༢༠༡༢ ཟླ་ ༥ ཚེས་ ༡༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༡༠ ཉིན་བྲག་མགོའི་ཛ་དྲག་ཚོགས་ཆུང་གི་སྐུ་ཞབས་དཔལ་ལྡན་ལགས་ཀྱིས་འདི་གར་གནས་སོན་བྱུང་བའི་གནས་ཚུལ་ནང་འཁོད་དོན། ཕྱི་ལོ ༢༠༡༢ ཟླ ༣ ཚེས ༢༩ ཉིན་ཁམས་བྲག་མགོར་རང་ལོ་ ༢༥ ཡིན་པའི་མགོན་པོ་རིག་འཛིན་ལགས་ཀྱིས་ཉེན་རྟོག་པས་འཛིན་བཟུང་བྱེད་པར་མ་བཟོད་པར་རང་གིས་རང་ལ་གྲི་བཙུགས་ཏེ་འདས་གྲོངས་སུ་གྱུར་འདུག
དེ་ཡང་མགོན་པོ་རིག་འཛིན་ལགས་ནི་ཕྱི་ལོ ༢༠༡༢ ཟླ ༡ ཚེས ༢༣ ཉིན་སྟེ་རྒྱ་ནག་གི་དཔྱིད་གསར་གྱི་ཉིན་དང་པོར་བྲག་མགོ་རྫོང་ཐོག་ཏུ་བྱུང་བའི་བོད་མིའི་ཞི་རྒོལ་དུ་ཞུགས་ཡོད་པ་དང། སྐབས་དེར་ཉེན་རྟོག་པས་འདྲ་པར་བརྒྱབ་ཡོད་པའི་ནང་དུ་ཐེབས་ཡོད་པར་བརྟེན། ཉེན་རྟོག་པས་ཁོང་འཛིན་བཟུང་བྱ་ཕྱིར་བྲག་མགོ་རྫོང་སྲིད་གཞུང་དུ་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་སར་ཡོང་དགོས་པའི་ཉེན་བརྡ་ཐེངས་མང་བཏང་ཡོད། འོན་ཀྱང་ཁོང་གིས་ཁྱིམ་མིར་རྒྱ་དམར་གཞུང་གི་ལག་ཏུ་ཐེབས་འཇུག་པ་ལས་རང་ཉིད་འཆི་ན་དགའ་བའི་སྐད་ཆ་བཤད་ཡོད། ཕྱི་ལོ ༢༠༡༢ ཟླ ༣ ཚེས ༢༩ ཉིན་བྲག་མགོ་རྫོང་གི་ཉེན་རྟོག་པས་ཁོང་འཛིན་བཟུང་བྱེད་པར་ཡོང་སྐབས། ཁོང་གིས་རྒྱ་དམར་གཞུང་གི་གདུག་རྩུབ་ཀྱི་དྲག་སྤྱོད་ལ་མ་བཟོད་པར་རང་གིས་རང་ལ་གྲི་བཙུགས་ཏེ་འདས་གྲོངས་སུ་གྱུར་འདུག ད་ལྟ་རང་ལོ་ ༢༥ ལ་སོན་པའི་མགོན་པོ་རིག་འཛིན་ལགས་ནི། མདོ་ཁམས་ཏྲེ་ཧོར་བྲག་མགོ་རྫོང་གི་གཞི་མདའ་གྲོང་སྡེའི་ཉེ་འདབས་སུ་ཆགས་པའི་འཕྲང་བར་གྲོང་དུ་ཕ་རིག་པོ་དང་མ་ཡེ་ཤེས་སྒྲོལ་མ་གཉིས་སུ་སྐྱེས་ཤིང། གྲོང་པའི་ནང་གི་མི་རྒན་གཞོན་ཚང་མས་ནམ་རྒྱུན་ཁོང་མི་ཡ་རབས་དང་ཀུན་ལ་འཆམ་མཐུན་ལ་རྒྱ་ཅན་ཞིག་ཏུ་བརྩི་སྲོལ་ཡོད། གཞན་ཡང། ཕྱི་ལོ ༢༠༡༢ ཟླ ༡ ཚེས ༢༣ ཉིན་བྲག་མགོའི་ཞི་རྒོལ་དུ་ཞུགས་ཏེ་དྲག་ཆས་ཉེན་རྟོག་དམག་མིའི་མེ་མདས་རྨས་པའི་བོད་མི་ཁག་གཅིག་རྒྱ་དམར་གཞུང་གི་འཛིན་བཟུང་གི་གདུག་རྩུབ་ལ་འཇིགས་ཏེ་ཡར་མར་གྱི་སྨན་ཁང་དུ་འགྲོ་བསྐྱོད་བྱེད་མ་ཕོད་པར་སྨན་བཅོས་ཀྱི་མཐུན་རྐྱེན་གང་ཡང་མེད་པར་ལུས་ཡོད་པ་དང། འགའ་ཞིག་གི་རྨ་ཁ་རུལ་ཏེ་གཟུགས་གཞིའི་གནས་སྟངས་ཧ་ཅང་ཛ་དྲག་ཏུ་གྱུར་ཡོད་པ་རེད། ད་དུང་ཞི་རྒོལ་དེ་བྱུང་བའི་རྗེས་ད་བར་མི་སུམ་ཅུ་ལྷག་ཙམ་འཛིན་བཟུང་བྱས་ཟིན་ཡོད་པ་དང། དེ་དག་གི་ཁྲོད་དུ་མི་འགའ་ཞིག་ལ་ལོ་གཅིག་དང་ཟླ་བ་བརྒྱད་ནས་ཚེ་བཙོན་བར་གྱི་ཁྲིམས་ཐག་བཅད་ཡོད། ཡང་འགའ་ཞིག་བྲག་མགོ་རྫོང་གི་བཙོན་ཁང་དུ་ཟླ་ཤས་རིང་བཙོན་འཇུག་བྱས་རྗེས་གློད་བཀྲོལ་བཏང་ཡོད་པ་དང། ཁོང་རྣམས་གློད་བཀྲོལ་གཏོང་སྐབས་མི་མང་གིས་ལམ་ཁའི་གཡས་གཡོན་དུ་རུ་བསྟར་བསྒྲིགས་ཏེ་བསུ་མ་བྱས་ཡོད།
ཕྱོགས་གཞན་ཞིག་ནས་ལོ་ཤས་སྔོན་དུ་བྲག་མགོ་རྫོང་ཁོངས་ཀྱི་དགོན་སྡེ་ཁག་ཚང་མ་མཉམ་འབྲེལ་གྱིས་དགེ་བཅུའི་ཁྲིམས་ཟེར་བའི་ལམ་སྲོལ་བཟང་པོ་བཏོད་དེ་མི་མང་ལ་མི་སུ་ཡིན་རུང་དུད་འགྲོའི་ཚེ་སྲོག་ལ་དོན་མེད་གནོད་འཚེ་མི་གཏོང་བའི་འབོད་སྐུལ་ལན་མང་ཞུས་པ་ལྟར། རོང་འབྲོག་གཉིས་ཀས་སྒོ་ཕྱུགས་སེམས་ཅན་རྣམས་གསོན་བཤའ་མི་བྱེད་པའི་དམ་བཅའ་ཕུལ་ཏེ་ལོ་ཤས་འགྲོ་བཞིན་ཡོད་ན་ཡང། ད་ལོར་ཞི་རྒོལ་བྱུང་རྗེས་རྒྱ་དམར་གཞུང་ནས་སྐྱ་སེར་བར་གྱི་མཐུན་ལམ་རྡོག་རྩ་ཆིག་སྒྲིལ་གཏོར་བཤིག་བྱ་ཕྱིར་དཔལ་འབྱོར་གྱིས་བསླུ་བྲིད་བྱས་ཏེ་དགོན་སྡེ་ཁག་གི་གྲྭ་པ་རྣམས་ལ་ཟླ་རེར་རོགས་དངུལ་སྤྲོད་བཞིན་ཡོད། དེ་བཞིན་གྲོང་པ་འགའ་ཞིག་ལ་ཕག་པ་སྤྲད་དེ་གསོ་བཅུག་གི་ཡོད། ཕག་པ་དེ་རྣམས་ལོ་གསར་སྐབས་ངེས་པར་དུ་བཤའ་དགོས་པའི་བཙན་བཀའ་བཏང་བར་མ་ཟད། གལ་ཏེ་མ་བཤའ་ཚེ་ཁྲིམས་ཆད་ནན་པོ་གཅོད་རྒྱུ་ཡིན་ལུགས་བཤད་ཡོད།
ཟླ་འདིའི་ཚེས ༧ ཉིན་གྱི་ཞོགས་པར་ཀྲུང་དབྱང་བརྙན་འཕྲིན(CCTV)ཟེར་བའི་དབྱིན་སྐད་བརྒྱུད་ལམ་ནང་དུ་བོད་མིས་རང་ལུས་མེར་སྲེག་བཏང་བའི་གནས་ཚུལ་སྟོན་སྐབས། བྲག་མགོའི་ཞི་རྒོལ་ཁྲོད་དུ་ཞུགས་པའིི་བོད་མི་ཁག་གཅིག་ལའང་ཁྲིམས་ཐག་བཅད་པའི་གནས་ཚུལ་བཤད་ཡོད་ཀྱང། མི་སུ་ཡིན་དང། ལོ་གྲངས་ཇེ་ཙམ་བཙོན་འཇུག་བྱས་ཡོད་མེད་ཀྱི་གནས་ཚུལ་ཤེས་རྟོགས་བྱུང་མེད་པ་བཅས། །