༢༠༡༢ ཟླ་ ༤ ཚེས་ ༣༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༢༧ ཉིན་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དྲུག་པ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་ལས་ཁང་དང་། ཁེ་ན་ཌ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ། བོད་མི་མང་སྤྱི་འཐུས་ལྷན་ཚོགས་བཅས་ཐུན་མོང་ནས་གོ་སྒྲིག་ཐོག་ཕྱེད་ཡོལ་ཆུ་ཚོད་ ༡།༣༠ ཙམ་ལ་ཁེ་ན་ཌའི་གཞུང་གི་ཚོགས་ཁང་ཆེན་མོའི་ནང་འཛམ་གླིང་ཡུལ་གྲུ་ཁག་ ༣༠ ནས་གྲོས་ཚོགས་འཐུས་མི་ཁག་ ༥༠ ཙམ་དང་ཕྱག་རོགས། དེ་བཞིན་བཀའ་བློན་ཁྲི་པ་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་གི་གཙོས་སྤྱི་འཐུས་རྣམ་པ་དང་༸གོང་ས་མཆོག་གི་དམིགས་བསལ་སྐུ་ཚབ་དང་ཡུ་རོབ་སྐུ་ཚབ། བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་དང་སྐུ་ཚབ་དོན་གཅོད་རྣམ་པ། གཞུང་འབྲེལ་མིན་པའི་བོད་དོན་རྒྱབ་སྐྱོར་ཚོགས་པ་ཁག་གི་སྐུ་ཚབ་རྣམ་པ། དེ་བཞིན་ཉིན་གསུམ་རིང་གི་ཚོགས་ཆེན་ཐོག་བོད་དོན་གླེང་སློང་གསུང་བཤད་གནང་མཁན། མི་རིགས་དང་ཚོགས་པ་འདྲ་མིན་གྱི་མཁས་དབང་བཅས་ཁྱོན་མི་གྲངས་ ༡༢༠ བརྒལ་བ་འདུ་འཛོམས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཚོགས་ཆེན་དེར་དབུ་བཞུགས་ཐོག་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་ཁེ་ན་ཌའི་རྒྱལ་ས་ཨོ་ཊ་ཝར་དབུ་འཛུགས་གནང་ཡོད།
དེ་ཡང་དབུ་འབྱེད་མཛད་སྒོའི་ཐོག་མར་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ཌི་ནི་ནོ་ (Di Nino) མཆོག་གིས་ཚོགས་ཆེན་དུ་བཅར་བའི་སྐུ་ཚབ་རྣམས་ལ་འཚམས་འདྲི་དང་ཕེབས་བསུའི་གསུང་བཤད་གནང་ཡོད།
དེ་རྗེས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། ཐེངས་འདིའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མིའི་ཚོགས་ཆེན་འདི་ནི་དེ་སྔོན་དང་མི་འདྲ་བར་དམིགས་བསལ་གལ་འགངས་ཆེན་པོ་ཞིག་ཆགས་བཞིན་ཡོད། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་ཡོངས་སུ་རྫོགས་པ་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་མཛད་པའི་རྗེས་དང་། ད་ལྟའི་བོད་ནང་གི་ཛ་དྲག་གནས་སྟངས་དེ་འདྲ་ཞིག་ཆགས་བཞིན་པའི་སྐབས་འདིར་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ཌི་ནི་ནོ་ (Di