༢༠༡༢ ཟླ་ ༤ ཚེས་ ༢༥ རེས་གཟའ་ལྷག་པ།
༄༅། །འདི་གར་ཕྱི་ལོ་ ༢༠༡༢ ཟླ་ ༤ ཚེས་ ༢༤ ཉིན་རྡ་སར་རྟེན་གཞི་བྱས་པའི་བསམ་འགྲུབ་རྒྱ་མཚོ་ལགས་ཀྱི་ཕ་གཅིག་པའི་གཅུང་པོ་དར་རྒྱས་ལགས་ཀྱི་གནས་ཚུལ་མཁོད་སྤྲོད་གནང་བ་ལྟར་ན། ཕྱི་ལོ་ ༢༠༡༠ ལོའི་ཟླ་ ༥ ཚེས་ ༡ ཉིན་བོད་ཀྱི་རྒྱལ་ས་ལྷ་སར་ཞི་བའི་ངོ་རྒོལ་སྐད་འབོད་གནང་མཁན་གྱི་བོད་མི་བསམ་འགྲུབ་རྒྱ་མཚོ་ལགས་སུ་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་འདུག
ད་ལྟ་རྒྱ་གར་དྷ་རམ་ས་ལར་གནས་སྡོད་བྱེད་ཀྱིན་པའི་བསམ་འགྲུབ་རྒྱ་མཚོ་ལགས་ཀྱི་ཕ་མ་གཅིག་པའི་གཅུང་པོ་དར་རྒྱས་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཁོང་གི་ཕུ་བོ་མསམ་འགྲུབ་རྒྱ་མཚོ་ལགས་ཀྱིས་ ༢༠༡༠ ལོར་བོད་ཀྱི་རྒྱལ་ས་ལྷ་སར་ཞི་བའི་ངོ་རྒོལ་སྐད་འབོད་བྱས་པ་དང་། སྐབས་དེར་ཁོང་གིས་༸གོང་ས་མཆོག་བོད་ལ་གདན་འདྲེན་ཞུ་དགོས། པཎ་ཆེན་ཆུང་སྲིད་རིན་པོ་ཆེ་མྱུར་དུ་གློད་བཀྲོལ་གཏོང་དགོས། རྒྱ་ནག་གིས་ཐེངས་འདིའི་སྐྱེ་རྒུ་མདོའི་ས་ཡོམ་གོད་ཆག་བྱུང་ཡུལ་ནས་བོད་མི་མང་པོ་ཞིག་ཕྱིར་ཕུད་བཏང་བ་དེ་དག་ལ་ས་གནས་ས་ཐོག་ཏུ་ངོ་སྐྱོད་ཀྱིས་རོགས་སྐྱོར་བྱེད་དུ་འཇུག་དགོས་ཞེས་དུས་ཡུན་སྐར་མ་སྔ་ཙམ་རིང་སྐད་འབོད་བྱས་ཡོད་པ་དང་། དེའི་རྗེས་ཉེན་རྟོག་མི་སྣ་བདུན་ཙམ་འབྱོར་ཏེ་འཛིན་བཟུང་བཙན་ཁྲིད་བྱས་འདུག
དེ་ནས་ད་བར་གནས་ཚུལ་གང་ཡང་ཤེས་རྟོགས་མ་བྱུང་བར་ལྷག་ཡོད་ཀྱང་། གནས་ཚུལ་མཁོ་སྤྲོད་པས་བརྗོད་དོན་ལྟར་ན། ཉིན་དགའི་སྔོན་དུ་ཡི་གེ་ཞིག་འབྱོར་བའི་ནང་། བསམ་འགྲུབ་རྒྱ་མཚོ་ལགས་སུ་ལྷ་ས་གྲྭ་བཞི་བཙོན་ཁང་དུ་ལོ་ལྔའི་བཙོན་འཇུག་ཁྲིམས་ཐག་བཅད་ཟིན་པའི་སྐོར་འཁོད་ཡོད་འདུག
ཡིན་ནའང་། ལོ་སྔོན་མའི་ལོ་མཇུག་ཏུ་བསམ་འགྲུབ་རྒྱ་མཚོའི་ཨ་མ་དང་ནང་མི་ཉེ་འབྲེལ་འགའ་ལྷ་སར་ཁོང་ཐུག་འཕྲད་དུ་ཐེངས་གཉིས་ཙམ་སོང་འདུག་ཀྱང་། ཐུག་འཕྲད་བྱེད་བཅུག་མི་འདུག
བསམ་འགྲུབ་རྒྱ་མཚོ་ལགས་ནི་ཕྱི་ལོ་ ༡༩༨༢ ལོར་མཚོ་བྱང་བོད་རིགས་རང་སྐྱོང་ཁུལ་མདའ་བཞི་རྫོང་གསེར་ཐང་གྲོང་བརྡལ་ཀྱི་མི་ཡིན་པ་དང་། ཕྱི་ལོ་ ༡༩༩༦ ནས་བཟུང་ལོ་བཞིའི་རིང་ལཱ་མོ་ཞབས་དྲུང་སྒར་ཐོག་དགོན་དུ་སློབ་གཉེར་བྱས། ཕྱིས་སུ་ ༢༠༠༧ ལོའི་ཟླ་ ༡༡ པའི་ནང་བཙན་བྱོལ་ཏུ་འབྱོར་ཏེ་ཤེས་རབ་དགའ་ཚལ་སློབ་གླིང་དུ་ལོ་ ༡ མ་ཟིན་ཙམ་ལ་སློབ་གཉེར་བྱས་འདུག
