༢༠༡༢ ཟླ་ ༥ ཚེས་ ༧ རེས་གཟའ་ཟླ་བ།
༄༅།  །འདི་གའི་ཆེད་གཉེར་གསར་འགོད་པ་ངག་དབང་ཐོགས་མེད་ལགས་ཀྱིས་སིམ་ལ་ནས་བཏང་གནས། ༸གོང་ས་༸སྐྱབས་མགོན་ཆེན་པོ་མཆོག་གིས་སིམ་ལ་གཏན་སློབ་དབུ་བརྙེས་ནས་ལོ་ངོ་ལྔ་བཅུ་འཁོར་བའི་དུས་སྟོན་ལ་གསུང་འཕྲིན་སྩལ་བའི་ནང་འཁོད་དོན།  ངོས་ཀྱིས་སིམ་ལ་གཏན་སློབ་དགེ་ལས་སློབ་ཕྲུག་ཚོས་ལོ་ལྔ་བཅུ་འཁོར་བའི་རྟེན་འབྲེལ་མཛད་སྒོ་སྲུང་བརྩི་ཞུ་བཞིན་པའི་སྐབས་འདིར་འཚམས་འདྲི་ཞུ་རྒྱུ་ཡིན།  འདས་པའི་ལོ་ངོ་ལྔ་བཅུ་དེའི་རིང་སིམ་ལ་གཏན་སློབ་ཀྱིས་བཙན་བྱོལ་བོད་བའི་སྤྱི་ཚོགས་ཁྲོད་ཧ་ཅང་ཞབས་འདེགས་བསྒྲུབ་ཡོད། དེར་བརྟེན་ངོས་ཀྱིས་གོ་སྐབས་འདི་བཟུང་ནས་རྒྱ་གར་གཞུང་གིས་མུ་མཐུད་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་མ་ཟད།  སློབ་གྲྭའི་དགེ་ལས་ཟུར་པ་ཚོ་དང་ད་ཡོད་རྣམས་ཀྱིས་འགན་ཁུར་ཆེན་པོའི་ཐོག་ལྷག་བསམ་རྣམ་དག་གིས་ཞབས་ཞུ་བསྒྲུབས་དང་སྒྲུབ་མུས་ཡིན་པ་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན།  ང་ཚོ་བཙན་བྱོལ་དུ་འབྱོར་བའི་ཉིན་མོ་ནས་བཟུང་ངོས་ཀྱིས་ཤེས་ཡོན་དེ་ཧ་ཅང་གལ་ཆེན་པོ་བརྩིས་ཏེ་ཤེས་ཡོན་ཡར་རྒྱས་གཏོང་རྒྱུར་འབད་བརྩོན་གང་ཡོད་བྱས་ཡོད།  འདས་པའི་དུས་སྐབས་སུ་བོད་མི་ཚོས་དེང་དུས་ཤེས་ཡོན་ཚན་རིག་སོགས་ལ་དོ་སྣང་གང་ཡང་བྱས་མེད། འོན་ཀྱང་བཙན་བྱོལ་དུ་སླེབས་རྗེས་ང་ཚོས་བོད་ཕྲུག་ཚོར་དེང་དུས་ཀྱི་ཤེས་ཡོན་སྤྲོད་རྒྱུར་འབད་བརྩོན་གང་ཐུབ་བྱས་ཡོད། དེང་སྐབས་ང་ཚོས་བོད་ཕྲུག་ཚང་མར་གཞི་རྩའི་སློབ་སྦྱོང་གི་མཐུན་རྐྱེན་སྦྱར་ཐུབ་ཀྱི་ཡོད་ནའང། ཤེས་ཡོན་མཚན་ཉིད་ཚང་བ་ཞིག་དགོས་ན་འཛིན་གྲྭའི་ནང་ཤེས་ཡོན་དང་ལག་ཤེས་བསླབ་པ་ཙམ་མིན་པར། བྱམས་བརྩེའི་བསམ་བློ་གོང་འཕེལ་བཏང་སྟེ་མི་སེམས་པ་བཟང་པོ་ཞིག་ཡོང་ཐབས་བྱེད་དགོས།  ཤེས་ཡོན་ལྡན་པའི་མི་བཟང་པོ་ཞིག་བྱུང་ན་རང་ཉིད་གང་དུ་འཚོ་གནས་བྱེད་སའི་སྤྱི་ཚོགས་དེར་ཞབས་འདེགས་བསྒྲུབ་ཐུབ་རྒྱུ་ཙམ་མ་ཟད། མ་འོངས་པར་འགྲོ་བ་མི་རིགས་སྤྱིའི་བདེ་དོན་ལའང་ཕན་ངེས་རེད། ལོ་ལྔ་བཅུ་འཁོར་བའི་དུས་དྲན་གྱི་མཛད་སྒོ་དེར་ངོས་ཀྱི་འཚམས་འདྲི་དང་སྨོན་ལམ་ཡོད།  ངོས་ཀྱིས་འབྱུང་འགྱུར་སློབ་ཕྲུག་མི་རབས་གསར་པ་མང་པོས་སློབ་གྲྭའི་མཐུན་རྐྱེན་གྱི་གོ་སྐབས་གང་ཡོད་པ་རྣམས་བླང་ཐུབ་པའི་རེ་བ་ཡོད། ཅེས་འཁོད་འདུག་པ་བཅས། །