Nino) མཆོག་གི་གཙོས་གྲོས་ཚོགས་ཀྱི་རྒྱབ་སྐྱོར་དང་རོགས་རམ་འོག་ཚོགས་འདུ་འདི་སྐོང་ཚོགས་གནང་ཐུབ་ཡོད། ཁེ་ན་ཌ་ནི་བོད་དོན་ཐོག་རྒྱབ་སྐྱོར་གནང་མཁན་གྱི་རྒྱལ་ཁབ་གཙོ་བོ་ཞིག་ཡིན་པར་ཐུགས་རྗེ་ཆེ་ཞུ་རྒྱུ་ཡིན་སོགས་ཀྱི་གསུང་བཤད་གནང་ཡོད། དེ་རྗེས་ཁེ་ན་ཌའི་མི་སེར་དང་ཕྱི་མི་ཞིབ་བཤེར་བློན་ཆེན་ཇི་སོན་ཀེན་ནི་ (Jason Kenney) མཆོག་གིས་འཚམས་འདྲི་དང་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་རྒྱལ་ཁབ་འདིའི་ཆེ་བསྟོད་མི་སེར་གྱི་ཕྱག་འཁྱེར་ཕུལ་བའི་སྐྱེས་ཆེན་ཞིག་ཡིན་པས་ད་རེས་སླར་ཡང་འདི་ཕྱོགས་ཆིབས་སྒྱུར་བསྐྱངས་པར་དགའ་བསུ་ཞུ་བཞིན་ཡོད། ཅེས་ཕེབས་བསུའི་གསུང་བཤད་དང་དེ་བཞིན་ཁོང་གིས་དེ་སྔ་ངས་ཁེ་ན་ཌའི་གཞུང་ཕྱོགས་ནས་བོད་དོན་ཆབ་སྲིད་ཐོག་དོ་སྣང་དང་ཐུགས་ཁུར་གནང་སྟེ་བོད་རྒྱ་གཉིས་བར་རྒྱ་ཕྱོགས་ནས་འབྲེལ་མོལ་གནང་དགོས་སྐོར་དང་།
དེ་བཞིན་བོད་མི་མང་པོ་ཞིག་ཁེན་ཌར་འབྱོར་ཡོད་པ་རྣམས་ལ་རོགས་ཕན་དང་ད་དུང་མུ་མཐུད་གནང་རྒྱུའི་ལས་འཆར་ཡོད་སྐོར་སོགས་ཀྱི་གསུང་བཤད་གནང་ཡོད།
དེ་རྗེས་ཨ་རིའི་མང་གཙོ་ཚོགས་པའི་གྲོས་ཚོགས་འཐུས་མི་ནན་སི་པི་ལོ་སི་མཆོག་གི་སྐུ་ཚབ་ཆེད་གཏོང་གནང་སྟེ་བརྡ་ལན་ཞིག་བསྐུར་ཡོད་པའི་ནང་འཁོད་དོན། བོད་ཕྱི་ནང་གཉིས་ཀྱི་བོད་མིའི་རྩ་དོན་དང་འཕྲལ་གྱི་དཀའ་ངལ་སོགས་ལ་རྒྱབ་སྐྱོར་དང་དཀའ་ངལ་དེ་དག་སེལ་ཐབས་གནང་ཡོད་པ་དང་ཨ་རིའི་གྲོས་ཚོགས་གོང་འོག་གཉིས་ནས་བོད་ནང་གི་བོད་མིའི་ཆོས་དད་དང་ཆབ་སྲིད་ཀྱི་རང་དབང་ལ་རྒྱ་ནག་གཞུང་ཕྱོགས་ནས་གུས་བཀུར་དགོས་སྐོར་གྲོས་ཆོད་གཏན་འབེབས་གནང་ཡོད་སྐོར་ཀྱི་འགྲེལ་བརྗོད་གནང་ཡོད། དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་བཅར་བ་རྣམས་ལ། ཁྱེད་རྣམ་པ་ད་རེས་འདིར་བདེན་པར་རྒྱབ་སྐྱོར་ཆེད་ཕེབས་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་སོགས་ཀྱི་བཀའ་སློབ་སྩལ་ཡོད། མཛད་སྒོའི་མཇུག་ཏུ་ཨི་ཊ་ལིའི་གྲོས་ཚོགས་འཐུས་མི་དང་རྒྱལ་སྤྱིའི་བོད་དོན་འབྲེལ་མཐུད་ཁང་གི་ཟུང་འབྲེལ་ཚོགས་གཙོ་ (Matteo Mecacci) མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་རྗེ་ཆེ་ཞུའི་གསུང་བཤད་གནང་བ་དང་སྦྲགས་རྒྱ་ནག་དང་ལྷན་དུ་ཚོང་འབྲེལ་གནང་མཁན་གྱི་རྒྱལ་ཁབ་རྣམས་ལ་གོ་རྒྱུ་བཏང་སྟེ་མཉམ་ལས་བྱེད་རྒྱུ་མེད་པའི་སྐོར་སོགས་ཀྱི་གསུང་བཤད་གནང་ཡོད། དེ་ཡང་ཁོང་གིས་གལ་ཏེ་ཁྱེད་རྣམ་པས་གཅིག་བསྡུས་རིང་ལུགས་པར་རོགས་རམ་གནང་ཚེ་རང་ཉིད་ཀྱི་ལུང་པའི་ནང་མང་གཙོ་མེད་པ་བཟོས་པ་ལྟ་བུ་རེད། དེ་འདྲ་ཡིན་དུས་ད་ཆ་མི་དེ་ཚོས་ཤེས་རྟོགས་ཡོང་བཞིན་འདུག དེ་ལས་ལྷག་པ་ཞིག་ཞུ་རྒྱུ་མེད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སྐུ་ཚེ་ཁྲི་ལོར་བརྟན་པར་ཤོག བོད་ལ་རང་དབང་ཐོབ་པའི་སྨོན་འདུན་ཡོད་ཅེས་སོགས་ཀྱི་གསུང་བཤད་གནང་ཡོད།
སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་འགྲེལ་བརྗོད་གནང་བའི་ནང་གསལ། ཐེངས་འདིའི་ཚོགས་ཆེན་འདི་ནི་གཙོ་བོ་བོད་ནང་གི་ཛ་དྲག་གནས་སྟངས་ཐོག་དང་རྒྱ་ནག་ནང་ཆབ་སྲིད་འགོ་ཁྲིད་གསར་པ་འདེམས་ཐོན་བྱུང་རྗེས་གནད་འགག་ཅན་ཞིག་ཏུ་འགྱུར་ཡོད་སྐོར་གསུངས་ཡོད། དེ་ཡང་གྲོས་ཚོགས་འཐུས་མིའི་རྒྱབ་སྐྱོར་ཚོགས་ཆེན་འདི་ནི་བོད་དོན་རྒྱབ་སྐྱོར་དང་འབྲེལ་ཡོད་ལས་དོན་གལ་ཆེ་ཞིག་ཆགས་ཡོད། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དང་པོ་དེ་ཕྱི་ལོ་ ༡༩༩༤ ལོར་རྒྱ་གར་གྱི་རྒྱལ་ས་ལྡི་ལི་དང་། གཉིས་པ་ཕྱི་ལོ་ ༡༩༩༥ ལོར་ལི་ཐུ་ནི་ཡའི་རྒྱལ་ས་ཝིལ་ནུས། གསུམ་པ་ཕྱི་ལོ་ ༡༩༩༧ ལོར་ཨ་རིའི་རྒྱལ་ས་ཝ་ཤིང་ཊོན། བཞི་པ་ཕྱི་ལོ་ ༢༠༠༥ ལོར་སོ་ཀོ་ཊ་ལན་ཌིའི་རྒྱལ་ས་ཨི་ཌན་སྦ་ར། ལྔ་པ་ཕྱི་ལོ་ ༢༠༠༩ ལོར་ཨི་ཊ་ལིའི་རྒྱལ་ས་རོམ་བཅས་སུ་ཚོགས་ཡོད། ད་རེས་དྲུག་པ་འདི་ལོ་ཕྱི་ལོ་ ༢༠༡༢ ལོར་ཀེ་ན་ཌའི་རྒྱལ་ས་ཨོ་ཊ་ཝར་ཚོགས་ཡོད།
ཐེངས་འདིའི་ཚོགས་ཆེན་གྱི་བརྗོད་གཞི་གཙོ་བོ་ཁག་ནི།
དང་པོ། བོད་མཐོ་སྒང་ནི་འཛམ་གླིང་སའི་གོ་ལའི་སྣེ་གསུམ་པ་དང་། བོད་ཀྱི་ཁོར་ཡུག་གནས་སྟངས་དང་དེའི་ཤུགས་རྐྱེན།
གཉིས་པ། ད་ལྟའི་གནས་སྐབས་འདིར་བོད་མིར་འཕྲད་བཞིན་པའི་དཀའ་ངལ་ལ་གདོང་ལེན་བྱ་ཕྱོགས།
གསུམ་པ། བོད་ཐོག་འཛིན་པའི་རྒྱ་གཞུང་གི་སྲིད་བྱུས་དང་། རྒྱ་ནག་གི་མ་འོངས་འགོ་ཁྲིད་བརྗེ་བསྒྱུར་དང་བོད་ཀྱི་གནས་བབས།
བཞི་པ། རིག་གཞུང་དང་ཆོས་དད་རང་དབང། སྤྱི་ཚོགས་བརྟན་ལྷིང་དབར་ཕན་ཚུན་གཅིག་ལ་གཅིག་བརྟེན།
ལྔ་པ། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་ལས་ཁང་གི་ལས་དོན་སྙན་གསན་དང་ཚོགས་ཆུང་ཆ་བགོས་ཐོག་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ལས་འགུལ་ནུས་ཤུགས་ཆེ་རུ་གཏོང་ཐབས།
དྲུག་པ། ཚོགས་ཆུང་ཆ་བགོས་ཐོག་མ་འོངས་ལས་འཆར་སྤེལ་ཕྱོགས་བཅས་ཀྱི་སྐོར་ལ་ཕྱི་ཚེས་ ༢༧ ནས་ ༢༩ བར་ཉིན་གྲངས་གསུམ་རིང་ཚོགས་ཡོད།
ཕྱི་ཚེས་ ༢༩ ཉིན་གོང་གསལ་དོན་ཚན་ཁག་ལ་གོ་བསྡུར་སྦྱང་བཤད་མཐིལ་ཕྱིན་གྲུབ་སྟེ་ཚོགས་ཆེན་ཐེངས་དྲུག་པའི་མཐའ་མའི་ཡོངས་ཁྱབ་གསལ་བསྒྲགས་དང་། མ་འོངས་ལས་འཆར་ཇི་སྤེལ་གྱི་ཡིག་ཆ་ཁག་གཏན་འབེབས་དང་འབྲེལ་ཚོགས་ཆེན་དྲུག་པ་རྒྱལ་ཁའི་ངང་ནས་གྲུབ་ཡོད་པ་བཅས། །
