༢༠༡༢ ཟླ་ ༥ ཚེས་ ༨ རེས་གཟའ་མིག་དམར།
༄༅།    །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༥ ཚེས་ ༧ ཉིན་སྐོང་ཚོགས་གནང་བའི་ཐེ་ཝན་གྲོས་ཚོགས་ཀྱི་སྐབས་བརྒྱད་པའི་ཚོགས་ཐེངས་དང་པོ་དང་ནང་སྲིད་ལྷན་ཚོགས་ཐེངས་ ༢༣ པའི་ནང་། ཕྱི་ལོ་ ༢༠༠༨ ལོ་ནས་རྒྱ་གཞུང་གིས་འགྲོ་བ་མིའི་ཐོབ་ཐང་བརྡལ་བཤིག་བཏང་བའི་ཐད་ཐེ་ཝན་གཞུང་གི་ལངས་ཕྱོགས་དང་། རྒྱ་ནག་དང་ཐེ་ཝན་དབར་གྲོས་མོལ་བྱེད་པའི་སྐབས་འགྲོ་བ་མིའི་ཐོབ་ཐང་སྐོར་ཆ་རྐྱེན་ཁོངས་ཚུད་ཐབས་ཞེས་པའི་བརྗོད་གཞིའི་ཐོག་དམངས་གཙོ་ཡར་ཐོན་ཚོགས་པའི་འཐུས་མི་ལྕམ་སྐུ་ཐན་ཆིའུ་ཇིན་ལགས་ཀྱིས། གྲོས་ཚོགས་ནང་བོད་མིས་རང་ལུས་མེར་སྲེག་བཏང་བའི་པར་རིགས་ཁག་བརྙན་འཕྲིན་བརྒྱུད་སྟོན་གནང་སྟེ་བོད་ནང་གི་ཛ་དྲག་གནས་སྟངས་སྐོར་འགྲེལ་བཤད་དང་སྦྲགས་འབྲེལ་ཡོད་དཔོན་རིགས་ཁག་ལ་ད་བར་བོད་མིར་གདུང་སེམས་མཉམ་སྐྱེའི་ལས་དོན་གང་དང་གང་སྤེལ་ཡོད་སྐོར་གྱི་དྲི་བ་བཏང་ཡོད། དེ་བཞིན་དམངས་གཙོ་ཡར་ཐོན་ཚོགས་པའི་འཐུས་མི་ལྕམ་སྐུ་ཤའོ་མེ་ཆིང་ལགས་ཀྱིས་ཀྱང་། རྒྱ་ནག་མི་སེར་རྒྱལ་ཁབ་(ཐེ་ཝན་)ཀྱི་རྩ་ཁྲིམས་ནང་བོད་དང་སོག་པོ་གཉིས་ནི་རྒྱ་ནག་གི་མངའ་ཁོངས་ཡིན་པ་བཀོད་ཡོད་རུང་། སོག་པོ་ནི་རང་བཙན་རྒྱལ་ཁབ་ཅིག་ཡིན། བོད་མིའི་སྒྲིག་འཛུགས་ནས་མང་གཙོ་བརྒྱུད་བཀའ་བློན་ཁྲི་པ་འོས་འདེམས་གནང་བ་དང་། དེའི་ཁྲི་འདོན་མཛད་སྒོའི་ཐོག་དམངས་གཙོ་ཡར་ཐོན་ཚོགས་པའི་གྲོས་ཚོགས་འཐུས་མི་ཡང་ཆེད་བཅར་ཞུས་ཡོད། བོད་སོག་ལས་ཁུངས་དེ་བཞིན་ལོ་རྒྱུས་ཀྱི་ལྷག་རོ་ཡིན་པ་སོགས་སྐྱོན་བརྗོད་ཤུགས་ཆེ་གནང་། གཞན་ཡང་དམངས་གཙོ་ཡར་ཐོན་ཚོགས་པའི་གྲོས་ཚོགས་འཐུས་མི་ཏོན་ཁང་དབྱི་དང་། གྲན་ཇི་མའེ། ཡའོ་ཝིན་ཀྲེ་སོགས་ནས་བོད་ཀྱི་རང་དབང་ཆེད་བོད་མིས་རང་ལུས་མེར་སྲེག་དང་། བོད་མིའི་འགྲོ་བ་མིའི་ཐོབ་ཐང་། ༧གོང་ས་མཆོག་ཐེ་ཝན་ནང་གདན་ཞུ་སྐོར་སོགས་ལ་ཐེ་ཝན་གཞུང་ནས་ག་རེ་བྱས་ཡོད་སོགས་འདྲི་བ་མང་པོ་གཏོང་སྐབས། འབྲེལ་ཡོད་བློན་ཆེན་ཁག་གིས་བོད་མིས་རང་ལུས་མེར་སྲེག་བཏང་བར་གདུང་སེམས་མཉམ་སྐྱེ་ཡོད་སྐོར་སོགས་ལན་འདེབས་གནང་ཡོད།
ཐེངས་འདིའི་གྲོས་ཚོགས་ནང་ཐེ་ཝན་གཞུང་གི་རྒྱ་ནག་སྐམ་ས་ལས་དོན་ལྷན་ཚོགས་སོགས་བློན་ཆེན་ལས་ཁུངས་གསུམ་གྱི་བློན་ཆེན་དང་། བདེ་སྲུང་ལས་ཁུངས་སོགས་ལས་ཁུངས་ཁག་དྲུག་གི་མཐོ་རིམ་དཔོན་རིགས་མཉམ་ཞུགས་གནང་ཡོད། གྲོས་ཚོགས་ཀྱི་ལས་རིམ་ཆ་ཚང་གྲོས་ཚོགས་ལས་ཁུངས་ཀྱི་གཞུང་འབྲེལ་དྲ་རྒྱའི་ཐོག་ཐད་གཏོང་བྱས་ཡོད་པ་རེད། ཐེངས་འདིའི་གྲོས་ཚོགས་ནང་ཚོགས་པ་འདྲ་མིན་གྱི་གྲོས་ཚོགས་འཐུས་མི་དང་། གཞུང་གི་མཐོ་རིམ་དཔོན་རིགས་ཁག་ནས་བོད་ཀྱི་ཛ་དྲག་གནས་སྟངས་ཤེས་རྟོགས་རྒྱ་ཆེ་བྱུང་ཡོད་པར་བརྟེན། ཐེ་ཝན་སྐུ་ཚབ་དོན་ཁང་ནས་གྲོས་ཚོགས་ནང་བོད་དོན་གླེང་སློང་བྱེད་མཁན་འཐུས་མི་རྣམས་ལ་ཡིག་ཐོག་ནས་ཐུགས་རྗེ་ཆེ་ཞུའི་ཕྱག་བྲིས་ཤིག་ཀྱང་ཕུལ་ཡོད་པ་བཅས།།