ཕྱི་ལོ་ ༢༠༠༩ ཕྱི་ཟླ་ ༣ ནང་ཕྱིར་རང་ཡུལ་དུ་ལོག་སྐབས་རྒྱ་ནག་གཞུང་གིས་རྒྱ་གར་ནང་གནས་སྡོད་བྱས་པ་དང་༸གོང་ས་མཆོག་གི་བཀའ་སློབ་ཀྱི་དཔེ་ཆ་བོད་ནང་དུ་འཁྱེར་ཡོང་ཡོད་པའི་ཉེས་མིང་འོག་ཟླ་ ༧ རིང་གྲྭ་བཞི་བཙོན་ཁང་དུ་དུས་བཀག་བཙོན་འཇུག་བྱས་ཡོད་པ་རེད། དེའི་རྗེས་གློད་བཀྲོལ་བཏང་ནས་རང་ཡུལ་ཏུ་ལོག་ཀྱང་མདའ་བཞི་རྫོང་དུ་ཉིན་གསུམ་རིང་བཀག་གཉར་དང་འདྲི་གཅོད་བྱས་འདུག སྐབས་དེར་ཡུལ་དེའི་སྡེ་དཔོན་དང་ཉེ་མི་རྣམས་ཀྱིས་སྤྱི་བདེ་ལས་ཁུངས་ལ་རྒྱ་སྒོར་ཆིག་ཁྲི་ལྷག་གི་ཉེས་ཆད་དང་ཕྱིས་སུ་གང་སར་མི་འགྲོ་བའི་ཁས་ལེན་འོག ལོ་གཉིས་ཀྱི་བཟང་བཙོན་ཀྱི་ཡིག་ཆ་སྤྲད་ནས་ཕྱིར་བཏང་རྗེས་ཁོང་གིས་སྔ་ས་ནས་སེམས་ཐག་བཅད་པ་བཞིན་རྒྱ་གར་ནང་ཡོད་ཁོའི་ནུ་བོ་བསྟན་པ་དར་རྒྱས་ལ་འབྲེལ་གཏུག་བྱས་ནས་ཡང་བསྐྱར་བོད་ནང་དུ་དགོས་མཁོ་ཆེ་བའི་བཀའ་སློབ་དང་ཡིག་ཆ་སྐོར་གསང་ལེན་བྱས་ཏེ་༸གོང་ས་མཆོག་གི་བཀའ་དྲིན་དྲན་གསོ་དང་ཞབས་བརྟན་ཆེད། ཟོག་ལུག་ཚེ་ཐར་གཏོང་རྒྱུ་དང་པཎ་ཆེན་ཆུང་སྲིད་རིན་པོ་ཆེ་གློད་བཀྲོལ་དགོས་པའི་ས་ཡིག་བསྡུ་རུབ་ཀྱི་སྐབས་དང་བསྟུན་ནས་དཔེ་དེབ་གང་མང་ཞིག་བཀྲམས་གང་ཐུབ་བྱས་འདུག སྐབས་དེར་སྤྱི་བདེ་ལས་ཁུངས་ཀྱི་དོགས་གཞི་བྱེད་བཞིན་པ་ཤེས་ནས་མགྱོགས་མྱུར་ངང་ཕྱིར་བོད་ཀྱི་རྒྱ་ས་ལྷ་སར་ཡོང་ཐུབ་པ་བྱས་ཡོད། དེའི་རྗེས་ཕྱི་ཟླ་ ༥ ཚེ་ ༡ ཉིན་ཕྱི་དྲོ་ཆུ་ཚོད་གསུམ་དང་སྐར་མ་ ༢༠ ཐོག་ལྷ་ལྡན་གཙུག་ལག་ཁག་གི་མདུན་ཐང་དུ་༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། པཎ་ཆེན་ཆུང་སྲིད་རིན་པོ་ཆེ་མྱུར་དུ་གློད་བཀྲོལ་གཏོང་དགོས། རྒྱ་ནག་གིས་ཐེངས་འདིའི་སྐྱེ་རྒུ་མདོའི་ས་ཡོམ་གོད་ཆག་བྱུང་ཡུལ་ནས་བོད་མི་མང་པོ་ཞིག་ཕྱིར་ཕུད་བཏང་བ་དེ་དག་ལ་ས་གནས་ས་ཐོག་ཏུ་ངོ་སྤྲོད་ཀྱིས་རོགས་སྐྱོར་བྱེད་དུ་འཇུག་དགོས་ཞེས་དུས་ཡུན་སྐར་མ་ལྔ་ཙམ་རིང་སྐད་འབོད་བྱས་མཐར་ཉེན་རྟོག་མི་སྣ་བདུན་ཙམ་འབྱོར་ཏེ་འཛིན་བཟུང་བཙན་ཁྲིད་བྱས་ཡོད་འདུག་པ་བཅས།།།
