ས་ཕེ་རི་སིར ༼ བོད་རྒྱའི་རིག་གནས་སྤེལ་རེས། ༽ བཞུགས་མོལ་ཚོགས་འདུ་བསྐོངས་ཚོགས་གནང་ཡོད།
ད་ཐེངས་ཀྱི་རིག་གནས་ཚོགས་འདུར་ཕ་རན་སིའི་སློབ་གྲྭ་ཆེ་ཁག་ཏུ་ཡོད་པའི་རྒྱ་རིགས་དགེ་རྒན་ཆེན་མོ་དང་། སློབ་སྦྱོང་བྱེད་བཞིན་པའི་རྒྱ་རིགས་སློབ་མ། དེ་བཞིན་རྒྱ་རིགས་ཚོང་ལས་པ། སྒྱུ་རྩལ་པ་སོགས་ལས་རིགས་སོ་སོའི་ཕུལ་བྱུང་མི་སྣ་ ༤༠ སྐོར་ཕེབས་ཡོད།
ཚོགས་ཞུགས་པ་ཚོས་གུ་ཡངས་དང་རིག་པ་དྭངས་གསལ་ཐོག་སྐབས་བབ་ཀྱི་བརྗོད་གཞིར་ཚ་ཚ་འུར་འུར་ངང་དབྱེ་ཞིབ་དང་བགྲོ་གླེང་ལྷུག་པོར་གནང་ལ། བརྗོད་གཞི་གཙོ་བོ་བོད་བརྒྱུད་ནང་བསྟན་རིག་གནས་དང་། ༸གོང་ས་མཆོག་གིས་བཏོན་པའི་དབུ་མའི་ལམ་གྱི་རླབས་ཆེན་དགོངས་དོན། འཚེ་མེད་ཞི་བདེའི་སྙིང་སྟོབས། དེ་བཞིན་བོད་མིའི་རང་ལུས་མེར་བསྲེག་སྐོར་བཅས་ཡིན་པ་རེད།
ཚོགས་ཞུགས་མི་སྣ་ཚང་མས་འདི་ལྟ་བུའི་རིག་གནས་སྤེལ་རེས་ལས་འགུལ་ལ་མགྲིན་གཅིག་གིས་བསྔགས་བརྗོད་བྱས་པ་མ་ཟད། སླད་མར་འདི་འདྲ་བའི་རིག་གནས་སྤེལ་རེས་ཀྱི་བགྲོ་གླེང་གང་མང་འཚོག་ཐུབ་པ་ཡིན་ན། བོད་རྒྱ་མི་རིགས་གཉིས་དབར་གྱི་འགལ་ཟླ་དང་འཁོན་སེམས་ཞི་བར་ཕན་ཐོགས་ཡོང་རྒྱུ་དང་། མི་རིགས་གཉིས་ཀྱི་མཐུན་ལམ་ལ་ཡང་ཕན་ནུས་ཐོན་ངེས་ཡིན་པ་བརྗོད་སོང་།
ཚོགས་འདུ་འདིར་ད་དུང་ཧུ་རང་སིའི་བོད་རྒྱའི་མཐུན་ཚོགས་ཚོགས་གཙོ་སྐུ་ཞབས་ཀུ་རུ་མཆོག་མཉམ་ཞུགས་བྱས་ཡོད་པ་བཅས།
གསར་འགྱུར་མཁོ་གཏོང་བ། སུས་སིར་གནས་སྡོད་དབུས་བོད་མིའི་སྒྲིག་འཛུགས་ཀྱི་རྒྱ་རིགས་འབྲེལ་མཐུད་པ་བློ་བཟང་ཉི་མ།
